កីឡាអន្តរជាតិ
អន្តរជាតិ
Gerrard ជួយ Rangers ឈ្នះលីគកំពូលស្កុតឡែនលើកដំបូងក្នុងពេល១០ឆ្នាំ
× Steven Gerrard ដឹកនាំក្រុម Rangers ឈ្នះពានលីគកំពូលស្កុតឡែន Premiership ជាលើកដំបូងក្នុងរយៈពេល១០ឆ្នាំចុងក្រោយ បន្ទាប់ពីមានពិន្ទុនាំមុខដាច់នៅរដូវកាល ២០២០-២១នេះ។
លទ្ធផលជោគជ័យនេះ កើតឡើងក្រោយម្ចាស់ការពារជើងឯក Celtic ប្រកួតស្មើ ០-០ ជាមួយ Dundee United នាជំនួបសប្តាហ៍ទី៣២ នៅយប់ថ្ងៃទី៧ ខែមីនា។ Rangers រកបាន៨៨ពិន្ទុ នាំមុខក្រុមលេខ២ Celtic ចំនួន២០ពិន្ទុ ខណៈការប្រកួតសល់៦លើកទៀតប៉ុណ្ណោះ។
នេះជាសមិទ្ធផលជាប្រវត្តិសាស្ត្រលើកដំបូងរបស់ Steven Gerrard ចាប់តាំងពីអតីតប្រធានក្រុម Liverpool និងជម្រើសជាតិអង់គ្លេស ចូលកាន់តំណែងជាអ្នកចាត់ការទូទៅ Rangers នៅឆ្នាំ២០១៨។
ការលើកពានលីគកំពូលស្កុតឡែននេះដែរ បាននាំ Rangers ពង្រីកកំណត់ត្រាពិភពលោករបស់ខ្លួនក្នុងការឈ្នះជើងឯកច្រើនជាងគេចំនួន ៥៥ លើក ដោយលើសគូប្រជែង Celtic ៤លើក។ យ៉ាងណា Celtic ជាក្លិបដំបូងគេនៅស្កុតឡែនដែលឈ្នះលីគកំពូល ១០រដូវកាលជាប់ៗគ្នា។
ក្រោមការដឹកនាំរបស់ Gerrard ក្រុម Rangers មិនទាន់ស្គាល់ចាញ់ទាល់តែសោះក្នុងការប្រកួតលីគចំនួន៣២លើករដូវកាលនេះ និងឈ្នះក្នុងដីគ្រប់ការប្រកួតទាំងម្តង។
តាមរយៈជោគជ័យនេះ អ្នកចាត់ការសញ្ជាតិអង់គ្លេស វ័យ៤០ឆ្នាំ បានបង្ហាញក្តីរីករាយ និងមោទកភាពចំពោះខ្លួនឯងលើដំណើរអាជីពដឹកនាំក្រុមបាល់ទាត់នេះ។ លើវេបសាយផ្លូវការរបស់ក្លិប Gerrard រៀបរាប់ថា៖ « ខ្ញុំពិតជាមានអារម្មណ៍រំភើបខ្លាំងណាស់ ហើយនេះជាដំណើរលើផ្លូវដ៏អស្ចារ្យ។ ខ្ញុំពិតជាមានមោទកភាពណាស់»។
ខណៈនៅសល់៦ប្រកួតទៀត នឹងបញ្ចប់ការប្រកួតលីគជាផ្លូវការ Gerrard សំណូមពរកូនក្រុមខ្លួនប្រឹងប្រែងបន្ថែមទៀត ក្នុងការជួយក្រុម Rangers ដើម្បីរក្សាភាពមិនចាញ់ពេញមួយរដូវកាល ២០២០-២១ នេះតែម្តង៕
Tag:
Steven Gerrard
Rangers
Premiership
© រក្សាសិទ្ធិដោយ thmeythmey.com