តាមរយៈជ័យជម្នះដោយលទ្ធផលច្រើនសន្ធឹកនេះ ជប៉ុនត្រូវការឈ្នះមីយ៉ាន់មួយប្រកួតទៀតប៉ុណ្ណោះនៅពូល F នោះពួកគេនឹងឈានទៅកាន់ការប្រកួតជម្រុះជុំទី៣បន្តទៀត ដើម្បីឆ្ពោះទៅ World Cup ឆ្នាំ ២០២២ នៅប្រទេសកាតា។ 
 

កីឡាករ Yuya Osako បានស៊ុតបាល់បញ្ចូលទីចំនួន៣គ្រាប់ម្នាក់ឯង (hat-trick) ខណៈ Takumi Minamino ខ្សែបម្រើ Southampton ក៏ស្ថិតក្នុងចំណោមអ្នករកគ្រាប់បាល់ទាំង៨រូបរបស់ជប៉ុនផងដែរ។ Khash-Erdene Tuya កីឡាករម៉ុងហ្គោលី ធ្វើឱ្យបាល់ចូលទីខ្លួនឯងក្នុងចំណោមគ្រាប់បាល់ទាំង១៤គ្រាប់របស់ជប៉ុន។
 

ជប៉ុនដែលនឹងត្រូវជួបមីយ៉ាន់ម៉ានៅថ្ងៃទី៣ ខែមិថុនា រកបាន១៥ពិន្ទុពេញ ពីការប្រកួត៥លើក ឈរកំពូលតារាងពូល F តាមពីក្រោយដោយ តាជីគីស្ថានដែលមាន១០ពិន្ទុ។ សាធារណរដ្ឋគៀហ្សីស៊ីស្ថាន នៅលេខ៣ មាន៧ពិន្ទុ មីយ៉ាន់ម៉ារកបាន៦ពិន្ទុស្ថិតនៅចំណាត់ថ្នាក់ទី៤ និងម៉ុងហ្គោលីនៅបាតតារាងមាន៣ពិន្ទុ។ 
 

នៅវគ្គជម្រុះតំបន់អាស៊ីនេះដែរ កម្ពុជាដែលអស់ឱកាសទៅហើយនឹងត្រូវធ្វើដំណើរទៅជួបបារ៉ែននៅថ្ងៃទី៣ ខែមិថុនា មុនជួបអ៊ីរ៉ាក់នៅ៤ថ្ងៃបន្ទាប់ និងជំនួបបង្គ្រប់កិច្ចចុងក្រោយប៉ះអ៊ីរ៉ង់នៅថ្ងៃទី១១ ខែមិថុនា។
 

ដោយឡែកការប្រកួតនៅតំបន់អាមេរិកកណ្តាលឯណោះវិញ កាណាដាដែលស្ថិតនៅពូល B រកបានជ័យជម្នះលើកទី២របស់ខ្លួនដោយយកឈ្នះកោះកៃម៉ាដល់ទៅ ១១-០។ កាណាដាឈរកំពូលតារាងមាន៦ពិន្ទុ ស្មើជាមួយក្រុមលេខ២ សូរីណាម ខណៈប៊ឺមូដានៅលេខ៣មាន៣ពិន្ទុ តាមពីក្រោយដោយអារូបា និងកោះកៃម៉ាដែលគ្មានពិន្ទុរាប់៕