សិស្សស្រី៥០នាក់ដួលសន្លប់ ក្រោយពីរៀបចំសែនព្រេន នៅក្នុងវិទ្យាល័យសំរោង នៃខេត្តសៀមរាប

ជាតិ

សង្គមជាតិ

សិស្សស្រី៥០នាក់ដួលសន្លប់ ក្រោយពីរៀបចំសែនព្រេន នៅក្នុងវិទ្យាល័យសំរោង នៃខេត្តសៀមរាប

06, Mar 2021 , 3:29 pm

រូបភាព

រូបពីមន្ទីរព័ត៌មានខេត្តសៀមរាប

ដោយ:

ភ្នំពេញ៖ សិស្សស្រីចំនួន៥០នាក់នៅវិទ្យាល័យសំរោង ឃុំសំរោង ស្រុកសូទ្រនិគម ខេត្តសៀមរាប បានដួលសន្លប់តៗគ្នា ក្រោយពីសាលារៀនបានរៀបចំកម្មវិធីសែនព្រេន។ នេះបើតាម លោក ម៉ក់ ប្រុស អភិបាលស្រុកសូទ្រនិគម ខេត្តសៀមរាប ដែលបានប្រាប់អ្នកសារព័ត៌មានថ្មីៗតាមទូរសព្ទ។

លោក ម៉ក់ ប្រុស អភិបាលស្រុកសូទ្រនិគម បានបញ្ជាក់ថា សិស្សស្រីចំនួន៥០នាក់នោះបានដួលសន្លប់តៗគ្នា ដោយសារមានអារម្មណ៍ភ័យស្លន់ស្លោ។ លោក ម៉ក់ ប្រុស បានពន្យល់ថា ហេតុការណ៍ដួលសន្លប់នេះ បានកើតឡើងតាំងពីថ្ងៃទី៥ ខែមីនា ដោយមានតែសិស្ស២ ទៅ៣នាក់ទេ ដែលមានអាការនេះ។

ដោយសារមានសិស្សដួលសន្លប់នេះ ទើបពលរដ្ឋក្នុងភូមិក៏បានរៀបចំការសែនព្រេននៅក្នុងសាលា នាព្រឹកថ្ងៃទី៦ ខែមីនានេះ ស្រាប់តែមានសិស្សស្រី៥០នាក់ បានដួលសន្លប់តៗគ្នាទៀត។ នេះបើតាមការបញ្ជាក់ពីអភិបាលស្រុកសូទ្រនិគម។

«ដំបូងមានសិស្សស្រីតែប៉ុន្មាននាក់ទេ ដែលមានអាការដួលសន្លប់។ រួចហើយមិត្តភក្តិគាត់ប៉ុន្មាននាក់ទៀតក៏មានអាការភ័យស្លន់ស្លោ អ្នកខ្លះក៏ងងឹតមុខ អ្នកខ្លះស្រែកយំ អ្នកខ្លះដួលសន្លប់តៗគ្នា។ តាមការបកស្រាយពីក្រុមគ្រូពេទ្យ ពួកគាត់គ្មានអាការធ្ងន់ធ្ងរទេ សូម្បីបរិមាណស្ករ សម្ពាធឈាម អុកស៊ីសែន របស់គាត់ធម្មតាទេ។ តាមគ្រូពេទ្យគាត់ថា សិស្សទាំងអស់នោះមានអារម្មណ៍ភ័យតៗគ្នា។ ប៉ុន្តែបើតាមជំនឿ អ្នកភូមិជឿថា ខ្មោចចូល»។ នេះជាការលើកឡើងរបស់លោក ម៉ក់ ប្រុស។

បើតាមអភិបាលស្រុកសូទ្រនិគម ក្រោយពីមានហេតុការណ៍នេះ សិស្សស្រីទាំង៥០នាក់នោះត្រូវដឹកទៅព្យាបាលនៅមណ្ឌលសុខភាពសំរោង។ បច្ចុប្បន្នពួកគេទាំងអស់នោះក៏បានធូរស្បើយ និងបានត្រឡប់ទៅគេហដ្ឋានវិញផងដែរ៕