លោក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញ ប្រាប់សារព័ត៌មានថ្មីៗ ថា ក្នុងអំឡុងមន្រ្តីនគរបាលទាំងអស់នៅប៉ុស្តិ៍រដ្ឋបាលស្រះចក ត្រូវធ្វើចត្តាឡីស័ក ស្នងការដ្ឋាននគរបាលរាជធានីភ្នំពេញ បានធ្វើលិខិតស្នើទៅប៉ុស្តិ៍នគរបាលដទៃ ដើម្បីឲ្យបែងចែកមន្រ្តីនគរបាល ទៅបំពេញការងារជំនួស នៅប៉ុស្តិ៍រដ្ឋបាលស្រះចក។ 

លោក មានប្រសាសន៍ថា៖«ការងាររបស់សមត្ថកិច្ច ជាពិសេសនគរបាលប៉ុស្តិ៍គឺចាំបាច់ ត្រូវការបម្រើសេវាប្រជាពលរដ្ឋជាប្រចាំ។ អ៊ីចឹង យើង មិនអាចអត់បានទេ យើងមានកម្លាំងត្រៀមដើម្បីរៀបចំចាត់ចែង ជំនួសអ្នកដែលកំពុងធ្វើចត្តាឡីស័ក»។ 
 

អ្នកនាំពាក្យស្នងការដ្ឋាននគរបាលរាជធានីភ្នំពេញ អះអាងថា មន្រ្តីនគរបាលទាំង១៧នាក់នោះ បានធ្វើតេស្តម្ដងរួចមកហើយ ដោយលទ្ធផល គឺអវិជ្ជមាន។ លោក បន្តថា មន្រ្តីនគរបាលទាំងនោះ រង់ចាំលទ្ធផលតេស្តលើកទី២ទៀត៕