COVID-19
ជាតិ
COVID-19៖ ៣០៣ករណីបន្ថែមទៀតនៅកម្ពុជា ខណៈអ្នកសះស្បើយមាន ២៣៩នាក់
× មនុស្ស៣០៣នាក់បន្ថែមទៀត តេស្តវិជ្ជមានកូវីដ-១៩នៅកម្ពុជា និងអ្នកសះស្បើយថ្មី មាន ២៣៩នាក់។ នេះបើតាមសេចក្តីជូនព័ត៌មានរបស់ក្រសួងសុខាភិបាល នាថ្ងៃពុធ ទី២១ ខែមេសា ឆ្នាំ២០២១។ ភ្នំពេញនៅតែជាតំបន់ដែលរាលដាលខ្លាំងជាងគេ ក្នុងព្រឹត្តិការណ៍សហគមន៍២០កុម្ភៈ ដោយមាន២៤៨ ករណីបន្ថែមទៀត។
តាមក្រសួងសុខាភិបាល ក្នុងចំណោមករណីថ្មីទាំង ៣០៣នាក់នោះ មាននៅភ្នំពេញ ចំនួន ២៤៨នាក់ ដោយក្នុងនោះមានជនជាតិខ្មែរ ២៤៥នាក់ និងជនជាតិចិន ៣នាក់។ ដោយឡែកមនុស្ស ៣នាក់ បានស្លាប់បាត់បង់ជីវិត ដោយសារជំងឺកូវីដ-១៩ ក្នុងចំណោមអ្នកវិជ្ជមានថ្មីដែលរកឃើញនៅភ្នំពេញនេះ។ មនុស្ស ២៤៥នាក់ ក្រសួងនឹងប្រកាសពីទីកន្លែងព្យាបាលនៅពេលក្រោយ។
ខេត្តព្រះសីហនុ ក៏រកឃើញករណីវិជ្ជមានថ្មី ១៩នាក់ ដែរ ក្នុងនោះអ្នកជំងឺម្នាក់បានស្លាប់ ខណៈអ្នកជំងឺដែលនៅសល់ ត្រូវបានដាក់ឱ្យសម្រាកនៅមន្ទីរពេទ្យបង្អែកខេត្តព្រះសីហនុ។ ២៦ករណី ត្រូវបានរកឃើញនៅខេត្តកណ្តាល ដោយក្នុងនោះមាន ស្រី១៧នាក់ និងប្រុស ៩នាក់ ហើយអ្នកជំងឺទាំងអស់ត្រូវបានដាក់ឱ្យសម្រាកព្យាបាលនៅមន្ទីរពេទ្យជ័យជំនះ ខេត្តកណ្តាល។ ៨ករណីនៅខេត្តតាកែវ ដោយអ្នកជំងឺត្រូវបានឱ្យសម្រាកព្យាបាលនៅមន្ទីរពេទ្យខេត្តកណ្តាល។ ខេត្តកំពត ក៏មានវិជ្ជមាន ២ករណីដែរ ដែលម្នាក់ជាអ្នករស់នៅស្រុកកំពង់ត្រាច និងម្នាក់ជាអ្នករស់នៅស្រុក ឈូក។ អ្នកទាំង២ ត្រូវបានដាក់ឱ្យសម្រាកព្យាបាលនៅមន្ទីរពេទ្យខេត្តកំពត។
ជាមួយគ្នានេះ ក៏មានមនុស្សចំនួន ២៣៩នាក់បានជាសះស្បើយដែរ ក្នុងនោះមាន ២០៥នាក់ នៅរាជធានីភ្នំពេញ, ១៤នាក់ នៅខេត្តស្វាយរៀង , ១៣នាក់ នៅខេត្តព្រះសីហនុ , ៣នាក់ នៅកំពង់ចាម , ៣នាក់ នៅខេត្តកោះកុង និងម្នាក់ នៅត្បូងឃ្មុំ។
គិតមកទល់ពេលនេះ កម្ពុជាមានករណីកូវីដ-១៩ សរុប ៧៧៤៧ករណី ក្នុងនោះអ្នកពាក់ព័ន្ធនឹងព្រឹត្តិការណ៍សហគមន៍ ២០កុម្ភៈ មាន ៧២០២ករណី។ អ្នកសះស្បើយមានចំនួន ២៧៩៤ ខណៈអ្នកស្លាប់កើនដល់ ៥៤នាក់។ កម្ពុជា នៅមានអ្នកជំងឺ ៤៨៩៣នាក់ ក្នុងនោះ ២៤១៦នាក់ កំពុងរង់ចាំការបញ្ជូនទៅសម្រាកព្យាបាល ខណៈអ្នកព្យាបាលនៅផ្ទះ នៅសល់ចំនួន ១៥នាក់៕
© រក្សាសិទ្ធិដោយ thmeythmey.com