COVID-19
ជាតិ
ការចាក់វ៉ាក់សាំងកូវីដ-១៩ អាចក្លាយជាកាតព្វកិច្ចសម្រាប់ក្រុមមនុស្សមួយចំនួន
×![]()
ដោយ: សារព័ត៌មានថ្មីៗ
ការចាក់វ៉ាក់សាំងបង្ការជំងឺកូវីដ-១៩ អាចនឹងក្លាយជាកាតព្វកិច្ចសម្រាប់ក្រុមមនុស្សចំនួន នៅក្នុងពេលខាងមុខ។ យោងតាមមាត្រា ១៦ នៃអនុក្រឹតស្តីពីវិធានការសុខាភិបាល ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត ការចាក់វ៉ាក់សាំងការពារជំងឺកូវីដ-១៩ ត្រូវធ្វើឡើងតាមគោលការណ៍ស្ម័គ្រចិត្ត ហើយត្រូវចាក់ជូនពលរដ្ឋកម្ពុជាដោយឥតគិតថ្លៃ។ ប៉ុន្តែការចាក់វ៉ាក់សាំង អាចត្រូវធ្វើឡើងជាចាំបាច់ចំពោះបុគ្គលមួយចំនួន ដោយផ្អែកលើស្ថានភាពការងារ ឬស្ថានភាពនៃមុខរបររបស់បុគ្គលនោះ តាមការកំណត់របស់ក្រសួងសុខាភិបាល។ នេះបើតាមមាត្រា១៦ដដែល។
ក្នុងករណីចាំបាច់ ក្រសួងអាចដាក់ចេញវិធានការមត្រូវឱ្យអ្នកដំណើរជាជនបរទេស ដែលធ្វើដំណើរចូលមកក្នុងកម្ពុជា ត្រូវមានបណ្ណបញ្ជាក់ពីការចាក់វ៉ាក់សាំងបង្ការជំងឺកូវីដ-១៩ពេញលេញ។ ការទទួលស្គាល់បណ្ណចាក់វ៉ាក់សាំងបង្ការជំងឺកូវីដ-១៩ ជាសមត្ថកិច្ចរបស់ក្រសួងសុខាភិបាល។ នេះបើតាមមាត្រាដដែល ដោយមាត្រានេះបានចែងទៀតថា បុគ្គលដែលទទួលបានវ៉ាក់សាំងកូវីដ-១៩ត្រឹមត្រូវតាមការកំណត់របស់ក្រសួងសុខាភិបាល អាចទទួលបានការអនុគ្រោះ ក្នុងការអនុវត្តកាតព្វកិច្ចក្នុងវិធានសុខាភិបាល ដែលកំណត់ដោយក្រសួងសុខាភិបាល។
ទាក់ទងនឹងការចាក់វ៉ាក់សាំងនេះដែរ សម្តេច ហ៊ុន សែន ក៏បានគិតទុកមុនដែរថា ការចាក់វ៉ាក់សាំងបង្ការជំងឺកូវីដ-១៩ អាចក្លាយជាកាតព្វកិច្ចចំពោះបុគ្គលិកក្រុមហ៊ុន កម្មករកម្មការិនីរោងចក្រមួយចំនួន។ តាមរយៈសារសំឡេងជិត១០នាទី នៅយប់ថ្ងៃទី ៦មេសានេះ ប្រមុខរដ្ឋាភិបាល បានបន្តថា បុគ្គលិកសហគ្រាស និងកម្មកររោងចក្រជាដើម អាចមិនត្រូវអនុញ្ញាតឱ្យចូលធ្វើការនោះទេ ប្រសិនពួកគេមិនបានចាក់វ៉ាក់សាំងបង្ការជំងឺកូវីដ-១៩ នៅពេលដែលរោងចក្រសហគ្រាសនោះបើកដំណើរការឡើងវិញ ហើយស្របពេលដែលមនុស្សភាគច្រើនបានចាក់វ៉ាក់សាំងបង្ការហើយនោះ។
ក្រៅពីបុគ្គលិកចាស់ ការជ្រើសរើសបុគ្គលិកថ្មីឱ្យចូលធ្វើការនៅក្នុងរោងចក្រ សហគ្រាសទាំងនោះ ក៏ទំនងតម្រូវឱ្យពួកគាត់មានបណ្ណបញ្ជាក់ពីការចាក់វ៉ាក់សាំងកូវីដ-១៩ ផងដែរ។ នេះបើតាមប្រសាសន៍ប៉ាន់ស្មានរបស់សម្តេច ហ៊ុន សែន ។
ក្រៅពីថ្លែងដូច្នេះ នៅក្នុងសារសំឡេងដដែលនោះសម្តេច នាយករដ្ឋមន្ត្រី បានស្នើឱ្យគណៈកម្មការចំពោះកិច្ចសម្រាប់ការងារវ៉ាក់សាំង ធ្វើផែនការសម្រាប់ការចាក់វ៉ាក់សាំងបន្ត ដល់ពលរដ្ឋទាំងអស់ដែលរស់នៅក្នុងរាជធានីភ្នំពេញ និងខេត្តកណ្តាល។ តាមសម្តេច ហ៊ុន សែន ការផ្តល់អាទិភាពដល់អ្នកនៅភ្នំពេញ និងខេត្តកណ្តាលនេះ គឺដើម្បីបង្កើតឱ្យមានភាពសាំកាន់តែច្រើន នៅភូមិសាស្ត្រប្រមូលផ្តុំ ដែលមានហានិភ័យឆ្លងខ្ពស់ ដូចភ្នំពេញ និងខេត្តកណ្តាលនេះ។ «ខ្ញុំសុំឱ្យគណៈកម្មការចំពោះកិច្ច សម្រាប់ការងារវ៉ាក់សាំង ធ្វើផែនការរៀបចំសម្រាប់ការចាក់វ៉ាក់សាំងបន្ត នៅពេលដែលវ៉ាក់សាំងថ្មីមកដល់ គឺសំដៅឆ្ពោះលើភូមិសាស្ត្រភ្នំពេញ និងខេត្តកណ្តាល ដែលជាប់នឹងទីក្រុងភ្នំពេញតែម្តង។ បើយើងមិនធ្វើដូច្នោះទេ យើងដាក់ត្រង់នេះបន្តិច ត្រង់នោះបន្តិច គឺភាពសាំនេះ មិនគ្រប់គ្រាន់ទេ»។
គួរកត់សម្គាល់ថា បច្ចុប្បន្នមានមនុស្សអាទិភាពជាង៦៣ម៉ឺននាក់ហើយ បានចាក់វ៉ាក់សាំងបង្ការជំងឺកូវីដ-៩។ កម្ពុជា បានចាប់ផ្តើមយន្តនាការចាក់វ៉ាក់សាំង ក្រោមគោលការណ៍ស្ម័គ្រចិត្ត គឺវ៉ាក់សាំងរបស់ក្រុមហ៊ុន Sinopharm ចំពោះមនុស្សវ័យពី ១៨ឆ្នាំ ដល់ ៥៩ឆ្នាំ តាំងពីថ្ងៃទី១០កុម្ភៈ ឆ្នាំ២០២១។ មកដល់ ថ្ងៃទី៤មីនា កម្ពុជា ក៏បានចាប់ផ្តើមចាក់វ៉ាក់សាំង COVISHIELD លើមន្ត្រី និងពលរដ្ឋអាទិភាព ដែលមានអាយុចាប់ពី៦០ឆ្នាំឡើង។ រហូតដល់ថ្ងៃទី១មេសា ឆ្នាំ២០២១ កម្ពុជា បានចាក់សាំងវ៉ាក់សាំង Sinovac ទៅលើមនុស្សដែលមានវ័យចាប់ពី១៨ឆ្នាំឡើង ទៅផងដែរ។
មកទល់ពេលនេះ កម្ពុជាបានទទួលវ៉ាក់សាំងបង្ការកូវីដ-១៩ សរុប ៣,១២៤,០០០ដូស ដោយក្នុងនោះ មានវ៉ាក់សាំង Sinopharm ចំនួន១,៣លានដូស ជាជំនួយរបស់រដ្ឋាភិបាលប្រទេសចិន និងវ៉ាក់សាំង COVISHIELD ចំនួន ៣២៤,០០០ដូស ជាជំនួយដែលកម្ពុជាទទួលបានពីយន្តការ COVAX។ ដោយឡែក វ៉ាក់សាំង Sinovac ចំនួន១,៥លានដូស គឺកម្ពុជាបញ្ជាទិញពីក្រុមហ៊ុនចិនក្នុងតម្លៃ១,៥លានដុល្លារ៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 2 ថ្ងៃ
