អន្តរជាតិ
បាតុករមីយ៉ាន់ម៉ាវ័យក្មេងម្នាក់ដែលត្រូវប៉ូលិសបាញ់ចំក្បាល បានស្លាប់ហើយ បាតុករមីយ៉ាន់ម៉ាលើកបដាឧទ្ទិសដល់យុវតីដែលបានស្លាប់។ រូបថត AFP
× ស្ត្រីបាតុករវ័យក្មេងមួយរូបដែលសន្លប់ស្ដូកស្ដឹងក្រោយពេលប៉ូលិសបាញ់គ្រាប់កាំភ្លើងពិតចំក្បាលកាលពីថ្ងៃទី៩ ខែកុម្ភៈ បានស្លាប់ហើយនៅថ្ងៃទី១៩ ខែកុម្ភៈ។ មរណភាពរបស់ស្ត្រីបាតុករនេះ ជាករណីទីមួយចាប់តាំងពីបាតុកម្មផ្ទុះនៅថ្ងៃទី៥ ខែកុម្ភៈប្រឆាំងទៅនឹងរដ្ឋប្រហារយោធា។
កញ្ញា Mya Thwate Thwate Khaing ដែលទើបតែមានអាយុត្រឹមតែ២០ឆ្នាំ ត្រូវបានបាញ់ចំក្បាលអំឡុងពេលតវ៉ាមួយនៅថ្ងៃទី៩ ខែកុម្ភៈ។ នាងត្រូវបានបញ្ជូនទៅមន្ទីរពេទ្យបន្ទាប់ពីគ្រាប់កាំភ្លើងបាញ់ចូលក្នុងលលាដ៏ក្បាល ហើយបៀមជាប់ក្នុងនោះ។ គ្រូពេទ្យនិយាយថា នាងត្រូវការម៉ាស៊ីនដើម្បីជំនួយដង្ហើម និងមានសង្ឃឹមតិចតួចណាស់ក្នុងការរស់រានមានជីវិត ដោយស្ថានភាពរបស់របស់នាងមានសភាពធ្ងន់ធ្ងរខ្លាំង។
«ខ្ញុំកើតទុក្ខ និងមិនដឹងត្រូវនិយាយអ្វី»។ នេះជាការរៀបរាប់របស់លោក Ye Htut Aungដែលជាបងប្រុស ប្រាប់ទីភ្នាក់ងារព័ត៌មាន Reuters ។ ចំណែកមន្ទីរពេទ្យនៅទីក្រុងណៃពិដោ បញ្ជាក់ពីមរណភាពនេះនៅម៉ោង១១ ថ្ងៃទី១៩ ខែកុម្ភៈ។
លោក Zaw Min Tun អ្នកនាំពាក្យក្រុមយោធាបញ្ជាក់ថា កញ្ញា Mya Thwate Thwate Khaing ពិតជារងគ្រាប់កាំភ្លើង ហើយអាជ្ញាធរកំពុងស៊ើបអង្កេតលើករណីនេះ។ ក្នុងការទប់ទល់ការតវ៉ាកន្លងមក ប៉ូលិសមីយ៉ាន់ម៉ា បាញ់គ្រាប់កាំភ្លើងជ័រ និងពេលខ្លះគ្រាប់កាំភ្លើងពិតជាច្រើនដងដើម្បីបំបែកហ្វូងបាតុករ។ យោធាមីយ៉ាន់ម៉ា និយាយថា ប៉ូលិសមួយរូបក៏បានស្លាប់ដោយសារតែរងរបួសធ្ងន់ធ្ងរ។ ចំណែកនៅទីក្រុងខ្លះទៀត ប៉ូលិសប្រើដំបង និងខែលដែរ។
មរណភាពរបស់បាតុករវ័យ២០ឆ្នាំរូបនេះ ទំនងជាបញ្ឆឹះកំហឹងពលរដ្ឋមីយ៉ាន់ម៉ាបន្ថែមទៀត។ ថ្ងៃទី១៩ ខែកុម្ភៈ ជាសប្តាហ៍ទីពីរហើយដែលមានបាតុកម្មទ្រង់ទ្រាយធំតាមដងវិថី។ បាតុករវ័យ២៤ឆ្នាំ Nay Lin Htet និយាយថា ខ្លួនមានមោទកភាពនឹងកញ្ញា Mya Thwate Thwate Khaing និងសន្យាធ្វើបាតុកម្មរហូតដល់សម្រេចគោលបំណង ដោយមិនខ្វាយខ្វល់ពីសុវត្ថិភាពផ្ទាល់ខ្លួនឡើយ។
មន្ត្រីរាជការមួយចំនួន និងបុគ្គលិកវិស័យឯកជនពហិការមិនធ្វើការ ដែលនាំឱ្យដំណើរការពាណិជ្ជកម្ម និងការងារនៅស្ថាប័នរដ្ឋជាច្រើននៅនឹងថ្កល់។ ចំណែកឯទណ្ឌកម្មពីប្រទេសឯទៀតក៏ធ្លាក់មកជាបន្តបន្ទាប់ ដោយកាណាដា និងអង់គ្លេសសម្រចដាក់ទណ្ឌកម្មលើមេដឹកនាំយោធាមីយ៉ាន់ម៉ា នៅថ្ងៃទី១៩ ខែកុម្ភៈ។ ក្រោយការប្រកាសដាក់ទណ្ឌកម្មនេះ បាតុករមួយក្រុមតូចបានជួបជុំក្រៅស្ថានទូតអង់គ្លេសដោយអរគុណចំពោះការដាក់ទណ្ឌកម្មលើក្រុមយោធា។
ក្រុមយោធាមីយ៉ានម៉ា ពុំបរិយាយយ៉ាងណាលើការទណ្ឌកម្មឡើយ។ ប៉ុន្តែអះអាងកាលពីថ្ងៃទី១៦ ខែកុម្ភៈថា ខ្លួនរំពឹងថារឿងនេះនឹងកើតឡើង។ សហភាពអឺរ៉ុប នឹងប្រកាសពីទណ្ឌកម្មនៅថ្ងៃទី២២ ខែកុម្ភៈ។
ចាប់តាំងតែពីថ្ងៃទី១ ខែកុម្ភៈមនុស្សចំនួន៥២១នាក់ត្រូវបានឃាត់ខ្លួន ដែលក្នុងនោះមាន៤៤នាក់ត្រូវបានចាប់ខ្លួន។ នេះបើតាមរបាយការណ៍អង្គការផ្តល់ជំនួយដល់អ្នកទោសនយោបាយ៕
© រក្សាសិទ្ធិដោយ thmeythmey.com