ជាតិ
សង្គមជាតិ
រដ្ឋាភិបាលយកសណ្ឋាគារThe Great Duke សម្រាប់ព្យាបាលអ្នកជំងឺកូវីដ-១៩ សណ្ឋាគារ The Great Duke
× ភ្នំពេញ៖ ក្រោយពីមានអ្នកឆ្លងជំងឺកូវីដ-១៩រាតត្បាតកាន់តែខ្លាំង រដ្ឋាភិបាលបានសម្រេចយកសណ្ឋាគារ The Great Dukeធ្វើជាមន្ទីរពេទ្យសម្រាប់ពិនិត្យ ថែទាំ និងព្យាបាលអ្នកជំងឺកូវីដ-១៩ ក្នុងកម្រិតស្រាល។ នេះបើតាមសេចក្តីប្រកាស ដែលចុះហត្ថលេខាដោយលោក ម៉ម ប៊ុនហេង រដ្ឋមន្ត្រីក្រសួងសុខាភិបាល។
សេចក្តីប្រកាសរបស់ក្រសួងសុខាភិបាល បានបញ្ជាក់ថា ការដាក់ដំណើរការសណ្ឋាគារ The Great Duke ធ្វើជាមន្ទីរពេទ្យសម្រាប់ព្យាបាលអ្នកជំងឺកូវីដ-១៩ គឺដើម្បីផ្តល់លទ្ធភាពដល់ក្រសួងសុខាភិបាល ក្នុងការប្រមូលផ្តុំធនធានមនុស្ស សម្ភារបរិក្ខារ និងបច្ចេកទេសចាំបាច់ក្នុងការជួយសង្គ្រោះដល់អាយុជីវិតអ្នកជំងឺឲ្យទាន់ពេលវេលា និងទប់ស្កាត់ជំងឺកូវីដ-១៩កុំឲ្យរាតត្បាតខ្លាំង។
ក្រសួងសុខាភិបាលបានផ្តាំដល់ពលរដ្ឋដែលរស់នៅក្នុងក្បែរសណ្ឋាគារនេះ កុំមានការភ័យខ្លាច និងសូមឲ្យពលរដ្ឋបន្តគោរពតាមវិធានការអនាម័យរបស់ក្រសួងសុខាភិបាល។ បើតាមក្រសួង ទីតាំងព្យាបាលខាងលើនេះមានការគ្រប់គ្រងដោយសន្តិសុខរក្សាសណ្តាប់ធ្នាប់ និងអនុវត្តតាមវិធានការសុវត្ថិភាពយ៉ាងហ្មត់ចត់។
គួរបញ្ជាក់ថា នៅកម្ពុជាមានអ្នកឆ្លងសរុបចំនួន៩៨៧នាក់ហើយ ក្នុងនោះករណីសះស្បើយ មាន៥១០នាក់ រីឯអ្នកជំងឺក្នុងសហគមន៍២០កុម្ភៈ ឡើងដល់៤៧៧នាក់ហើយ៕
Tag:
កូវីដ-១៩
សណ្ឋាគារ
© រក្សាសិទ្ធិដោយ thmeythmey.com