COVID-19
ជាតិ
ពលរដ្ឋខ្មែរ៥នាក់ទៀតស្លាប់ដោយសារកូវីដ-១៩ នៅកម្ពុជា សរុប៧៩នាក់
× ក្រសួងសុខាភិបាល បានប្រកាសពីករណីពលរដ្ឋខ្មែរ៥នាក់ទៀតដែលស្លាប់ដោយសារកូវីដ-១៩នៅកម្ពុជា ដែលធ្វើឲ្យចំនួនសរុបឡើងដល់៧៩នាក់។ អ្នកស្លាប់ថ្មីទាំង៥នាក់នោះរួមមាន ស្ត្រីអាយុ៥៨ឆ្នាំ អាយុ៨១ឆ្នាំ បុរសអាយុ៤១ឆ្នាំ អាយុ៥១ឆ្នាំ និងអាយុ៣២ឆ្នាំ។
ស្ត្រីអាយុ៥៨ឆ្នាំ រស់នៅសង្កាត់ដង្កោ ខណ្ឌដង្ហោ។ គាត់បានស្លាប់នៅមន្ទីរពេទ្យមិត្តភាពខ្មែរ-សូវៀត កាលពីយប់ថ្ងៃទី២៤ ខែមេសា ដោយសារវិបត្តិផ្លូវដង្ហើមស្រួចស្រាវ ធ្ងន់ធ្ងរ និងរលាកសួតទាំងសងខាង ដោយសារវីរុសកូវីដ-១៩ លើអ្នកជំងឺទឹកនោមផ្អែមប្រចាំកាយ។
បុរសអាយុ៤១ឆ្នាំ នៅស្រុកដំណាក់ចង្អើរ ខេត្តកែប បានស្លាប់កាលពីយប់ថ្ងៃទី២៤ ខែមេសា នៅមន្ទីរសុខាភិបាលខេត្តកែប។ ជាករណីសង្ស័យដែលគ្រូពេទ្យបានយកសំណាកសពធ្វើការវិភាគ។ គាត់មានជំងឺទាចទឹកប្រចាំកាយផងដែរ។
បុរសអាយុ៥១ឆ្នាំ រស់នៅសង្កាត់ផ្សារកណ្តាល ខណ្ឌដូនពេញ បានស្លាប់កាលពីវេលាថ្ងៃត្រង់ថ្ងៃទី២៥ ខែមេសា នៅមណ្ឌលសុខភាពចាក់អង្រែ។ គាត់មានជំងឺទឹកនោមផ្អែមប្រចាំកាយ។
នៅមន្ទីរពេទ្យហ្លួងម៉ែ មានអ្នកស្លាប់២នាក់ គឺបុរសអាយុ៣២ឆ្នាំរស់នៅសង្កាត់ច្រាំងចំរេះ ខណ្ឌឫស្សីកែវ ដែលមានជំងឺលាងឈាមប្រចាំកាយ និងស្ត្រីអាយុ៨១ឆ្នាំ នៅសង្កាត់ច្បារអំពៅ ខណ្ឌច្បារអំពៅ ដែលបានចូលសម្រាកព្យាបាលបាន៣ថ្ងៃ។
មកដល់ពេលនេះ អ្នកស្លាប់ដោយសារកូវីដ-១៩នៅកម្ពុជា មានចំនួន៧៩នាក់៕
© រក្សាសិទ្ធិដោយ thmeythmey.com