ជាការបោះជំហានទៅរកគោលដៅ «មានតែអ្នកស្នេហាជាតិគ្រប់គ្រងហុងកុង» សភាប្រជាជនចិន បានបោះឆ្នោតអនុម័តផែនការកែទម្រង់ប្រព័ន្ធបោះឆ្នោតនៅហុងកុង។ ក្នុងចំណោមសមាជិកមានវត្តមានប្រជុំចំនួន២៨៩៦នាក់ តែមានសមាជិកម្នាក់ប៉ុណ្ណោះបោះឆ្នោតអនុប្បវាទលើសេចក្ដីសម្រេចនេះ។
 

កិច្ចប្រជុំសភាប្រជាជនចិន បានលើកឡើងថា ប្រព័ន្ធបោះឆ្នោតហុងកុងត្រូវតែសមស្របទៅនឹងអធិបតេយ្យជាតិចិន ការរក្សាផលប្រយោជន៍ វិបុលភាព និងស្ថិរភាពហុងកុង ក៏ដូចជាស្របទៅតាមច្បាប់សន្តិសុខជាតិហុងកុង។ សភាចិនសង្កត់ធ្ងន់ថា អ្នកគ្រប់គ្រង និងដឹកនាំហុងកុងត្រូវតែជាមនុស្សសេ្នហាជាតិចិន និងគាំទ្រគោលនយោបាយប្រទេសមួយប្រព័ន្ធពីរ។

ក្នុងសន្និសីទសារព័ត៌មានបញ្ចប់កិច្ចប្រជុំសភា នាថ្ងៃទី១១ ខែមីនា លោក លី ខឹឈាំង នាយករដ្ឋមន្ត្រីចិនលើកឡើងថា ហុងកុងត្រូវការកែប្រែប្រព័ន្ធបោះឆ្នោតដើម្បីធានាស្ថិរភាពនៃការអភិវឌ្ឍ ហើយហុងកុងត្រូវតែគ្រប់គ្រងដោយអ្នកស្នេហាជាតិ។
 

សេចក្តីសម្រេចដែលទើបអនុម័តនេះ តម្រូវឱ្យហុងកុងបង្កើតគណៈកម្មាធិការបោះឆ្នោតមួយដែលមានប្រតិភូចំនួន១,៥០០នាក់។ ប្រតិភូទាំងនោះ នឹងទទួលខុសត្រូវលើការបោះឆ្នោតជ្រើសរើសប្រមុខតំបន់ហុងកុង ក៏ដូចជាសមាជិកសភាហុងកុងមួយចំនួនផងដែរ។ គណៈកម្មាធិការនេះ ក៏ទទួលបន្ទុកក្នុងការស្នើបេក្ខជនសម្រាប់ការបោះឆ្នោតតំណាងរាស្ត្រសភាហុងកុង និងបេក្ខជនសម្រាប់តំណែងប្រមុខតំបន់នេះផងដែរ។ នេះបើតាមទីភ្នាក់ងារព័ត៌មានចិន Xinhua។
 

ប្រតិភូទាំង១,៥០០រូបនេះមានសមាសភាពមកពីវិស័យផ្សេងៗរបស់ក្រុងហុងកុងមានឧស្សាហកម្ម ពាណិជ្ជកម្ម ហិរញ្ញវត្ថុ និងអ្នកជំនាញវិជ្ជាជីវៈ ពលរដ្ឋមូលដ្ឋាន ពលករ និងបុព្វជិតសាសនាជាដើម។ បន្ថែមពីនេះតំណាងរាស្ត្រ តំណាងក្រុមប្រឹក្សាសង្កាត់ តំណាងរាស្ត្រហុងកុងប្រចាំសភាប្រជាជនចិន តំណាងហុងកុងក្នុងគណៈកម្មធិការសន្និសីទពិគ្រោះយោបល់នយោបាយប្រជាជនចិន និងតំណាងហុងកុងនាស្ថាប័នជាតិផ្សេងទៀតក៏ ជាសមាសភាពប្រតិភូនេះផងដែរ។
 

ចំពោះតំណែងនាយកប្រតិបត្តិហុងកុងវិញ បេក្ខជននឹងត្រូវជ្រើសតាំងដោយរដ្ឋាភិបាលមជ្ឈិមចិន ក្រោយការបោះឆ្នោតយល់ព្រមដោយគណៈកម្មាធិការបោះឆ្នោតហុងកុង។ បេក្ខជនសម្រាប់តំណែងនេះ ត្រូវតែស្នើឡើងរួមគ្នាដោយប្រតិភូយ៉ាងហោចណាស់ចំនួន១៨៨ ក្នុងនោះប្រតិភូយ៉ាងតិចណាស់ចំនួន១៥ពីវិស័យនីមួយៗក្នុងហុងកុង។ ការបោះឆ្នោតត្រូវធ្វើឡើងដោយសម្ងាត់ ហើយប្រតិភូម្នាក់មានសំឡេងមួយស្មើគ្នា។
 

សភាហុងកុងដែលធ្លាប់តែមានសមាជិកចំនួន៧០រូប នឹងត្រូវបង្កើនដល់៩០រូប ដោយតំណាងរាស្ត្រនឹងត្រូវជ្រើសចេញពីការបោះឆ្នោតដោយផ្ទាល់ផង តែងតាំងដោយគណៈកម្មាធិការបោះឆ្នោតផង និងតំណាងរាស្ត្រដែលតំណាងឱ្យវិស័យនានានៅក្នុងតំបន់ពាក់កណ្តាលស្វ័យភាពមួយនេះ។
 

បន្ថែមពីនេះ គណៈកម្មាធិការមួយក៏ត្រូវបង្កើតឡើងផងដែរសម្រាប់ពិនិត្យលើលក្ខខណ្ឌ និងផ្តល់ការយលព្រមដល់សំណើរសុំឈរឈ្មោះបេក្ខជនតំណាងរាស្ត្រ និងប្រមុខតំបន់ហុងកុង។ បានន័យថា អ្នកនយោបាយដែលមាននិន្នាការប្រឆាំង ទំនងជាមិនអាចឆ្លងផុតលក្ខខណ្ឌថ្មីឡើយ ដែលការណ៍នឹងនាំដល់ការថយចុះសំឡេងប្រឆាំងប៉េកាំងនៅហុងកុងតែម្ដង៕