ដោយ៖ ប៉ូ សុភា
ភ្នំពេញ៖ រដ្ឋាភិបាល បានដាក់ក្រុងបាត់ដំបង ជាបេក្ខភាព«ទីក្រុងដែលមានភាពច្នៃប្រឌិតលើផ្នែកម្ហូបអាហារ» របស់អង្គការយូណេស្កូនៅឆ្នាំ២០២១។ ការស្នើសុំនេះ ក្នុងគោលបំណងជួយលើកស្ទួយវប្បធម៌កម្ពុជា និងការទាក់ទាញភ្ញៀវទេសចរអន្តរជាតិ។
លោក គឹម សោភ័ណ ប្រធានមន្ទីរវប្បធម៌ និងវិចិត្រសិល្បៈខេត្តបាត់ដំបង ប្រាប់សារព័ត៌មានថ្មីៗថា កម្ពុជាបានរៀបចំឯកសារ និងបំពេញពាក្យស្នើសុំអស់ហើយ ដើម្បីបញ្ជូនទៅទីកាន់ទីស្នាក់ការអង្គការនេះ នៅក្រុងប៉ារីស ដាក់បញ្ចូលក្រុងបាត់ដំបង ជាបេក្ខភាព«ទីក្រុងដែលមានភាពច្នៃប្រឌិតលើផ្នែកម្ហូបអាហារ»។
« ឯកសារគ្រប់យ៉ាងខ្ញុំបានបំពេញរួចរាល់អស់ហើយ ពេលដែលដាក់ពាក្យស្នើសុំដូចដាក់ CVដូច្នេះដែរ។ ដំណើរបន្តអង្គការយូណេស្កូជាអ្នកត្រួតពិនិត្យបន្ថែម ហើយជាប់ឬមិនជាប់យើងមិនទាន់ដឹងនៅឡើយនោះទេ»។ នេះការបញ្ជាក់របស់ លោកគឹម សោភ័ណ ដោយលោកបន្ថែមថា លទ្ធផលជាប់ ឬធ្លាក់នោះ គឺអាចដឹងនៅ២ក្រោយ ការដាក់ពាក្យនេះ។
ការជ្រើសរើសយកទីក្រុងបាត់ដំបង ដើម្បីចូលជាសមាជិក «ទីក្រុងដែលមានភាពច្នៃប្រឌិតលើផ្នែកម្ហូបអាហារ» គឺមានការវាយតម្លៃពីក្រុមអ្នកជំនាញនៅកម្ពុជា។ អ្នកជំនាញសង្កេតឃើញថា ខេត្តបាត់ដំបងសម្បូរទៅដោយម្ហូបអាហារជាច្រើនប្រភេទ និងច្រើនទម្រង់ដែលត្រូវបានរៀបចំ និងកែច្នៃ ដើម្បីចែករំលែក និងផ្សព្វផ្សាយលើឆាកអន្តរជាតិបាន។ នេះបើតាមការបញ្ជាក់លោក ថោង ខុន។
រដ្ឋមន្ត្រីក្រសួងទេសចរណ៍រូបនេះបន្ថែមថា ការចូលជាសមាជិកបណ្តាញនេះ នឹងអនុញ្ញាតឲ្យកម្ពុជាមានសិទ្ធិប្រើប្រាស់និម្មិតសញ្ញា (Logo) របស់បណ្តាញយូណេស្កូ ដើម្បីផ្សព្វផ្សាយសក្តានុពល និងលក្ខណៈពិសេសនៃទីក្រុងខ្លួន ទៅកាន់ទីក្រុងនានាជាសមាជិក និងក្របខណ្ឌអង្គការយូណេស្កូ ក្នុងការលើកស្ទួយវប្បធម៌។
លោក ថោង ខុន បន្តថា៖«សក្តានុពលទេសចរណ៍ទីក្រុង និងមុខមាត់របស់ទីក្រុងជ័យលាភី ក៏ដូចជាជោកជ័យរបស់ប្រទេសជាតិទាំងមូល។ ជាពិសេសការតម្រង់ឆ្ពោះទៅរកការផ្សព្វផ្សាយទេសចរណ៍ម្ហូបអាហារ Gastronomy Tourism ដែលជានិន្នាការថ្មីរបស់ពិភពលោក ដែលកម្ពុជាមានទីក្រុងបាត់ដំបងតែម្តង»។
បើតាមប្រធានមន្ទីរវប្បធម៌ និងវិចិត្រសិល្បៈខេត្តបាត់ដំបង បណ្ដាប្រទេសជាសមាជិកបណ្ដាញយូណេស្កូ អាចដាក់ពាក្យស្នើសុំដាក់ទីក្រុងចំនួនពីរ នៅក្នុងប្រទេសខ្លួន ចូលរួមប្រកួតប្រជែង ប៉ុន្ដែត្រូវដាក់ប្រកួតក្នុងផ្នែកខុសគ្នា។
« បើក្រុងមួយដាក់ផ្នែកសិល្បៈនៃការផ្សព្វផ្សាយ Media Arts ក្រុងមួយទៀតមិនអាចដាក់ផ្នែកនេះអត់បានទេ ។ គេត្រូវដាក់ផ្នែករចនាប័ទ្ម និងការតុបតែង Design ឬផ្នែកអ្វីផ្សេងក៏បាន ឱ្យតែខុសគ្នា»។ នេះជាការពន្យល់របស់លោក គឹម សោភ័ណ។
សូមបញ្ជាក់ថា កម្មវិធីបណ្តាញទីក្រុងដែលមានភាពច្នៃប្រឌិតរបស់អង្គការយូណេស្កូនេះ មានចែកចេញជា ៧ប្រភេទផ្សេងៗ រួមមានទីក្រុងដែលមានភាពច្នៃប្រឌិតលើ ផ្នែកសិប្បកម្ម និងសិល្បៈប្រជាប្រិយ Crafts and Folk Arts ,ផ្នែកសិល្បៈនៃការផ្សព្វផ្សាយ Media Arts, ផ្នែកខ្សែភាពយន្ត Film, ផ្នែករចនាប័ទ្ម និងការតុបតែង Design, ផ្នែកម្ហូបអាហារ Gastronomy, ផ្នែកអក្សរសាស្ត្រ Literature និងភាពច្នៃប្រឌិតលើផ្នែកតន្ត្រី Music។
ដោយឡែក នៅតំបន់អាស៊ានមានទីក្រុងចំនួន ៦ ក្នុងប្រទេសចំនួន ៤ ដែលជាសមាជិកក្នុងបណ្តាញទីក្រុងរបស់អង្គការយូណេស្កូនេះ រួមមាន៖ ប្រទេសថៃ មានទីក្រុងភូកេត និងទីក្រុងឈាងម៉ៃ, ប្រទេសឥណ្ឌូណេស៊ី មានទីក្រុងបានឌុង (Bandung) និងទីក្រុងផេកាឡុងហ្កាន (Pekalongan), ប្រទេសសិង្ហបុរី មានទីក្រុងសិង្ហបុរី និងប្រទេសហ្វីលីពីន មានទីក្រុងបាកជីអូ (Baguio)។ ដូច្នេះហើយទើបកម្ពុជាប្រឹងស្រវាស្រទេញ ដើម្បីបានដាក់បេក្ខភាពទីក្រុងបាត់ដំបងនេះទៅក្នុងប្រភេទទី៥។
បណ្តាញទីក្រុងដែលមានភាពច្នៃប្រឌិតរបស់អង្គការយូណេស្កូ « UNESCO Creative Cities Network » បានបង្កើតឡើងក្នុងឆ្នាំ២០០៤ ក្នុងគោលបំណងលើកកម្ពស់កិច្ចសហប្រតិបត្តិការ «ទីក្រុងមានភាពច្នៃប្រឌិត» លើសមាសភាពសំខាន់ៗ ដែលជាកត្តាគន្លឹះសម្រាប់ការអភិវឌ្ឍទីក្រុងប្រកបដោយចីរភាព៕