អន្តរជាតិ
នយោបាយអន្តរជាតិ
បាតុករមីយ៉ាន់ម៉ា១២នាក់ទៀតស្លាប់ក្នុងពេលតវ៉ា ខណៈមេដឹកនាំស៊ីវិលភៀសខ្លួនប្រកាសតស៊ូ
× យ៉ាងហោចណាស់មនុស្ស១២នាក់ទៀត បានបាត់បង់ជីវិតក្នុងការតវ៉ាប្រឆាំងរដ្ឋប្រហារយោធានៅមីយ៉ាន់ម៉ានៅថ្ងៃទី១៣ ខែមីនា។ ខណៈបាតុកម្មនៅតែធ្វើឡើងទោះមានការបង្ក្រាបចាស់ដៃពីសំណាក់កម្លាំងសន្តិសុខ មេដឹកនាំរដ្ឋាភិបាលស៊ីវិលស្រមោលដែលកំពុងភៀសខ្លួន ក៏ប្រកាសការតស៊ូមួយដើម្បីបញ្ចប់របបយោធា និងទៅបង្កើតរដ្ឋាភិបាលស្របច្បាប់ថ្មីមួយ។
បាតុកម្មប្រឆាំងរបបសឹកមីយ៉ាន់ម៉ា នៅតែសន្ទុះខ្លាំងនៅទូទាំងប្រទេស បើទោះជាកម្លាំងសន្តិសុខប្រើវិធីសាស្ត្រកាន់តែហិង្សាក្នុងការបោសសម្អាតក្ដី។ បាតុករយ៉ាងតិចណាស់១២នាក់ ត្រូវបានរាយការណ៍ថា បានស្លាប់ក្នុងការប៉ះទង្គិចជាមួយកម្លាំងប៉ូលិសនៅទីក្រុងនានារបស់មីយ៉ាន់ម៉ានៅថ្ងៃទី១៣ ខែមីនា។ សាក្សីជាច្រើនប្រាប់ទីភ្នាក់ងារព័ត៌មាន Reuters ថា មនុស្ស៥នាក់ស្លាប់ និងជាច្រើននាក់រងរបួសក្រោយប៉ូលិសបាញ់រះលើការតវ៉ានៅទីក្រុង Mandalay ។
បើតាមសារព័ត៌មានក្នុងស្រុកនានា មនុស្សម្នាក់បានស្លាប់ក្នុងទីក្រុងភាគកណ្ដាល Pyay ។ នៅទីក្រុងនេះដដែល មនុស្សម្នាក់ទៀតក៏ស្លាប់ក្រោយប៉ូលិសរារាំងឡានសង្គ្រោះបន្ទាន់។ មនុស្ស៥នាក់ទៀតស្លាប់ក្នុងទីក្រុងយ៉ាំងហ្គោន។ របបយោធាមិននិយាយអ្វីពីករណីទាំងនេះ ប៉ុន្តែទូរទស្សន៍រដ្ឋ MRTV ចាត់ទុកបាតុករជាឧក្រិដ្ឋជន។
ស្របពេលបាតុកម្មធ្វើឡើងទូទាំងប្រទេសនេះ មេដឹកនាំស៊ីវិលដែលកំពុងរត់គេចខ្លួនក្រោយរដ្ឋប្រហារថ្ងៃទី១ ខែកុម្ភៈ ក៏ប្រកាសការតស៊ូមួយដើម្បីផ្ដួលរំលំក្រុមយោធាកំពុងកាន់អំណាច។ លោក Mahn Win Khaing Than ដែលត្រូវបានតែងតាំងជាអនុប្រធានាធិបតីស្តីទី ចេញមុខធ្វើសេចក្ដីថ្លែងការណ៍ជាសាធារណៈលើកដំបូងនៅថ្ងៃទី១៣ ខែមីនា ដោយចាត់ទុកអ្វីដែលកើតឡើងជាពេលខ្មៅងងឹតរបស់ប្រទេស។
លោក Mahn Win Khaing Than មន្ត្រីជាន់ខ្ពស់បក្សសម្ពន្ធជាតិដើម្បីប្រជាធិបតេយ្យ (NLD) ត្រូវបានតែងដោយគណៈកម្មាធិការតំណាងសភាសហភាព (CRPH) ដែលជាក្រុមសមាជិកសភាមុនរដ្ឋប្រហារ។ គណៈកម្មាធិការនេះ ក៏បង្កើនរដ្ឋាភិបាលមួយដែលកំពុងស្វែងរកការទទួលស្គាល់ពីអន្តរជាតិ។ មេដឹកនាំគណៈកម្មាធិការនេះ បានជួបជាមួយមេដឹកនាំក្រុមភាគតិចប្រដាប់អាវុធនានាដើម្បីជជែកពីការបង្កើតប្រជាធិបតេយ្យបែបសហព័ន្ធ។
«ដើម្បីសម្រេចបានគោលដៅដែលជនភាគតិចទាំងអស់ចង់បាន បដិវត្តន៍នេះ ជាឱកាសសម្រាប់យើងប្រមូលផ្ដុំការប្រឹងប្រែងទាំងអស់គ្នា។» លោក Mahn Win Khaing Than និយាយបែបតាមបណ្ដាញសង្គម Facebook ចេញពីកន្លែងសម្ងាត់មួយ។
បើតាមមេដឹកនាំរដ្ឋាភិបាលស្រមោលរូបនេះ CRPH នឹងបង្កើតច្បាប់ថ្មីដើម្បីអនុញ្ញាតឱ្យប្រជាជនអាចការពារខ្លួនបាន ហើយការដឹកនាំរដ្ឋ នឹងគ្រប់គ្រងដោយក្រុមស៊ីវិលមួយក្រុមផងដែរ៕
© រក្សាសិទ្ធិដោយ thmeythmey.com