COVID-19
ជាតិ
COVID-19៖ ៤៣១ករណីទៀតនៅកម្ពុជា
× តួលេខអ្នកកើតកូវីដ-១៩នៅកម្ពុជា មានចំនួន៤៣១នាក់បន្ថែមទៀត រីឯអ្នកសះស្បើយថ្មី មាន៣១នាក់។ នេះបើតាមសេចក្តីប្រកាសព័ត៌មានរបស់ក្រសួងសុខាភិបាល នាថ្ងៃទី២០ ខែមេសា ដោយផ្អែកតាមលទ្ធផលកាលពីម្សិលមិញ។ ភ្នំពេញនៅតែជាតំបន់ដ៏គ្រោះថ្នាក់ជាងគេ ជាពិសេសនៅទីតាំងដែលរដ្ឋាភិបាលកំណត់ថា ជាតំបន់ក្រហម បន្ទាប់មកខេត្តព្រះសីហនុ។
ក្នុងចំណោម៤៣១ករណី មាន២ករណីនាំចូល ដែលជាបុរសឥណ្ឌូណេស៊ីអាយុ៣១ឆ្នាំ មកពីឥណ្ឌា ហើយដល់កម្ពុជានៅថ្ងៃទី១៨ ខែមេសា និងម្នាក់ទៀតជាស្ត្រីចិនអាយុ២០ឆ្នាំ ដែលមកពីប្រទេសរបស់ខ្លួន កាលពីថ្ងៃទី៦ ខែមេសា។
៤២៩ករណីពាក់ព័ន្ធសហគមន៍២០កុម្ភៈ ដោយរាជធានីភ្នំពេញ មានខ្មែរទាំង២៧១នាក់ (បុរស១២៥នាក់ និងស្រ្តី១៤៦នាក់)។ ក្រសួងមិនទាន់បញ្ជាក់លំអិតពីកន្លែងសម្រាកព្យាបាលរបស់អ្នកទាំងនោះឡើយ។
ខេត្តព្រះសីហនុ មាន១៣៣នាក់ ក្នុងនោះខ្មែរ១៣២នាក់ និងវៀតណាម១នាក់ ដែលត្រូវបញ្ជូនសម្រាកព្យាបាលនៅសណ្ឋាគារសម័យថ្មី អន្តរជាតិ ខេត្តព្រះសីហនុ។
១០នាក់នៅខេត្តកណ្តាល ដែលសុទ្ធតែជាជនជាតិខ្មែរ (បុរស២នាក់ និងស្ត្រី៨នាក់)។ ពួកគាត់សម្រាកព្យាបាលនៅមន្ទីរពេទ្យជ័យជំនះ។
៤នាក់នៅខេត្តតាកែវ ក្នុងនោះមានបុរស៣នាក់នៅស្រុកបាទី និងកុមារ១នាក់នៅស្រុកសំរោង ដែលត្រូវបានដាក់ឲ្យសម្រាកព្យាបាលនៅមន្ទីរពេទ្យខេត្ត។
កំពង់ចាមមាន៤នាក់ ដោយ៣នាក់នៅឃុំស្វាយពោធិ៍ ស្រុកស្រីសន្ធរ និង១នាក់នៅឃុំស្វាយទាប ស្រុកចំការលើ។ ពួកគាត់សម្រាកព្យាបាលនៅមន្ទីរពេទ្យខេត្ត។
ព្រៃវែងមានស្ត្រី២វ័យ១៨ឆ្នាំនាក់ដែលមានអាសយដ្ឋាននៅឃុំស្មោងត្បូង ស្រុកកំចាយមារ ហើយបច្ចុប្បន្នសម្រាកព្យាបាលនៅមន្ទីរពេទ្យខេត្ត។
កំពង់ឆ្នាំងមាន១នាក់ ជាបុរសអាយុ៥៧ឆ្នាំ នៅឃុំជ្រៃបាក់ ស្រុករលៀប្អៀរ។ កំពង់ធំមាន១នាក់ ជាបុរសអាយុ៣១ឆ្នាំ នៅឃុំត្នោតជុំ ស្រុកបារាយណ៍។ កំពតមាន១នាក់ដែលជាបុរសអាយុ៤២ឆ្នាំនៅឃុំកំពង់ត្រាច ស្រុកកំពង់ត្រាច។ ស្វាយរៀងមាន១នាក់ដែលជាបុរសអាយុ៥០ឆ្នាំនៅសង្កាត់បាវិត ឃុំបាវិត។ ត្បូងឃ្មុំ មាន១នាក់ ជាស្ត្រីអាយុ២៧ឆ្នាំ នៅឃុំកោងកាង ស្រុកពញាក្រែក។
ក្នុងចំណោមអ្នកសះស្បើយថ្មី៣១នាក់ មាន៤នាក់នៅព្រៃវែង ៣នាក់នៅស្វាយរៀង ១២នាក់នៅកណ្តាល ៥នាក់នៅតាកែវ និង៧នាក់នៅភ្នំពេញ។
បច្ចុប្បន្ន កម្ពុជាមានអ្នកកើតកូវីដ-១៩ សរុប៧៤៤៤នាក់ ក្នុងនោះ ៦៨៩៩នាក់ពាក់ព័ន្ធសហគមន៍២០កុម្ភៈ។ អ្នកសះស្បើយមាន២៥៥៥នាក់ និងស្លាប់៤៩នាក់៕
© រក្សាសិទ្ធិដោយ thmeythmey.com