ជាតិ
×![]()
ដោយ៖ ប៉ូ សុភា
មន្ត្រីជំនាញអាជ្ញាធរជាតិអប្សរា បានទទួលយកវត្ថុបុរាណ៤ទម្រង់ ពីប្រជាពលរដ្ឋរស់នៅឃុំស្រែណូយខេត្តសៀមរាប ។ មន្ត្រីជំនាញ មិនទាន់អាចបញ្ជាក់ពីអាយុកាលនៃវត្ថុបុរាណនៅឡើយទេ។ នេះបើតាមមន្ត្រីទទួលបន្ទុកការងារចុះបញ្ជីវត្ថុសិល្បៈ នៃនាយកដ្ឋានអភិរក្សប្រាសាទក្នុងឧទ្យានអង្គរ។
វត្ថុបុរាណទាំងបួននោះរួមមាន ថ្មគោលធ្វើពីថ្មភក់ចំនួន១ ព្រះហស្ថឆ្វេងទេពស្រីធ្វើពីថ្មភក់១ ជើងទម្រចំនួន២ ។ ក្នុងនោះជើងទម្រមួយ មានចាជាអក្សរខ្មែរបុរាណចំនួន៤ជ្រុងនៅផ្ទៃចំហៀង។
លោក ឈូក សុម៉ាឡា បានបញ្ជាក់ថា វត្ថុទាំងនោះ ត្រូវបានពលរដ្ឋយកចេញពីទីតាំងដើម ក្នុងគោលបំណងរក្សាទុកបណ្តោះអាសន្ន ។ ប៉ុន្តែក្រុមការងារ បានស្នើសុំឱ្យពលរដ្ឋប្រគល់វត្ថុបុរាណនោះ មកអាជ្ញាធរជាតិអប្សរា ដើម្បីរក្សាទុក និងសិក្សាស្រាវជ្រាវ សម្រាប់ចុះបញ្ជីកំណត់អត្តសញ្ញាណវត្ថុបុរាណនោះផង។
ថ្លែងប្រាប់សារព័ត៌មានថ្មីៗ មន្ត្រីទទួលបន្ទុកការងារចុះបញ្ជីវត្ថុសិល្បៈរូបនេះ បានបញ្ជាក់ដូច្នេះថា៖« ដ្បិតនៅលើវត្ថុបុរាណខ្លះមានសិលាចរឹក និងឆ្នាំនៅលើនោះក្តី ប៉ុន្ដែមន្ត្រីជំនាញមិនទាន់អាចកំណត់ និងសន្និដ្ឋានអាយុកាលរបស់វត្ថុបុរាណទាំងនោះបានទេ។ ដោយពួកយើងត្រូវការចូលរួមពីអ្នកជំនាញសិលាចារិក ជាពិសេសអ្នកចេះភាសាសំស្ក្រឹត ដូច្នេះត្រូវការប្រើពេលយូរបន្តិច » ។
លោកឈូក សុម៉ាឡា ក៏ស្នើឱ្យពលរដ្ឋគ្រប់រូប ដែលរើសបានវត្ថុបុរាណ យកមកប្រគល់ឱ្យមន្ត្រីជំនាញរក្សាទុក នៅទីតាំងដែលមានសុវត្ថិភាព ចៀសវាងការផ្លាស់ប្តូរទីតាំង ដែលនាំឱ្យបាត់បង់ និងខូចខាត ៕
Tag:
វត្ថុបុរាណ
ពលរដ្ឋ
មន្ត្រីជំនាញ
ថ្មភក់
© រក្សាសិទ្ធិដោយ thmeythmey.com
