កីឡាជាតិ
ជាតិ
ស៊ីហ្គេម៖ ១៥ ខែធ្នូ ថ្ងៃដែលអត្តពលិកកម្ពុជាបានចាញ់គ្រប់ប្រភេទកីឡា គៀង សាម៉ន បញ្ចប់ចំណាត់ថ្នាក់ចុងក្រោយលើវិញ្ញាសារត់ប្រណាំង៤០០ម៉ែត្រ។ រូបថត Ken Gadaffi
× មកដល់ពេលនេះ កម្ពុជាដណ្តើមបានមេដាយសរុបចំនួន២៣ពីព្រឹត្តិការណ៍កីឡាស៊ីហ្គេមលើកទី២៧ នៅប្រទេសមីយ៉ាន់ម៉ា ដែលក្នុងនោះមានមាស៤ ប្រាក់៧ និងសំរិទ្ធ១២ ។
នៅថ្ងៃអាទិត្យនេះ កម្ពុជាទទួលបានមេដាយពីរ គឺប្រាក់១ និងសំរិទ្ធ១ ពីកីឡាប៉េតង់ ខណៈកីឡាដ៏មានសក្តានុពលមួយនេះ បានខកចិត្តរហូតដល់ទៅបីលើកនៅវគ្គផ្តាច់ព្រ័ត្រ។ ប៉ុន្តែទោះបីជាយ៉ាងនេះក្តី លទ្ធផលជារួមនៅនេះ គឺកម្ពុជាបានចាញ់នៅគ្រប់ប្រភេទកីឡា ស្របពេលដែលក្រុមថៃ មីយ៉ាន់ម៉ា វៀតណាម ឥណ្ឌូនេស៊ី និងម៉ាឡេស៊ី បន្តប្រមូលយកមេដាយពីព្រឹត្តិការណ៍នេះ។
ខាងក្រោមគឺជាការដកស្រង់លទ្ធផលនៃបរាជ័យរបស់ក្រុមកម្ពុជានៅថ្ងៃអាទិត្យនេះ៖
ហែលទឹក
-ហែលសេរីចម្ងាយ៥០ម៉ែត្រ៖ ម៉ាក់ស៊ីម៉ូហ្វ ចំរើន យូរី និងហែម ថុនពន្លឺ បានធ្លាក់ចេញពីព្រឹត្តិការណ៍។ ក្នុងចំណោមកីឡាករចំនួន១៥នាក់ ចំរើនយូរី ស្ថិតនៅចំណាត់ថ្នាក់លេខ១២ ខណៈពន្លឺ នៅលេខចុងក្រោយគេ។ កីឡាករកំពូលតារាងចំនួន៧នាក់ត្រូវប្រកួតនៅវគ្គបន្ត។
-ហែលកង្កែប ២០០ម៉ែត្រ៖ ហែម ថុនពន្លឺ ស្ថិតនៅចំណាត់ថ្នាក់លេខ១២ក្នុងចំណោមកីឡាករ១៤នាក់។ កីឡាករកំពូលតារាង៨នាក់ឈានទៅប្រកួតវគ្គបន្ត។
អត្តពលកម្ម៖
រត់ចម្ងាយ៤០០ម៉ែត្រ៖ កីឡាករ គៀង សាម៉ន បានធ្លាក់ចេញពីការប្រកួត ដោយបញ្ចប់ចំណាត់ថ្នាក់ទី១៥ក្នុងចំណោមកីឡាករ១៦នាក់។ ក្នុងក្រុមរបស់ខ្លួនដែលមានគ្នា៨នាក់ [Heat 1] សាម៉ន ទៅដល់ទីក្រោយគេក្នុងថិរវេលា ៥១,៥៣៩។
បាល់បោះ៖ ក្រុមជម្រើសជាតិកម្ពុជាបានចាញ់ឥណ្ឌូនេស៊ី ៤៨-៨៤ (១៣-២៣, ១១-២១, ១៨-១៧ និង ៦-២៣) សម្រាប់ការប្រកួតចុងក្រោយរបស់ខ្លួនក្នុងព្រឹត្តិការណ៍កីឡាស៊ីហ្គេម។
ប្រណាំងទោចក្រយាន៖
ចម្ងាយ៥០គីឡូម៉ែត្រ (Men’s Road Race 50Km Individual Time Trial)៖ កីឡាករ ញ៉ុញ ឡេង បញ្ចប់ក្នុងចំណាត់ថ្នាក់ទី១៥ និង កែវ រដ្ឋា ក្នុងចំណាត់ថ្នាក់ទី១៧ ក្នុងចំណោមកីឡាករ១៨នាក់។ មេដាយមាស និងសំរិទ្ធ បានលើកីឡាករហ្វីលីពីន ប្រាក់បានលើកីឡាករឥណ្ឌូនេស៊ី។
វាយកូនគោល៖
បុរសឯកត្តជនជុំទីមួយ៖ កីឡាករ ជា ឡង់ឌី បានវាយចេញ៧៧ឈើ ខណៈថោង សុខាមុន្នី បានវាយចេញរហូតដល់ទៅ៨៧ឈើ ដែលមានចំនួនច្រើនជាងគេ។ កីឡាករទាំងពីររូបរបស់កម្ពុជាមានគម្លាតយ៉ាងឆ្ងាយពីកីឡាករដែលនាំមុខកំពូលតារាង ៦៨ឈើ។
ហុកគី៖
ហុកគីនារី៖ ក្រុមកីឡាការិនីម៉ាឡេស៊ីបានបំបាក់កីឡាការិនីយ៉ាងចាស់ដៃក្នុងលទ្ធផល ៣៦-០ ដែលជាលទ្ធផលដែលកម្រកើតមានក្នុងការប្រកួតជាលក្ខណៈអន្តរជាតិ។
ប៉េតង់៖
-វាយទោលបុរស៖ កីឡាករ អ៊ុក សំណាង បានចាញ់កីឡាករមីយ៉ាន់ម៉ា Than Zaw Oo ក្នុងលទ្ធផល ៨-១៣ ក្នុងការប្រកួតវគ្គពាក់កណ្តាលផ្តាច់ព្រ័ត្រ ប៉ុន្តែយ៉ាងហោចណាស់កីឡាកររូបនេះ បានទទួលមេដាយសំរិទ្ធ។
-វាយគូនារី៖ កីឡាការិនី ឌុច សោភ័ណ្ឌ និង អ៊ុក ស្រីមុំ បានខកឱកាសក្នុងការដណ្តើមយកមេដាយមាសសម្រាប់កម្ពុជាលើប្រភេទកីឡាប៉េតង់ ដោយពួកគេបានចាញ់កីឡាការិនីថៃ Wongchuvej Phanitpha និង Thamakord Thongsri នៅវគ្គផ្តាច់ព្រ័ត្រ។ ទោះយ៉ាងណា ពួកគេបានបន្ថែមមេដាយប្រាក់មួយទៀតសម្រាប់កម្ពុជា។
បាល់ទះ៖ ក្រុមកីឡាករជម្រើសជាតិកម្ពុជាបានចាញ់ថៃទាំងបីសិត (០-៣) ក្នុងការប្រកួតវគ្គជម្រុះពូល A ជាមួយនឹងលទ្ធផលសរុប ៥៧-៧៥ (២០-២៥, ២៣-២៥ និង១៤-២៥)៕ © រក្សាសិទ្ធិដោយ thmeythmey.com