រដ្ឋបាលបាលខេត្តកំពង់ស្ពឺបានរៀបចំផ្សារបណ្ដោះអាសន្ន ដើម្បីរក្សាគម្លាតឱ្យពលរដ្ឋ អាចនៅបន្តការលក់ ប្រកបដោយការពារ និងហានិភ័យទាប ដោយកំណត់ចម្ងាយ ២ម៉ែត្រសម្រាប់ពីតូបមួយទៅតូបមួយ ឱ្យអ្នកលក់ម្នាក់ៗ។ ផ្សារនេះមានទីតាំងនៅលើដីឡូត៌មួយកន្លែង ស្ថិតក្នុងភូមិទួលគោក សង្កាត់ស្វាយក្រវាន់ ក្រុងច្បារមន ខេត្តកំពង់ស្ពឺ។ 
 

លោក រ៉ី សំណាង អភិបាលខេត្តកំពង់ស្ពឺ បានប្រាប់សារព័ត៌មានថ្មីៗ២៥យ៉ាងដូច្នេះ៖  «ផ្សារនេះអាចនឹងត្រូវដាក់ឱ្យដំណើរការនៅថ្ងៃទី ២៩ ខែមេសា ប្រសិនបើគ្មានបញ្ហារហាក់រអូលណាមួយទេ។ ពីម្សិលមិញក្រុមការងារបើកការប្រជុំ ហើយព្រឹកមិញចាប់អនុវត្តន និងរៀបចំកំណត់ចម្ងាយ និងគម្លាត »។
 

មូលហេតុដែលនាំឱ្យរដ្ឋបាលខេត្តរៀបចំផ្សារនេះ ដោយសារមើលឃើញថា សកម្មភាពលក់នៅផ្សារចាស់ ( ផ្សារកញ្ច្រែង) ប្រជាពលរដ្ឋ មិនបានអនុវត្ត និងរក្សាគម្លាតឱ្យបានត្រឹមត្រូវ ទើប បង្កើតឱ្យមានការបង្កើតផ្សារបណ្ដោះអាសន្ននេះឡើង ក្នុងគោលបំណងជួយរក្សាសុវត្តិភាព និងអនាម័យ ក្នុងស្ថានភាពនៃការរីករាលដាលជំងឺកូវីដ-១៩ ។ 
 

« ផ្សារនេះអាចនឹងត្រូវបន្ថែមចំនួនតូប ប្រសិនបើមានអ្នកលក់កើនច្រើន ក្នុងដំណាក់កាលនេះយើងមិនបង្កើតផ្សារបណ្តោះអាសន្នបន្ថែមទៀតទេ ហើយចំពោះទំហំផ្ទៃដីផ្សារបណ្ដោះអាសន្ននេះ ខ្ញុំមិនអាចបញ្ជាក់ពីទំហំបានទេ ប៉ុន្ដែគ្រាន់បានដឹងថា ដីទីនេះធំ »។នេះបើតាម លោក វ៉ី សំណាង អភិបាលខេត្តកំពង់ស្ពឺ៕

 

ផ្សារបណ្ដោះអាសន្ន ដែលរដ្ឋបាលខេត្តកំពង់ស្ពឺរៀបចំឱ្យពលរដ្ឋលក់ ទំនិញ និងបន្លែផ្លែឈើ ក្នុងស្ថានភាពបែបនេះ 

 

ស្ថិតនៅភូមិទួលគោក សង្កាត់ស្វាយក្រវាន់ ក្រុងច្បារមន ខេត្តកំពង់ស្ពឺ