មាត្រា​១១ នៃ​ច្បាប់​ស្តីពី​ដំណើរ​ការរៀបចំ និង​ប្រព្រឹត្តទៅ​នៃ​គណៈកម្មាធិការ​ជាតិ​រៀបចំ​ការបោះឆ្នោត ចែងថា ក្នុងករណី​ប្រធាន ឬ​អនុប្រធាន ឬ​សមាជិក​គណៈកម្មាធិការ​ជាតិ​រៀបចំ​ការបោះឆ្នោត បាត់បង់​មុខតំណែង គណៈកម្មាធិការ​អចិន្ត្រៃយ៍​រដ្ឋសភា ត្រូវ​សម្របសម្រួល​ជាមួយ​គណបក្សនយោបាយ​ពាក់ព័ន្ធ ដើម្បី​ប្រកាស​ជ្រើសរើស​ជា​សាធារណៈ នូវ​បេក្ខភាព​បេក្ខជន ដែល​ត្រូវ​ជំនួស​តំណែង​ដែល​ទំនេរ ប្រកបដោយ​លក្ខណៈ​បើកចំហ និង​មាន​តម្លាភាព​ក្នុង​រយៈពេល​៥​ថ្ងៃ​។​
 

​បន្ទាប់មក គណបក្ស​ពាក់ព័ន្ធ​ត្រូវ​ជ្រើស​សមាភាព​ថ្មី​ពី​ក្នុងចំណោម​អ្នក​ដែល​បានដាក់​ពាក្យ​ក្នុង​រយៈពេល​យ៉ាងយូរ​៣​ថ្ងៃ ដាក់​ទៅ​គណៈកម្មការ​អចិន្ត្រៃយ៍​រដ្ឋសភា ដើម្បី​គណៈកម្មការ​អចិន្ត្រៃយ៍​រដ្ឋសភា​រៀបចំ​ដាក់​សមាសភាព​ថ្មី​នេះ ជូន​រដ្ឋសភា​បោះឆ្នោត​ទុកចិត្ត តាម​សំឡេង​ភាគច្រើន​ដាច់ខាត​នៃ​សមាជិក​រដ្ឋសភា​ទាំងមូល ក្នុង​រយៈពេល​យ៉ាង​៣​ថ្ងៃ​ក្នុងករណី​មានការ​រៀបចំ​បោះឆ្នោត​យ៉ាងយូរ​៣​ថ្ងៃ និង​យ៉ាងយូរ​៥​ថ្ងៃ ក្នុងករណី​ដែល​គ្មាន​ការបោះឆ្នោត​។​
 

​មាត្រា​១១​ដដែល ចែង​ទៀតថា ក្នុងករណី​គណបក្សនយោបាយ​ពាក់ព័ន្ធ​ខកខាន​មិនបាន​ជ្រើសរើស​សមាសភាព​ថ្មី​តាម​ការកំណត់​ខាងលើ គណៈកម្មការ​អចិន្ត្រៃយ៍​រដ្ឋសភា ត្រូវ​ជ្រើសរើស​បេក្ខភាព​បេក្ខជន ដែល​ត្រូវ​ជំនួស​តំណែង​ទំនេរ​នោះ ដែល​ផ្អែក​តាម​លក្ខណៈសម្បត្តិ ដូច​មានចែង​ក្នុង​មាត្រា​៥ នៃ​ច្បាប់​នេះ​ពី​ក្នុងចំណោម​អ្នក​ដែល​បានដាក់​ពាក្យ ដូច​មានចែង​ក្នុង​កថាខណ្ឌ​ទី​១​នៃ​មាត្រា​នេះ ប្រកបដោយ​លក្ខណៈ​បើកចំហ និង​មាន​តម្លាភាព​ក​ល្នុ​ង​រយៈពេល​យ៉ាងតិច​២​ថ្ងៃ ដើម្បី​ដាក់ជូន​រដ្ឋសភា​បោះឆ្នោត​ទុកចិត្ត​តាម​មតិ​ភាគច្រើន​ដាច់ខាត​នៃ​សមាជិក​រដ្ឋសភា​ទាំងមូល ក្នុង​រយៈពេល​យ៉ាងយូរ​២​ថ្ងៃ ក្នុងករណី​ដែលមាន​ការរៀបចំ​បោះឆ្នោត និង​យ៉ាងយូរ​៣​ថ្ងៃ ក្នុងករណី​ដែល​គ្មាន​ការរៀបចំ​បោះឆ្នោត​។
​

​បែបបទ​នីតិវិធី​នៃ​ការដាក់​ពាក្យ​ជ្រើសរើស និង​ការរៀបចំ​បញ្ជី​បេក្ខជន​ដាក់ជូន​រដ្ឋសភា ត្រូវ​កំណត់ដោយ​គណៈកម្មការ​អចិន្ត្រៃយ៍​រដ្ឋសភា​។ ប្រធាន ឬ​អនុប្រធាន ឬ​សមាជិក​គណៈកម្មការ​អចិន្ត្រៃយ៍​រដ្ឋសភា ដែល​ទទួលបាន​តំណែង​ទំនេរ​នោះ ត្រូវធ្វើ​សច្ចាប្រណិធាន​ចូលកាន់​តំណែង​ភ្លាម​។ ប្រធាន ឬ​អនុប្រធាន ឬ​សមាជិក​គណៈកម្មការ​អចិន្ត្រៃយ៍​រដ្ឋសភា ដែល​ទទួលបាន​តំណែង​ទំនេរ​នោះ មាន​អាណត្តិ​ត្រឹម​អាណត្តិ​ដែល​នៅសល់​របស់​គណៈកម្មាធិកា​រ​ជាតិ​រៀបចំ​ការបោះឆ្នោត​៕

​