រដ្ឋសមាជិកនៃតុលាការព្រហ្មទណ្ឌអន្តរជាតិ (ICC) នឹងបោះឆ្នោតជ្រើសរើសអគ្គរដ្ឋអាជ្ញាថ្មី នៅថ្ងៃទី១៣ ខែកុម្ភៈ។ អគ្គរដ្ឋអាជ្ញានៃតុលាការនេះ មានបន្ទុកស៊ើបអង្កេត និងចោទប្រកាន់បុគ្គលជាប់សង្ស័យលើឧក្រិដ្ឋកម្មសង្គ្រាម ឧក្រិដ្ឋកម្មប្រល័យពូជសាសន៍ ឧក្រិដ្ឋកម្មប្រឆាំងមនុស្សជាតិ និងឧក្រិដ្ឋកម្មឈ្លានពាន។ ក្នុងតួនាទីនេះ លោកស្រី Fatou Bensouda ដែលត្រូវចប់អាណត្តិ ទទួលបានទាំងការកោតសរសើរ និងការរិះគន់។
បេក្ខជន៤រូប មកពីអង់គ្លេស អៀរឡង់ អ៊ីតាលី និងអេស្ប៉ាញ ដែលជាមេធាវី ចៅក្រម និងអ្នកជំនាញច្បាប់ នឹងត្រូវរដ្ឋសមាជិក ICC ជ្រើសតាំងឱ្យជំនួសតំណែងលោកស្រី Fatou Bensouda ដែលនឹងចប់អាណត្តិរយៈពេល៩ឆ្នាំ។ លោក Karim Khan បេក្ខជនអង់គ្លេស ត្រូវបានមើលឃើញថា នាំមុខលោក Carlos Castresana មកពីអេស្ប៉ាញ លោក Fergal Gaynor របស់អៀរឡង់ និងលោក Francesco Lo Voi មកពីអ៊ីតាលី។
លោក Khan ដែលជាអ្នកជំនាញសិទ្ធិមនុស្ស និងជាមេធាវី ធ្លាប់ការពារក្តីនៅ ICC ជាច្រើនដង។ ក្នុងនោះក៏មានផងដែរសំណុំរឿងរបស់លោក Seif al-Islam កូនប្រុសអតីតមេដឹកនាំលីប៊ី។ នាពេលថ្មីៗនេះ លោកកាន់តំណែងជាអ្នកស៊ើបអង្កេតពិសេសរបស់អង្គការសហប្រជាជាតិ (UN) ចំពោះឧក្រិដ្ឋកម្មដែលប្រព្រឹត្តឡើងដោយក្រុមរដ្ឋឥស្លាម និងអំពាវនាវឱ្យមានការកាត់ទោសបុគ្គលទាំងនោះ ដូចអ្វីដែលធ្លាប់ធ្វើក្រោយសង្គ្រាមលោកលើកទី២ទៅលើមេដឹកនាំអាល្លឺម៉ង់ និងជប៉ុន។
ចំណែកលោក Gaynor ធ្លាប់ការពារក្តីជនរងគ្រោះនៅ ICC ដែរចំពោះការស៊ើបអង្កេតសង្គ្រាមនៅអាហ្វហ្កានីស្ថាន និងសំណុំរឿងប្រឆាំងមេដឹកនាំកេនយ៉ា។ ចៅក្រមអេស្ប៉ាញ លោក Castresana ធ្លាប់កាន់តំណែងប្រធានក្រុមស្រាវជ្រាវ UN ក្នុងការប្រយុទ្ធប្រឆាំងទៅនឹងឧក្រិដ្ឋកម្ម និងអំពើពុករលួយនៅក្វាតេម៉ាឡា។ ចំណែកលោក Lo Voi រដ្ឋអាជ្ញាអ៊ីតាលី មានបទពិសោធកាត់ទោសមេដឹកនាំម៉ាហ្វៀអ៊ីតាលី និងបណ្តាញជួញដូរមនុស្សខុសច្បាប់។
រដ្ឋសមាជិក ICC ពុំអាចស្វែករកមតិរួមលើបេក្ខជនសមស្របឡើយ ទោះបីជាមានការព្យាយាមជាច្រើនដងក្តី។ រដ្ឋសមាជិកទាំង១២៣ នឹងត្រូវបោះឆ្នោតជ្រើសរើសអគ្គរដ្ឋអាជ្ញានៅ UN នាទីក្រុងញូវយ៉ក។ អគ្គរដ្ឋអាជ្ញាទី៣ នៃតុលាការនេះ នឹងត្រូវទទួលបន្ទុកលើកិច្ចការជាច្រើនបន្ថែមទៀត ហើយត្រូវការពារភាពស្របច្បាប់របស់តុលាការដែលតែងស្ថិតក្រោមការវាយប្រហារ។ តុលាការដែលចាប់ដំណើរការនៅឆ្នាំ២០០២ មានអគ្គរដ្ឋអាជ្ញាដំបូងសញ្ញាតិអាហ្សង់ទីន គឺលោ Luis Moreno-Ocampo ។
លោកស្រី Bensouda សញ្ជាតិហ្កំប៊ី នឹងត្រូវអស់អាណត្តិនៅខែមិថុនា បន្ទាប់ពីបម្រើការអស់រយៈពេល៩ឆ្នាំ។ អ្នកសង្កេតការណ៍មួយចំនួន អះអាងថា លោកស្រីសម្រេចការងារមួយចំនួនដោយជោគជ័យ និងខ្លះទៀតបរាជ័យ។ ក្នុងអាណត្តិលោកស្រី មេដឹកនាំកូតឌីវ័រ Laurent Gbagbo ត្រូវរួចខ្លួនក្នុងសំណុំរឿងឧក្រិដ្ឋកម្មប្រឆាំងមនុស្សជាតិ ចំណែកអតីតអនុប្រធានាធិបតីសាធារណរដ្ឋប្រជាធិបតេយ្យកុងហ្គោ ត្រូវបានរួចទោសក្នុងសាលាឧទ្ធរណ៍។ លោកស្រី ក៏ទម្លាក់ចោលបទចោទប្រឆាំងលោក Uhuruថ Kenyatta ចំពោះឧក្រិដ្ឋកម្មប្រឆាំងមនុស្សជាតិបណ្តាលមកពីជម្លោះបោះឆ្នោតនៅកេនយ៉ា។
ប៉ុន្តែលោកស្រីទទួលបានការសាទរ បន្ទាប់ពីតុលាការសម្រេចចោទប្រកាន់លោកមេដឹកនាំសង្គ្រាមនៅអ៊ូហ្កង់ដា និងកុងហ្គោចំពោះឧក្រិដ្ឋកម្មសង្គ្រាមស្តីពីទាហានជាកុមារ។ លោកស្រី Bensouda ក៏ទទួលបានការសសើរផងដែរចំពោះការធ្វើឱ្យប្រសើរឡើងការងារនៃការិយាល័យរដ្ឋអាជ្ញា។
លោកស្រី Bensouda ក៏ត្រូវអាមេរិកដាក់ទណ្ឌកម្មពាក់ព័ន្ធការស៊ើបអង្កេតឧក្រិដ្ឋសង្គ្រាមនៅអាហ្វហ្គានីស្ថាន។ ថ្មីៗនេះ លោកស្រីក៏ទទួលបានការអនុញ្ញាតឱ្យបើកការស៊ើបអង្កេតជម្លោះប្រដាប់អាវុធរវាងអ៊ីស្រាអែល និងប៉ាឡេស៊ីក្នុងឆ្នាំ២០១៤ ដែលជាអាចឧក្រិដ្ឋកម្មផងដែរ។ អគ្គរដ្ឋអាជ្ញាថ្មី នឹងត្រូវពិចារណាដំណាក់កាលបន្ទាប់ក្នុងការស៊ើបអង្កេតនៅអាហ្វហ្កានីស្ថាន និងជម្លោះប្រដាប់អាវុធអ៊ីស្រាអែល-ប៉ាឡេស្ទីន៕