លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានបញ្ជាក់នៅក្នុងសេចក្តីជូនដំណឹង នាថ្ងៃទី១១ មីនានេះថា អំឡុងបិទសាលាបណ្តោះអាសន្ននេះ សិស្សានុសិស្សនឹងបន្តការរៀនតាមអនឡាញវិញ។

 

គិតត្រឹមពេលនេះ មានរាជធានីភ្នំពេញ កណ្តាល និងព្រៃវែង ដែលផ្អាកសាលារៀនរដ្ឋ និងឯកជន រួមទាំងគ្រឹះស្ថានអប់រំបណ្តុះបណ្តាលបច្ចេកទេសទាំងអស់។ ចំណែកនៅព្រះសីហនុ និងសៀមរាប គឺគ្រាន់តែផ្អាកសាលារៀនមួយចំនួន ដែលពាក់ព័ន្ធនឹងព្រឹត្តិការណ៍សហគមន៍២០កុម្ភៈ។ ចំពោះខេត្តកំពង់ចាម និងកោះកុង ដែលជាខេត្តគំរាមកំហែងពីជំងឺកូវីដ-១៩ដែរនោះ គឺគ្រាន់តែមានការផ្អាកគ្រឹះស្ថានអប់រំបណ្តុះបណ្តាលបច្ចេកទេស ប៉ុន្តែមិនទាន់មានការផ្អាកសាលារៀននៅឡើយទេ។

 

បច្ចុប្បន្នជំងឺកូវីដ-១៩ បានឆ្លងរាលដាលដល់ខេត្តចំនួន១០ហើយ ដែលផ្តើមពីរាជធានីភ្នំពេញ បន្តទៅខេត្តកណ្តាល ព្រះសីហនុ ព្រៃវែង  កោះកុង ស្វាយរៀង កំពង់ធំ កំពង់ចាម សៀមរាប និងបាត់ដំបង។ 

 

មកដល់ពេលនេះ កម្ពុជាមានអ្នកឆ្លងជំងឺកូវីដ-១៩សរុប ១១៦៣នាក់ ក្នុងនោះមាន៦៥២នាក់ជាករណីសហគមន៍២០កុម្ភៈ។ អ្នកជាសះស្បើយមានចំនួន៥៩៧នាក់៕