កីឡាជាតិ
ជាតិ
កីឡាករ Privat Mbarga ខ្សែប្រយុទ្ធក្លិបព្រះខន្ធរាជស្វាយរៀង
×![]()
ភ្នំពេញ៖ សហព័ន្ធកីឡាបាល់ទាត់កម្ពុជា (FFC) នឹងកោះហៅកីឡាករ Privat Mbarga ខ្សែប្រយុទ្ធក្លិបព្រះខ័នរាជស្វាយរៀង និងភាគីក្លិបវិសាខា ទៅដោះស្រាយបញ្ហាជម្លោះជុំវិញការចោទប្រកាន់ មានការរើសអើងព័ណ៌សម្បុរ នៅលើទីលាននៃការប្រកួតពានរង្វាន់មិត្តហ្វូន កាលពីថ្ងៃទី២៣ ឧសភា។
ក្រោយជំនួប ជាមួយក្លិបវិសាខានោះ ខ្សែប្រយុទ្ធសញ្ជាតិកាម៉េរូន Privat Mbarga បានសរសេរលើហ្វេសប៊ុកខ្លួនថា មានកីឡាករវិសាខាម្នាក់ បានប្រើប្រាស់ពាក្យសម្តីមិនសមរម្យ ដោយមានការរើសអើងមកលើរូបគេ។ Privat Mbarga បានសង្កត់ធ្ងន់ថា កីឡាករវិសាខាម្នាក់នោះ បានប្រើប្រាស់ពាក្យរើសអើងព័ណ៌សម្បុរមកលើរូបខ្លួន ជាច្រើនលើកច្រើនសារទៀតផង។
ខ្សែប្រយុទ្ធក្លិបព្រះខ័នរាជស្វាយរៀងរូបនេះ បានសរសេរជាភាសាអង់គ្លេស ដែលមានន័យជាភាសាខ្មែរដូច្នេះថា៖«អាខ្មៅចង្រៃ (you’re a f*…k black guy)»។
សម្រាប់ Privat Mbarga ការរើសអើងព័ណ៌សម្បុរបែបនេះ ជារឿងមួយដែលមិនអាចទទួលយកបានឡើយ។ «ខ្ញុំជឿជាក់ថា គួរតែមានការដាក់ពិន័យ(លើកីឡាករវិសាខា) ពីព្រោះវាគ្មានកន្លែងរើសអើសនៅក្នុងវិស័យបាល់ទាត់ ឬក្នុងជីវិតនោះទេ។ ពួកយើងគ្រប់គ្នាសុទ្ធតែជាមនុស្ស ដោយមិនសំដៅតែលើព័ណ៌សម្បុរនៃស្បែករបស់យើងនោះឡើយ»។ នេះជាការលើកឡើងរបស់ Privat Mbarga ខ្សែប្រយុទ្ធក្លិបព្រះខ័នរាជស្វាយរៀង។
ជុំវិញករណីនេះលោក ឈី កុលបុត្រា លេខាធិការប្រតិបត្តិ គណៈកម្មការប្រកួតបាល់ទាត់ជាតិកម្ពុជា (CNCC) បាននិយាយថា ខាងគណៈកម្មការលោក ក៏ដូចជាខាងសហព័ន្ធកីឡាបាល់ទាត់កម្ពុជា បានទទួលព័ត៌មាននេះហើយ។ បើតាមលោក កុលបុត្រា ភាគីខាងសហព័ន្ធកីឡាបាល់ទាត់កម្ពុជា នឹងដោះស្រាយបញ្ហាករណីចោទប្រកាន់មានការរើសអើងនៅលើទីលានបាល់ទាត់នេះ។
ថ្លែងប្រាប់សារព័ត៌មានថ្មីៗ លេខាធិការប្រតិបត្តិ គណៈកម្មការប្រកួតបាល់ទាត់ជាតិកម្ពុជារូបនេះ បានបញ្ជាក់ដូច្នេះថា៖«កិច្ចការងារ(ដោះស្រាយករណីចោទប្រកាន់រើសអើង)ហ្នឹង ឥឡូវកំពុងស្ថិតនៅក្រោមការរៀបចំរបស់សហព័ន្ធ ព្រោះគណៈកម្មការប្រកួតបាល់ទាត់ជាតិកម្ពុជាយើង គ្រាន់តែរៀបចំការប្រកួតទេ ។ដូច្នេះយើងរង់ចាំមើលសហព័ន្ធ គាត់ពិនិត្យករណីហ្នឹង ហើយការវិនិច្ឆ័យ និងការសម្រេចចិត្ត គឺស្ថិតនៅលើសហព័ន្ធទាំងអស់»។
ពាក់ព័ន្ធករណីចោទប្រកាន់រើសអើងគ្នានេះ លោក កែវ សារ៉េត អគ្គលេខាធិកាសហព័ន្ធកីឡាបាល់ទាត់កម្ពុជា (FFC ) បានបញ្ជាក់ថា FFC នឹងកោះហៅកីឡាករ Privat Mbarga ខ្សែប្រយុទ្ធក្លិបព្រះខ័នរាជស្វាយរៀង និងភាគីក្លិបវិសាខា ទៅដោះស្រាយបញ្ហានេះ នៅថ្ងៃទី២៥ ឧសភា។ បើតាមលោក កែវ សារ៉េត ការកោះហៅប្រជុំនេះ ក៏ទំនងជាមិនទាន់មានការដាក់ពិន័យអ្វីធ្ងន់ធ្ងរដែរ ដោយគ្រាន់តែណែនាំលើកីឡាករដែលប្រព្រឹត្តខុស ឱ្យទទួលកំហុសខ្លួន ដើម្បីឱ្យស្ថានការណ៍ស្ងប់ស្ងាត់វិញ ។
«ពួកយើងកំពុងតែចាត់ការស្រាវជ្រាវលើរឿង(ចោទប្រកាន់រើសអើង)ហ្នឹងហើយ ប្រហែលជាថ្ងៃស្អែក បានយើងនឹងជួបប្រជុំគ្នា ជាមួយសាមីខ្លួនទាំងសងខាង…។ យើងព្យាយាមសម្របសម្រួលឱ្យត្រូវរ៉ូវគ្នាវិញ ព្រោះពេលខ្លះក្មេង(កីឡាករ) វាមិនចាប់អារម្មណ៍ភាសាវាថា វានិយាយខុសអីអ៊ីចឹងទៅណា។ អ៊ីចឹងទី១ យើងមិនមែនប៉ះដៃយកដៃ ប៉ះជើងយកជើងភ្លាមនោះទេ យើងត្រូវហៅវាមកអប់រំ»។ នេះជាការបញ្ជាក់របស់អគ្គលេខាធិកាសហព័ន្ធកីឡាបាល់ទាត់កម្ពុជា។
ក្នុងវិស័យកីឡាគ្រប់ប្រភេទ គឺគ្មានឡើយការរើសអើង និងប្រកាន់ពូជសាសន៍ ព័ណ៌សម្បុរ និងមាក់ងាយគ្នានោះទេ សូម្បីតែនិន្នាការនយោបាយ ក៏មិនត្រូវមានឡើយ។ ត្រង់ចំណុចនេះលោក ឈី កុលបុត្រា លេខាធិការប្រតិបត្តិ គណៈកម្មការប្រកួតបាល់ទាត់ជាតិកម្ពុជា (CNCC) ស្នើឱ្យកីឡាករទាំងអស់ លេងដោយភាពត្រឹមត្រូវ និងប្រកាន់ខ្ជាប់នូវក្រមសីលធម៌ វិជ្ជាជីវៈខ្លួនឱ្យបានល្អ៕
Tag:
Privat Mbarga
កីឡាបាល់ទាត់
FFC
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 1 សប្តាហ៍
