ជាតិ
សេដ្ឋកិច្ច
កម្ពុជា រំពឹងកើនពាណិជ្ជកម្ម២៥ភាគរយ ជាមួយកូរ៉េ តាមរយៈFTA លោកប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម បានបញ្ចប់រការចរចាជាផ្លូវការនៃកិច្ចព្រមព្រៀងពាណិជ្ជកម្មសេរី ជាមួយលោកស្រី YOO Myung-hee រដ្ឋមន្រ្តីក្រសួងពាណិជ្ជកម្មសាធារណរដ្ឋកូរ៉េ តាមរយៈប្រព័ន្ធវីដេអូ នាព្រឹកថ្ងៃទី២កុម្ភៈ។ រូបថត៖ ក្រសួងពាណិជ្ជកម្ម
× កម្ពុជា-សាធារណរដ្ឋកូរ៉េ បានបញ្ចប់ការចរចាជាផ្លូវការនៃកិច្ចព្រមព្រៀងពាណិជ្ជកម្មសេរី(CKFTA) នាព្រឹកថ្ងៃទី៣ កុម្ភៈ ។ តាមរយៈកិច្ចព្រមពៀងFTAនេះ នឹងធ្វើឱ្យទំហំពាណិជ្ជកម្មរវាងកម្ពុជានិងកូរ៉េ កើនដល់ ២៥ភាគរយ។ នេះបើតាមការរំពឹងរបស់លោក ស៊ាង ថៃ រដ្ឋលេខាធិការនៃក្រសួងពាណិជ្ជកម្ម។
លោក ស៊ាង ថៃ បានបញ្ជាក់ថា ទំហំពាណិជ្ជកម្មរវាងកម្ពុជានិងកូរ៉េខាងត្បូង មានកំណើនពី១៥-១៦ភាគរយ ជារៀងរាល់ឆ្នាំ។ ប៉ុន្តែសម្រាប់ឆ្នាំ២០២០ ដែលពិភពលោកជួបនូវវិបត្តិជំងឺរាតត្បាតកូវីដ-១៩ បានធ្វើឱ្យទំហំពាណិជ្ជកម្មរវាងពីរ ធ្លាក់ចុះចំនួន១៧ភាគរយ។ តែយ៉ាងណាលោក ស៊ាង ថៃ រំពឹងថា ទំហំពាណិជ្ជកម្មភាគីទាំងពីរ នឹងកើនឡើង២៥ភាគរយវិញ តាមរយៈកិច្ចព្រមព្រៀងពាណិជ្ជកម្មសេរីនេះ។
«ប៉ុន្តែ នៅថ្ងៃមុខពេលដែលយើងមានកិច្ចព្រមពៀងពាណិជ្ជកម្មសេរីជាមួយគ្នា[កូរ៉េខាងត្បូង] យើងរំពឹងថា ទំហំពាណិជ្ជកម្មរវាងប្រទេសយើងទាំងពីរ នឹងអាចកើនដល់២០ទៅ២៥ភាគរយ ទៅតាមរយៈពេលដើមឆ្នាំរបស់វា»។ នេះជាការលើកឡើងរបស់លោក ស៊ាង ថៃ ដែលប្រាប់សារព័ត៌មានថ្មីៗតាមទូរសព្ទបន្ថែមថា ទំហំពាណិជ្ជកម្មរវាងប្រទេសទាំងពីរអាចកើនឡើងលើសពីនេះ លុះត្រាតែភាគីទាំងសងខាង ខិតខំអនុវត្តលើអ្វីដែលបានព្រមពៀងគ្នា។
កម្ពុជា-សាធារណរដ្ឋកូរ៉េ បានបញ្ចប់ការចរចាជាផ្លូវការនៃកិច្ចព្រមព្រៀងពាណិជ្ជកម្មសេរី(CKFTA) នាព្រឹកថ្ងៃទី៣កុម្ភៈ ដែលដឹកនាំលោកប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ជាមួយលោកស្រី YOO Myung-hee រដ្ឋមន្ត្រីក្រសួងពាណិជ្ជកម្មសាធារណរដ្ឋកូរ៉េ។ ប្រទេសទាំងពីរ គ្រោងចុះហត្ថលេខាលើកិច្ចព្រមព្រៀងពាណិជ្ជកម្មសេរីទ្វេភាគីនេះ នៅកណ្តាលឆ្នាំ២០២១។
តាមរយៈកិច្ចព្រមពៀងCKFTAនេះ នឹងលើកកម្ពស់ការនាំចេញរបស់កម្ពុជាទៅកូរ៉េបន្ថែមទៀត លើមុខទំនិញដែលធ្លាប់នាំចេញកន្លងមក។ ក្នុងនោះរួមមាន៖ សម្លៀកបំពាក់ និងវាយនភណ្ឌ ស្បែកជើង កាបូប គ្រឿងបន្លាស់ ឧបករណ៍អេឡិចត្រូនិក កៅស៊ូ ជាពិសេសគឺផលិតផលកសិកម្ម។ ចំណែកប្រទេសកូរ៉េ អាចបង្កើនលទ្ធភាព នាំចូលយានយន្ត គ្រឿអេឡិចត្រូនិច សម្ភារៈអគ្គិសនី ភេសជ្ជៈ ឱសថ និងផលិតប្លាស្ទិក មកកម្ពុជា ផងដែរ។
រដ្ឋលេខាធិការក្រសួងពាណិជ្ជកម្ម លោក ស៊ាង ថៃ បានបញ្ជាក់ដូច្នេះ៖«ទំនិញដែលគេនាំមកយើង ហើយទំនិញដែលយើងនាំទៅគេ គឺមានលក្ខណៈបំពេញឱ្យគ្នាទៅវិញទៅមក ហើយយើងនឹងខិតខំជំរុញការនាំចេញទំនិញដែលកែច្នៃពីផលិតផលកសិកម្ម»។
កាលពីឆ្នាំ២០២០ ទំហំពាណិជ្ជកម្មទ្វេភាគីរវាងប្រទេសទាំងពីរសម្រេចបានជាង៨៨៥លានដុល្លារអាមេរិក ពោលគឺមានការថយចុះជិត ១៨ភាគរយ ធៀបនឹងរយៈពេលដូចគ្នាកាលពីឆ្នាំ២០១៩ មានទំហំប្រមាណ១ពាន់លានដុល្លារ។ នេះបើតាមលោក ស៊ាង ថៃ ៕
© រក្សាសិទ្ធិដោយ thmeythmey.com