COVID-19
អន្តរជាតិ
កូវីដ-១៩៖ អឺរ៉ុប ចេញវិធានការរឹតបន្តឹងការនាំចេញវ៉ាក់សាំង
× គណៈកម្មការអឺរ៉ុប នៅថ្ងៃទី២៩ ខែមករា បានដាក់ចេញវិធានការត្រួតពិនិត្យវ៉ាក់សាំងដែលផលិតនៅតាមរោងចក្រប្រទេសអឺរ៉ុប ស្របពេលមានជម្លោះជាមួយក្រុមហ៊ុនផលិតឱសថអង់គ្លេស AstraZeneca លើការផ្គត់ផ្គង់វ៉ាក់សាំង។ វិធានការនេះ ក៏អាចឈានដល់ការរឹតត្បិតលើការនាំចេញវ៉ាក់សាំងទៅក្រៅតំបន់អឺរ៉ុបទៀតផង។ អង្គការសុខាភិបាលពិភពលោក (WHO) បង្ហាញក្ដីបារម្ភចំពោះវិធានការបែបនេះ។
ជម្លោះរវាងក្រុមហ៊ុនស៊ុយអែត-អង់គ្លេស AstraZeneca និងសហភាពអឺរ៉ុបលើការផ្គត់ផ្គង់វ៉ាក់សាំងឱ្យប្លុកមួយនេះ កំពុងកើនកម្ដៅខ្លាំង ខណៈក្រុមហ៊ុនមួយនេះ មិនទាន់ផ្គត់ផ្គង់វ៉ាក់សាំងឱ្យបានគ្រប់គ្រាន់តាមការព្រមព្រៀង តែបែរជាបន្តដឹកវ៉ាក់សាំងឱ្យអង់គ្លេសទៅវិញ។ ដើម្បីធានាឱ្យបានវ៉ាក់សាំងសម្រាប់ពលរដ្ឋអឺរ៉ុប គណៈកម្មការអឺរ៉ុប ក៏ដាក់ចេញវិធានការបន្ទាន់មួយដើម្បីត្រួតពិនិត្យវ៉ាក់សាំងរបស់ក្រុមហ៊ុននេះដែលផលិតនៅអឺរ៉ុប។
ចំណាត់ការបន្ទាន់របស់អឺរ៉ុប ចូលធរមាននៅថ្ងៃទី៣០ ខែមករា ដែលដំណាក់កាលដំបូងមានសុពលភាព៦សប្ដាហ៍ ហើយអាចបន្តដល់ដំណាច់ខែមីនាឯណោះ។ ចំណាត់ការនេះ គ្របណ្ដប់តែលើវ៉ាក់សាំងដែលស្ថិតក្រោមកិច្ចព្រមព្រៀងទិញមុនរវាងក្រុមហ៊ុនផលិតវ៉ាក់សាំង និងគណៈកម្មការអឺរ៉ុបប៉ុណ្ណោះ។ ក្រុមហ៊ុនឱសថ ត្រូវដាក់ពាក្យសុំការអនុញ្ញាតពីគណៈកម្មការអឺរ៉ុបដើម្បីនាំចេញទៅកាន់ប្រទេសក្រៅប្លុកអឺរ៉ុប ហើយត្រូវបង្ហាញកំណត់ត្រានាំចេញបីខែមុនផង។
«យើងបានចំណាយលុយឱ្យប្រទេសក្រុមហ៊ុនទាំងនេះដើម្បីបង្កើនផលិតកម្ម ហើយយើងរំពឹងក្រុមហ៊ុននេះ ដឹកវ៉ាក់សាំងឱ្យយើង។» នេះជាការលើកឡើងរបស់អនុប្រធានគណៈកម្មការអឺរ៉ុប Valdis Dombrovskis ដែលបន្តថា វិធានការរបស់គណៈកម្មការអឺរ៉ុប ត្រូវបានអនុវត្តយ៉ាងបន្ទាន់ សំដៅធានាតម្លាភាព និងបង្កើតយន្តការដើម្បីធានាការផ្គត់ផ្គង់វ៉ាក់សាំង។ បើតាមទីភ្នាក់ងារព័ត៌មាន AFP មន្ត្រីអឺរ៉ុបបញ្ជាក់ថា ក្រុមហ៊ុនឱសថទាំងអស់ ត្រូវអនុវត្តតាមចំណាត់នេះ មិនមែនតែ AstraZeneca ទេ។
ប្រទេសអឺរ៉ុបដែលមិនមែនជាសមាជិកសហភាពអឺរ៉ុបមួយចំនួនដូចជាស្វ៊ីស និងប្រទេសតំបន់បាល់កង់ មិនស្ថិតក្រោមវិធានការថ្មីឡើយ។ អង់គ្លេសដែលទើបចែកផ្លូវគ្នាជាមួយសហភាពអឺរ៉ុប បែរជាស្ថិតក្រោមចំណាត់ការទៅវិញ។ ស្នងការសុខាភិបាលអឺរ៉ុប Stella Kyriakides និយាយថា ផែនការខាងលើ មិនមែនតម្រង់ប្រទេសណាមួយឡើយ ហើយសហភាពអឺរ៉ុប ក៏មិនមែនកំពុងប្រកួតប្រជែងប្រទេសណាដែរ។
អង្គការសុខភាពពិភពលោក ចាត់ទុកចំណាត់ការរបស់អឺរ៉ុបជាផ្នែកមួយនៃនិន្នាការគួរឱ្យបារម្ភដែលអាចប៉ះពាល់ការផ្គត់ផ្គង់វ៉ាក់សាំងសាកល។ ជំនួយការនាយក WHO ទទួលបន្ទុកការទទួលបានឱសថ និងផលិតវេជ្ជសាស្ត្រនិយាយថា Mariangela Simao លើកឡើងថា វាមិនមែនជារឿងល្អឡើយនៅដំណាក់កាលនេះដែលប្រទេសណាមួយ ចេញវិធានការរឹតត្បិត ឬដាក់របាំងនាំចេញនោះ។
តាមគម្រោង សហភាពអឺរ៉ុប ចង់បានវ៉ាក់សាំង២.៥ពាន់លានដូស។ ចំនួននេះច្រើនជាងចំនួនដែលពលរដ្ឋអឺរ៉ុប៤៥០លាននាក់ ត្រូវការ។ ប៉ុន្តែចំនួនទាំង២.៥ពាន់លានដូសនេះ ក៏មានចំណែកសម្រាប់ប្រទេសក្រីក្រដែលសហភាពអឺរ៉ុបទិញ និងផ្ដល់ឱ្យតាមរយៈយន្តការ COVAX ៕
© រក្សាសិទ្ធិដោយ thmeythmey.com