កីឡាអន្តរជាតិ
អន្តរជាតិ
កំពូលកីឡាការិនីវាយកូនបាល់ជប៉ុន Osaka ក្លាយជាអ្នកបំផុសគំនិតស្ត្រីក្នុងវិស័យកីឡា
× Naomi Osaka កំពូលអ្នកវាយកូនបាល់លំដាប់លេខ១ពិភពលោក គឺជាកីឡាការិនីគំរូម្នាក់ ដែលបានបំផុសគំនិតស្ត្រីក្នុងវិស័យកីឡានៅជុំវិញពិភពលោក បន្ទាប់ពីនាងក្លាយជាម្ចាស់ជើងឯក Australian Open លើកទី២ នៅឆ្នាំ២០២១។ មិនតែប៉ុណ្ណោះនាង ក៏ក្លាយជានិមិត្តរូបរបស់អ្នកគាំទ្រ និងជាអ្នកប្រឆាំងនឹងការរើសអើង Black Lives Matter។ Osaka តែងតែចេញមុខតវ៉ានឹងការរំលោភសិទ្ធិ និងភាពអយុត្តិធម៌ ជាពិសេសក្នុងវិស័យកីឡា។
កីឡាករការិនីវាយកូនបាល់សញ្ជាតិជប៉ុនរូបនេះ កាន់តែលេចធ្លោខ្លាំងតាមរយៈការឈ្នះ Grand Slam ជាលើកទី៤ជាប់គ្នាក្នុងអាជីព ខណៈទើបមានអាយុ២៣ឆ្នាំ។ Osaka ជាគំរូសម្រាប់ស្ត្រីវ័យក្មេងនៅទូទាំងពិភពលោក ហើយនាងថែមទាំងសម្រេចចិត្តបង្កើតកម្មវិធីមួយ ដែលជួយដល់ក្មេងស្រីក្នុងវិស័យកីឡាទៀតផង។
ម្ចាស់ជើងឯក Australian Open ពីរសម័យកាលបានប្រាប់កាសែត EssentiallySports ថា៖ «ខ្ញុំមិនអាចស្រមៃថាតើជីវិតរបស់ខ្ញុំនឹងទៅជាយ៉ាងណានោះទេ បើគ្មានកីឡាវាយកូនបាល់ ដូច្នេះខ្ញុំបានសម្រេចចិត្តចាប់ផ្តើមគម្រោងមួយហៅថា Play Academy With Naomi Osaka។ គម្រោងនេះនឹងផ្តល់នូវការបំផុសគំនិតដល់ក្មេងស្រីៗឱ្យចូលរួមក្នុងកីឡា តាមរយៈការផ្តល់ឧបករណ៍ ធនធាន និងការលើកទឹកចិត្ត»។
Osaka បន្ថែមថា សព្វថ្ងៃគម្រោងដែលផ្តោតលើការលើកទឹកចិត្តក្មេងស្រីឱ្យបន្តលេងកីឡាកំពុងដំណើរការដំបូងនៅក្នុងប្រទេសជប៉ុន ហើយនឹងមានមហិច្ឆតាដើម្បីផ្សព្វផ្សាយឱ្យបានពាសពេញពិភពលោក។
ការបង្កើតគម្រោងនេះឡើង ក៏មានពាក់ព័ន្ធនឹងការលើកឡើងបែបរើសស្ត្រីរបស់អតីតប្រធានគណៈកម្មាធិការរៀបចំទីក្រុងតូក្យូឆ្នាំ ២០២០ លោក Yoshiro Mori ផងដែរ។ លោក Mori បានរិះគន់ស្ត្រីនាកិច្ចប្រជុំមួយថា«ស្រីនិយាយច្រើន» ហើយការនិយាយបែបនេះបានធ្វើឱ្យលោកត្រូវចុះចេញពីតំណែង។
Osaka ដែលមានឪពុកជាជនជាតិហៃទី និងម្តាយជប៉ុន បានប្រតិកម្មនឹងការរិះគន់ស្ត្រីរបស់លោក Mori ដោយនិយាយថានេះជាការលើកឡើងរបស់មនុស្សល្ងង់ខ្លៅ។ នាងពិតជាទទួលមិនបាននឹងការរិះគន់របស់មនុស្សប្រុសទៅលើនារីភេទបែបនេះឡើយ។
មិនត្រឹមតែបញ្ហាស្ត្រីឡើយ កីឡាការិនីវាយកូនបាល់លំដាប់ថ្នាក់ទី១ពិភពលោករូបនេះ តែងតែឈឺឆ្អាលនឹងភាពអយុត្តិធម៌ ការរើសអើងជាតិសាសន៍ និងព៍ណ៌សម្បុរស្បែកនៅក្នុងសង្គម និងក្នុងវិស័យកីឡាផងដែរ។ ក្នុងករណីប៉ូលិសស្បែកស បាញ់បុរសស្បែកខ្មៅ Jacob Blake ចំនួន៧គ្រាប់ កន្លងទៅ Osaka សុខចិត្តដកខ្លួនចេញពីការប្រកួតមួយនៅទឹកដីអាមេរិក ដើម្បីជាការតវ៉ា៕
Tag:
Naomi Osaka
International Women’s Day
© រក្សាសិទ្ធិដោយ thmeythmey.com