កីឡាជាតិ
ជាតិ
ស៊ីហ្គេម៖ ក្រុមកីឡាបាល់ទាត់ U23 កម្ពុជា បានហាលអាវហើយ លោក Lee Tae Hoon សម្តែងការខកចិត្តក្រោយបរាជ័យ។ រូបថត ហ្វេសប៊ុក Bong Chhaom
× គិតទាំងចាញ់ទីម័រខាងកើត ៣-២ នាល្ងាចថ្ងៃព្រហស្បតិ៍ ទី១២ ខែធ្នូ ក្រុម U23 កម្ពុជា បានក្លាយជាក្រុមទីមួយដែលខកឱកាសក្នុងការបោះជំហានទៅមុខទៀតសម្រាប់ព្រឹត្តិការណ៍ស៊ីហ្គេមលើកទី២៧ នេះ ដូច្នេះការប្រកួតជាមួយថៃនាថ្ងៃចន្ទសប្តាហ៍ក្រោយគ្រាន់តែជាការបង្គ្រប់កិច្ចប៉ុណ្ណោះ។
សម្រាប់ជំនួបនៅលើទីលាន Thuwunna Stadium ទីក្រុងយ៉ាំងហ្គោន ជាមួយទីម័រខាងកើត ខ្សែបម្រើភ្នំពេញក្រោន សុះ ស៊ូហាណា ក្លាយជាកីឡាករដំបូងគេបង្អស់របស់កម្ពុជា ដែលរកគ្រាប់ឲ្យក្រុមនៅស៊ីហ្គេមឆ្នាំ២០១៣ នេះ នៅនាទី ទី២៣ ប៉ុន្ដែ៥នាទីក្រោយមក ទីម័របានវាយបកតាមស្មើវិញ។
លទ្ធផលនាំមុខ ២-១ របស់ទីម័រខាងកើត បានកើតឡើងនៅក្នុងនាទី ទី៤២ ខណៈចូលដល់តង់ទី២ នៅនាទី ៧១ ខ្សែបម្រើស្វាយរៀង ប្រាក់ មុន្នីឧត្តម រកគ្រាប់បាល់តាមបានស្មើ។ ទោះបីជាយ៉ាងណាក៏ដោយ កម្ពុជានៅតែមិនអាចរកបានពិន្ទុណាមួយឡើយ ពីព្រោះបីនាទីចុងក្រោយមុនបញ្ចប់ការប្រកួត ទីម័របានបន្ថែមមួយគ្រាប់ទៀត ដែលនាំឲ្យពួកគេទទួលបានបីពិន្ទុជាមួយនឹងជ័យជម្នះ ៣-២ ។
ចំណែកលទ្ធផលនៃការប្រកួតក្នុងពូល B ដូចគ្នា ក្រុមថៃ បានយកឈ្នះ ឥណ្ឌូណេស៊ី ក្នុងលទ្ធផល ៤-១។ បច្ចុប្បន្ន ក្នុងពូល B បណ្ដោះអាសន្ន ថៃ និង មីយ៉ាន់ម៉ា ឈរកំពូលតារាង មាន ៦ ពិន្ទុដូចគ្នា ចំណែកឥណ្ឌូណេស៊ី និង ទីម័រខាងកើត ឈរលេខរៀងបន្តបន្ទាប់ មាន ៣ ពិន្ទុស្មើ ស្របពេលកម្ពុជា នៅបាតតារាង គ្មានពិន្ទុក្នុងដៃ។
ប្រកួតបន្ទាប់ ទីម័រ ប៉ះ ឥណ្ឌូណេស៊ី និង ថៃ ប៉ះ ម្ចាស់ផ្ទះមីយ៉ាន់ម៉ា នៅថ្ងៃទី ១៤ ធ្នូ។ ចំណែកនៅថ្ងៃទី ១៦ ធ្នូ ឥណ្ឌូណេស៊ី ប្រកួតជាមួយមីយ៉ាន់ម៉ា និង កម្ពុជា ប្រកួតចុងក្រោយជាមួយ U23 ថៃ៕ © រក្សាសិទ្ធិដោយ thmeythmey.com