ជំរឿន២០១៩ បង្ហាញថា ស្រីច្រើនជាងប្រុស ដោយមានតែ៨ខេត្តប៉ុណ្ណោះដែលប្រុសច្រើនជាងស្រី

ជាតិ

ជំរឿន២០១៩ បង្ហាញថា ស្រីច្រើនជាងប្រុស ដោយមានតែ៨ខេត្តប៉ុណ្ណោះដែលប្រុសច្រើនជាងស្រី

03, Feb 2021 , 8:29 am

រូបភាព

ដោយ: រួបរួម

កម្ពុជាមានពលរដ្ឋជាង១៥.៥៥លាននាក់ ក្នុងនោះបុរសមានជាង៧.៥៧លាននាក់ និងស្ត្រីជិត៨លាននាក់។ នេះបើតាមលទ្ធផលជំរឿនទូទៅប្រជាជននៅកម្ពុជាឆ្នាំ២០១៩ ដោយស្ត្រីមានចំនួនច្រើនជាងបុរសស្ទើរគ្រប់ខេត្ត លើកលែងតែ៨ខេត្តប៉ុណ្ណោះ។

ភ្នំពេញ មានពលរដ្ឋជាង២,២៨លាននាក់ ដែលស្មើនឹង១៤,៧ភាគរយនៃចំនួនសរុប, ខេត្តកណ្តាល មានជាង១,២លាននាក់ (ស្មើ៧,៧ភាគរយ), ព្រៃវែង ១,០៥លាននាក់ (៦,៨ភាគរយ), សៀមរាប ១,០១លាននាក់ (៦,៥ភាគរយ), បាត់ដំបង ជិត១លាននាក់ (៦,៤ភាគរយ), តាកែវ ជាង៩០ម៉ឺននាក់ (៥,៨ភាគរយ) និងកំពង់ចាម ជិត៩០ម៉ឺននាក់ (៥,៨ភាគរយ)។

លទ្ធផលជារួម ដែលគិតទាំងទីប្រជុំជន ជនបទ ទំនាបកណ្តាល ទន្លេសាប ឆ្នេរ និងសមុទ្រ ខ្ពង់រាប និងភ្នំ សុទ្ធតែមានចំនួនមនុស្សស្រីច្រើនជាងមនុស្សប្រុស ដោយលើកលែងតែ ខេត្តកោះកុង មណ្ឌលគិរី ព្រះវិហារ រតនគិរី ព្រះសីហនុ ស្ទឹងត្រែង និងឧត្តរមានជ័យ ប៉ុណ្ណោះដែលមនុស្សប្រុសមានចំនួនច្រើនជាងមនុស្សស្រី ប៉ុន្តែគម្លាតពីគ្នាតិចតួចបំផុត៕