ជាតិ
សិក្សាបច្ចេកទេសដាំពោត ដើម្បីទទួលបានទិន្នផលខ្ពស់
× ពោត ត្រូវបានគេចាត់ទុកជាគ្រាប់ធញ្ញជាតិសំខាន់បំផុត បន្ទាប់ពីដំណាំស្រូវ។ ពោត មានអត្ថប្រយោជន៍ច្រើន ទាំងសម្រាប់មនុស្ស និងសត្វ សម្បូរដោយជាតិទឹក ១០.៨ភាគរយ ប្រេង៤.៣ភាគរយ ប្រូតេអ៊ីន១០ភាគរយ កាបូអ៊ីត្រាត៧៣.៤ភាគរយ និងជាតិរ៉ែ១.៤ភាគរយ។
ដ្បិតពោតជាអាហារពេញនិយមសម្រាប់មនុស្សទូទៅ តែការដាំដុះដំណាំពោតក្នុងប្រទេស ហាក់មិនទាន់ទូលាយ ព្រោះការយល់ដឹងពីបច្ចេកទេសដាំដុះ របស់កសិករក៏នៅមានកម្រិត។ ថ្ងៃនេះសារព័ត៌មានThmeyThmey25 សូមដកស្រង់បច្ចេកទេសដាំដំណាំពោត ចេញពីសៀវបច្ចេកទេសកសិកម្ម របស់ក្រសួងកសិកម្ម ដល់កសិករដែលមានបំណងដាំដុះដំណាំពោត។
ការជ្រើសរើសពូជ៖ សម្រាប់ការជ្រើសរើសពូជ ត្រូវរើសគ្រាប់ពូជល្អ អាចផ្ដល់ទិន្នផលខ្ពស់ និងមានភាពសុទ្ធលើសពី ៩៥ភាគរយ។ កសិករត្រូវជ្រើសពូជដែលថ្មី ដែលមិនទុកច្រើនខែ ឬយូរឆ្នាំពេកនោះទេ និងត្រូវជ្រើសរើសពូជដែលធន់នឹងអាកាសធាតុ ជំងឺ និងការបំផ្លាញពីសត្វល្អិត។
ការរៀបចំដី៖ ត្រូវភ្ជួរដីឲ្យម៉ត់ រួចហាលចោលក្នុងរយៈពេល ៥-១៥ថ្ងៃ មុននឹងដាំ និងភ្ជួរ១-២ដងព្រោះជួយសម្លាប់ស្មៅចង្រៃ សត្វល្អិត និងបង្កើនខ្យល់ក្នុងដី។ ប៉ុន្តែនៅរដូវវស្សា មិនគួរធ្វើដីឲ្យម៉ត់ពេកទេ ព្រោះពេលភ្ញៀងអាចធ្វើឲ្យដីហាប់។ ដោយឡែកចំពោះការដាក់ជី អាចដាក់ជីទ្រាប់បាត និងពូនគល់ នៅពេលពោតចេញស្លឹក។
ការដាំ៖ សម្រាប់ដីមួយហិកតា គេប្រើគ្រាប់ពូជពី ២៥-៣០ គីឡូក្រាម។ មុនពេលដាំ គេត្រូវយកគ្រាប់ពោតទៅហាល រយៈពេល ១-២ថ្ងៃ ឲ្យស្ងួតល្អ បន្ទាប់មកយកគ្រាប់នោះ ទៅត្រាំទឹក ៤-៥ម៉ោង ទើបអាចយកទៅដាំបាន។ ការដាំពោតមាន ២របៀប គេអាចដាំដោយគុម្ព និងបុកដាំ ហើយត្រូវរៀបចំគម្លាតជួរ និងគុម្ពឲ្យបានត្រឹមត្រូវ។ សម្រាប់ចន្លោះគុម្ពល្អពី ៣០-៤០សង់ទីម៉ែត្រ ហើយចន្លោះជួរ ៧៥សង់ទីម៉ែត្រ។
ការថែទាំ៖ ក្រោយពេលដាំរយៈពេល ២-៣ថ្ងៃ ពោតចាប់ផ្ដើមចេញពន្លក បើឃើញគ្រាប់មិនដុះតិចតួច មិនចាំបាច់ជួសគ្រាប់នោះទេ តែបើពោតមិនដុះច្រើន ត្រូវជួសឲ្យបានឆាប់ ដើម្បីធានាចំនួនដើម និងបរិមាណ។ ក្រោយកូនពោតដុះបាន ១៥ថ្ងៃ ឬមានស្លឹក ៣-៤ និងមានកម្ពស់ ១០-១៥សង់ទីម៉ែត្រ គួរបំបែកកូនពោត ដោយទុកត្រឹម ១-២ដើមបានហើយ ក្នុងមួយគុម្ព។ ក្រោយបំបែកកូនពោត ត្រូវចាប់ផ្ដើមធ្វើស្មៅ ពូនគល់ ឲ្យបានញឹកញាប់ ដើម្បីឲ្យដីធូរ ពោតដុះបានល្អ និងដីមានខ្យល់ចេញចូលស្រួល។ ដំណាំពោត អាចប្រមូលផលបាន ក្រោយដាំដុះបានពី ៨៥-១១០ថ្ងៃ។
ជាទូទៅដំណាំពោត មិនសូវរើសរដូវកាលដាំដុះនោះទេ។ សម្រាប់ប្រទេសកម្ពុជា តំបន់ដែលដាំពោតបានល្អ គឺបណ្ដាខេត្តតាមដងទន្លេ ដូចជាកណ្ដាល ព្រៃវែង កំពង់ចាម ក្រចេះ កំពង់ឆ្នាំង និងតំបន់ដីក្រហម ៕
© រក្សាសិទ្ធិដោយ thmeythmey.com