De Bruyne ត្រូវបានប្តូរជំនួសដោយ Gabriel Jesus នៅនាទីទី៦០ បន្ទាប់ពីខ្សែប្រើឆ្នើម វ័យ២៩ឆ្នាំ ប៉ះទង្គិចជាមួយ Antonio Rudiger ខ្សែការពាររបស់ Chelsea។

ចំពោះស្ថានភាពរបួសធ្ងន់ធ្ងរត្រង់ច្រមុះ និងភ្នែករបស់ខ្សែបម្រើសញ្ជាតិបែលហ្ស៊ិក ខ្សែការពារ Rudiger មានការភ្ញាក់ផ្អើលយ៉ាងខ្លាំងនៅពេលដឹងដំណឹងនេះក្រោយចប់ការប្រកួតដែលក្រុមខ្លួនតោខៀវជាក្រុមជើងឯកក្រោយឈ្នះមេឃខៀវ ១-០ នាជំនួបផ្តាច់ព្រ័ត្រ នៅក្រុង Porto។
 

Rudiger បង្ហាញការសោកស្តាយយ៉ាងខ្លាំងចំពោះហេតុការដ៏អាក្រក់អំឡុងពេលប្រកួត រហូតបង្ខំឱ្យ De Bruyne របស់ក្រុមគូប្រជែង Man City ត្រូវប្តូរចេញភ្លាមៗនោះ។ ខ្សែការពារកណ្តាលអន្តរជាតិអាល្លឺម៉ង់រូបនេះអះអាថា ខ្លួនបានទាក់ទង និងសួរសុខទុក្ខជានិច្ច De Bruyne ចាប់តាំងពីចប់ការប្រកួតរហូតមក។
 

«ខ្ញុំពិតជាសុំទោសចំពោះការរងរបួសរបស់ @DeBruyneKev។ ជាការពិតណាស់នេះមិនមែនជាចេតនារបស់ខ្ញុំទេ។ ខ្ញុំតែងតែទាក់ទងទៅគាត់ដោយផ្ទាល់ជានិច្ច។ ខ្ញុំជូនពរឱ្យគាត់ឆាប់ជាសះស្បើយ ហើយសង្ឃឹមថាយើងនឹងបានឃើញគាត់ត្រឡប់មកវិញនៅលើទីលានឆាប់ៗនេះ»។ Rudiger បានសរសេរនៅលើបណ្តាញសង្គម Twitter ផ្ទាលរបស់ខ្លួនដូច្នេះ។
 

ដោយសាររបួសនេះ De Bruyne ត្រូវបានឃ្លាំមើលពីក្រុមជម្រើសជាតិ ដើម្បីប្រាកដថារូបគេអាចធ្វើដំណើរជាមួយបែលហ្ស៊ិកទៅកាន់ព្រឹត្តិការណ៍ Euro ២០២០ ឬក៏អត់ ខណៈការប្រកួតនឹងចាប់ផ្តើមពីខែក្រោយ ពោលគឺចាប់ពីថ្ងៃទី១១ ខែមិថុនា ឆ្នាំ២០២១ តទៅ។
 

យ៉ាងណាក៏ដោយ តាមរយៈបណ្តាញសង្គម De Bruyne បានអះអាងថាខ្លួនបានធូរស្រាលបន្តិចហើយ បើទោះមានការខកចិត្តខ្លាំងដែលមិនអាចជួយក្រុមឈ្នះជើងឯកក្របខណ្ឌអឺរ៉ុបបាន។ បែលហ្ស៊ិក ត្រូវប៉ះរុស្ស៊ីនៅជំនួនបើកឆាកពូល B នៅថ្ងៃទី១២ ខែមិថុនា៕