ជាតិ
កោះព្រហ្មចារី ជាសម្បត្តិទេសចរណ៍តាមដងទន្លេមេគង្គក្នុងខេត្តក្រចេះ
×
ដោយ៖ ហុង ស្រីណា
ភ្នំពេញ៖ កោះព្រហ្មចារី ជាសម្បុកទេសចរណ៍ដ៏សំខាន់របស់ «សហគមន៍អេកូទេសចរណ៍កោះព្រហ្មចារីយ៍ជ្រោយបន្ទាយ» ស្ថិតនៅ ឃុំជ្រោយបន្ទាយ ស្រុកព្រែកប្រសព្វ ខេត្តក្រចេះ។ ទីតាំងនោះ មានចម្ងាយប្រមាណតែ ១៧ គីឡូម៉ែត្រពីទីរួមខេត្ត។ឥឥឥ
ភ្ញៀវទេសចរ ដែលទៅលេងកម្សាន្តកោះព្រហ្មចារីយ៍ អាចទស្សនាទេសភាពដ៏ស្រស់ត្រកាលសម្បូរបែប ការទស្សនាសត្វផ្សោត វប្បធម៌ ប្រពៃណី ទំនៀមទម្លាប់ ការរស់នៅរបស់ប្រជាពលរដ្ឋនៅក្នុងសហគមន៍ និងទស្សនាសត្វក្ដាន់ ដែលជាសត្វកម្រហើយនៅមានវត្តមានក្នុងតំបន់នេះ។ ភ្ញៀវទេសចរ ក៏អាចជិះទូក កាណូត ដើម្បីរង់ចាំមើលសត្វផ្សោត និង ស្ទួចត្រី លេងកម្សាន្ត។
កោះនេះ ត្រូវបានមន្ទីរទេសចរណ៍ខេត្តក្រចេះ សហការជាមួយអង្គការ WWF រៀបចំបង្កើតសហគមន៍ថ្មីមួយឡើង ឈ្មោះជាផ្លូវការថា «សហគមន៍អេកូទេសចរណ៍កោះព្រហ្មចារីយ៍ជ្រោយបន្ទាយ»កាលពីថ្ងៃទី០២ ខែវិច្ឆិកា ឆ្នាំ២០២០ កន្លងទៅ ។
អនុមន្ទីរទេសចរណ៍ខេត្តក្រចេះ លោក ប៉ុន សំបូរ បានបញ្ជាក់ថា ការបង្កើតសហគមន៍នេះ ក្នុងគោលបំណង ផ្តល់ឱកាសឱ្យពលរដ្ឋមូលដ្ឋានមានសិទ្ធិអំណាចក្នុងការគ្រប់គ្រង និងចូលរួមចំណែកក្នុងការអភិវឌ្ឍសហគមន៍របស់ខ្លួន ព្រមទាំងអាចទទួលបានផលប្រយោជន៍ពីទេសចរណ៍។ ម្យ៉ាងវិញទៀត ជាការលើកកម្ពស់ជីវភាព កាត់បន្ថយការចំណាកស្រុក ពិសេសគឺដើម្បីចូលរួមការពារអភិរក្សធនធានធម្មជាតិនៅក្នុងតំបន់ មានដូចជាធនធានព្រៃឈើ សត្វព្រៃ ពិសេសគឺសត្វក្ដាន់ សត្វផ្សោតជាដើម។
ដំបូងឡើយ អ្នកស្រុកនៅទីនោះ ហៅកោះនេះថា «កោះយ៉ៃ» ប៉ុន្តែលោក ឡូយ សុផាត អតីតអភិបាលខេត្តក្រចេះ ដែលបានចុះទៅសិក្សាស្រាវជ្រាវនៅលើកោះនេះមុនគេ បានស្នើទៅលោក ថោង ខុន រដ្ឋមន្ត្រីក្រសួងទេសចរណ៍ ដាក់ឈ្មោះកោះនេះថា «កោះព្រហ្មចារីយ៍»។ មូលហេតុដែលអតីតអភិបាលខេត្តក្រសចេះរូបនេះ ស្នើសុំដាក់ឈ្មោះ «កោះព្រហ្មចារីយ៍» ដោយសារទីតាំងនោះ មានឆ្នេរខ្សាច់សស្អាត ដែលមិនទាន់មានការកែច្នៃ និងអភិវឌ្ឍន៍ប្រៀបបានដូចជា នារីក្រមុំ ៕
Tag:
កោះព្រហ្មចារី
ខេត្តក្រចេះ
© រក្សាសិទ្ធិដោយ thmeythmey.com