COVID-19
ជាតិ
៥នាក់ទៀតស្លាប់ដោយសារកូវីដ-១៩នៅកម្ពុជា សរុប៥៤
× ក្រសួងសុខាភិបាលបានប្រកាសពីករណីជនជាតិខ្មែរ៥នាក់ទៀត ស្លាប់ដោយសារជំងឺកូវីដ-១៩នៅកម្ពុជា ដែលក្នុងនោះមានបុរសអាយុ៣៣ឆ្នាំ,៦៣ឆ្នាំ និងស្ត្រីអាយុ៦៦ឆ្នាំ អាយុ៥២ឆ្នាំ និង៦១ឆ្នាំ។
បុរសអាយុ៣៣ឆ្នាំ រស់នៅសង្កាត់ដង្កោ បានបាត់ជីវិតកាលពីម៉ោង៧ និង៣០នាទី ព្រឹកថ្ងៃទី២០ ខែមេសា នៅមន្ទីរពេទ្យហ្លួងម៉ែ។ ស្ត្រីអាយុ៦៦ឆ្នាំ រស់នៅខេត្តព្រះសីហនុ បានស្លាប់កាលពីម៉ោង៥ភ្លឺ ថ្ងៃទី២០ ខែមេសា នៅមន្ទីរពេទ្យបង្អែក ខេត្តព្រះសីហនុ។ ស្ត្រីអាយុ៥២ឆ្នាំ រស់នៅសង្កាត់ស្ទឹងមានជ័យ១ ខណ្ឌមានជ័យ ស្លាប់កាលពីម៉ោង៦ព្រឹកថ្ងៃទី២០ ខែមេសា នៅមន្ទីរពេទ្យមិត្តភាពខ្មែរ សូវៀត។ ពួកគេសុទ្ធតែបានបាត់បង់ជីវិតដោយសារវិបត្តិផ្លូវដង្ហើមស្រួចស្រាវធ្ងន់ធ្ងរ និងរលាកសួតដោយសារវីរុសកូវីដ-១៩។
បុរសអាយុ៦៣ឆ្នាំ រស់នៅសង្កាត់ចាក់អង្រែក្រោម ខណ្ឌមានជ័យ បានស្លាប់កាលពីល្ងាចថ្ងៃទី១៨ ខែមេសា មុនចូលមន្ទីរពេទ្យមិត្តភាពខ្មែរសូវៀត។ សពត្រូវបានយកសំណាកធ្វើការវិភាគ ដោយទទួលបានលទ្ធបញ្ជាក់ថា គាត់វិជ្ជមានកូវីដ-១៩។ អ្នកជំងឺមានជំងឺទឹកនោមផ្អែមប្រចាំកាយមុនចូលដល់មន្ទីរពេទ្យ (Mourant entrant avec COVID-19)។
នៅមន្ទីរពេទ្យដដែល ស្ត្រីអាយុ៦១ឆ្នាំ អាសយដ្ឋាននៅស្រុកអង្គស្នួល ខេត្តកណ្តាល បានស្លាប់បាត់បង់ជីវិតកាលពីម៉ោង៥ និង៥០នាទីល្ងាចថ្ងៃទី២០ ខែមេសា ដោយសាវវិបត្តិផ្លូវដង្ហើមស្រួចស្រាវធ្ងន់ធ្ងរ និងរលាកសួតសងខាងដោយសារវីរុសកូវីដ-១៩ ហើយគាត់មានជំងឺទឹកនោមផ្អែមផងដែរ។
មកដល់ពេលអ្នកជំងឺកូវីដ-១៩ ដែលបានស្លាប់នៅកម្ពុជាឡើងដល់ទៅ៥៤នាក់៕
© រក្សាសិទ្ធិដោយ thmeythmey.com