ភ្នំពេញ៖ អាជ្ញាធរកម្ចាត់មីន បានប្រមូលគ្រាប់យុទ្ធភណ្ឌមិនទាន់ផ្ទុះជាង៧តោន និងគ្រោងឆ្អឹងមនុស្ស នៅក្នុងទន្លេមេគង្គ ស្ថិតនៅឃុំមានជ័យ ស្រុកស្រីសន្ធរ ខេត្តកំពង់ចាម។ នេះបើតាមលោក ម៊ី សុភា មេបញ្ជាការកងបោសសម្អាតគ្រាប់យុទ្ធភណ្ឌមិនទាន់ផ្ទុះនៅក្រោមទឹក នៃមជ្ឈមណ្ឌលកម្ចាត់មីនកម្ពុជា។
លោក ម៊ី សុភា បានបញ្ជាក់ថា គ្រាប់យុទ្ធភណ្ឌដែលបានរុករកឃើញនេះ គឺនៅនាវាមួយគ្រៅ ដែលបានលិចក្នុងបាតទន្លេមេគង្គ ជម្រៅទឹកពី២៥ ទៅ៣០ម៉ែត្រ កាលពីសម័យសង្គ្រាមនោះ គឺជាប្រភេទគ្រាប់កាំំភ្លើងត្បាល់៦០មីលីម៉ែត្រ ៨១មីលីម៉ែត្រ និងគ្រាប់កាំំភ្លើងយន្ត១២,៧មីលីម៉ែត្ររបស់អាមេរិក។ ចំណែកគ្រោងឆ្អឹងមនុស្ស គឺអាជ្ញាធរបានរកឃើញតែចំណែកខ្លះៗ ដែលមិនទាន់អាចកំណត់អត្តសញ្ញាណមនុស្សនោះឡើយ។
«គ្រោងឆ្អឹងហ្នឹងធំ ហើយវែង វាជាគ្រោងឆ្អឹងភ្លៅ យើងអត់ទាន់កំណត់បាននៅឡើយទេ។គ្រាន់តែយើងបាន់ស្មានទៅឆ្អឹងមនុស្សហ្នឹងវាវែងដែលមានកម្ពស់ដល់ទៅ១៧០ ដល់១៨០ម៉ែត្រ»។ នេះជាការលើកឡើងរបស់ លោក ម៊ី សុភា ដែលប្រាប់សារព័ត៌មានថ្មីៗថា អ្នកជំនាញនឹងបន្តស្រាវជ្រាវអត្តសញ្ញាណលើគ្រោងឆ្អឹងនោះ និងរុករកចំណែកគ្រោងឆ្អឹងជាបន្តទៀតផងដែរ។
ឆ្អឹងមនុស្សដែលត្រូវបានអាជ្ញាធររកឃើញនៅក្នុងទន្លេមេគង្គ ក្នុងស្រុកស្រីសន្ធរ ខេត្តកំពង់ចាម រូបពី លោក ម៊ី សុភា មេបញ្ជាការកងបោសសំអាតគ្រាប់យុទ្ធភណ្ឌមិនទាន់ផ្ទុះនៅក្រោមទឹកនៃមជ្ឈមណ្ឌលកម្ចាត់មីនកម្ពុជា
លោក ម៊ី សុភា បានបញ្ជាក់ថា គ្រាប់យុទ្ធភណ្ឌ និងគ្រោងឆ្អឹងនោះ គឺត្រូវបានអ្នកជំនាញសិក្សាថា សល់តាំងពីសម័យស៊ីវិលនៅកម្ពុជា ក្នុងឆ្នាំ១៩៧០ ដល់ឆ្នាំ១៩៧៥ រវាងកងទ័ពសេនាប្រមុខលន់នល់ ជាមួយនឹងកងទ័ពរំដោះកម្ពុជាប្រជាធិបតេយ្យ។
បើតាមលោក ម៊ី សុភា ប្រតិបត្តិការរុករក និងប្រមូលគ្រឿងយុទ្ធភណ្ឌក្នុងបាតទន្លេមេគង្គ ក្នុងទំហំ១៥០០ម៉ែត្រ ស្មើនឹង១៥០ហិកតានោះ គឺត្រូវបានអនុវត្តឡើងតាំងពីចុងខែតុលា ឆ្នាំ២០២០ និងបន្តរុករកទៀតរហូតដល់ខែឧសភា ឆ្នាំ២០២១ នៅតាមដងទន្លេមេគង្គ។
លោក ម៊ី សុភា បាននិយាយថា មូលហេតុដែលអាជ្ញាធរប្រតិបត្តិការប្រមូលឡើងនេះ ដើម្បីបញ្ចៀសហានិភ័យដល់មច្ឆជាតិ និងមនុស្ស។ លោកបានប្រាប់ថា៖«គ្រឿងផ្ទុះរបស់វាហ្នឹងគឺសុទ្ធតែមានគ្រឿងគីមីផ្សំ ដែលស្ថិតនៅក្នុងទន្លេនោះជិត៥០ឆ្នាំហើយ នៅពេលណាមួយសារធាតុទាំងអស់នោះនឹងបំលែង និងប្រែប្រួល។ អ៊ីចឹង អ៊ីចឹងនៅពេលសារធាតុគីមីហ្នឹងប្រតិកម្មទៅ ត្រី មានសារធាតុពុលនៅក្នុងខ្លួនដែរ។ អ៊ីចឹងពលរដ្ឋបរិភោគត្រី ប្រើប្រាស់ទឹកទន្លេ។ នៅពេលដែលពលរដ្ឋនេសាទ ឬធ្វើសកម្មភាពអ្វីនៅក្នុងបាតទន្លេ វាធ្វើឲ្យនាំគ្រោះថ្នាក់ដល់ជីវិត»។
បើតាមលោក ម៊ី សុភា ចំពោះគ្រឿងយុទ្ធភណ្ឌ និងគ្រោងឆ្អឹងមនុស្សនោះ នឹងត្រូវបានអាជ្ញាធរមីនយកទៅរក្សាទុកនៅក្នុងឃ្លាំងសុវត្ថិភាព ដែលស្ថិតនៅក្បែរកន្លែងប្រតិបត្តិរុករក ក្នុងឃុំមានជ័យ ស្រុកស្រីសន្ធរ ខេត្តកំពង់ចាម ដើម្បីរង់ចាំការសម្រេចរបស់រាជរដ្ឋាភិបាលឲ្យកម្ទេចគ្រោងយុទ្ធភណ្ឌនោះ៕
គ្រាប់យុទ្ធភណ្ឌដែលត្រូវបានអាជ្ញាធរប្រទះឃើញនៅក្នុងទន្លេមេគង្គ ក្នុងស្រុកស្រីសន្ធរ ខេត្តកំពង់ចាម រូបភាពពីលោក ម៊ី សុភា មេបញ្ជាការកងបោសសំអាតគ្រាប់យុទ្ធភណ្ឌមិនទាន់ផ្ទុះនៅក្រោមទឹកនៃមជ្ឈមណ្ឌលកម្ចាត់មីនកម្ពុជា
គ្រាប់យុទ្ធភណ្ឌដែលត្រូវបានអាជ្ញាធរប្រទះឃើញនៅក្នុងទន្លេមេគង្គ ក្នុងស្រុកស្រីសន្ធរ ខេត្តកំពង់ចាម រូបភាពពីលោក ម៊ី សុភា មេបញ្ជាការកងបោសសំអាតគ្រាប់យុទ្ធភណ្ឌមិនទាន់ផ្ទុះនៅក្រោមទឹកនៃមជ្ឈមណ្ឌលកម្ចាត់មីនកម្ពុជា
គ្រាប់យុទ្ធភណ្ឌដែលត្រូវបានអាជ្ញាធរប្រទះឃើញនៅក្នុងទន្លេមេគង្គ ក្នុងស្រុកស្រីសន្ធរ ខេត្តកំពង់ចាម រូបភាពពីលោក ម៊ី សុភា មេបញ្ជាការកងបោសសំអាតគ្រាប់យុទ្ធភណ្ឌមិនទាន់ផ្ទុះនៅក្រោមទឹកនៃមជ្ឈមណ្ឌលកម្ចាត់មីនកម្ពុជា