វ៉ាក់សាំងក្រុមហ៊ុន Moderna ជាវ៉ាក់សាំងទី ៥ ដែលត្រូវបានវៀតណាមអនុញ្ញាតឱ្យប្រើប្រាស់ជាបន្ទាន់។ កន្លងមកប្រទេសអាស៊ីអាគ្នេយ៍មួយនេះ បានអនុម័តវ៉ាក់សាំងរុស្ស៊ី Sputnik V, វ៉ាក់សាំងក្រុមហ៊ុន Pfizer, Sinopharm និង AstraZeneca ។ 

 

វ៉ាក់សាំងក្រុមហ៊ុន Moderna ជាប្រភេទវ៉ាក់សាំងប្រើប្រាស់បច្ចេកវិទ្យានាំសារ mRNA និងមានប្រសិទ្ធភាពរហូតដល់ ៩៤,១ ភាគរយឯណោះក្នុងការបង្ការករណីឆ្លងជំងឺកូវីដ-១៩។ តាមការបញ្ជាក់របស់ក្រសួងសុខាភិបាលវៀតណាម វ៉ាក់សាំងរបស់ក្រុមហ៊ុន Moderna ដែលត្រូវផ្គត់ផ្គង់សម្រាប់វៀតណាម អាចនឹងត្រូវផលិតនៅអេស្ប៉ាញ និងបារាំង។ ក្រុមហ៊ុនវៀតណាម Zuellig Pharma Vietnam ជាអ្នកផ្គត់ផ្គង់វ៉ាក់សាំងប្រភេទនេះ។ នេះបើតាមការចុះផ្សាយរបស់សារព័ត៌មាន Vietnam Express។ 

 

មកទល់ពេលនេះ វ៉ាក់សាំងក្រុមហ៊ុន Moderna ដែលប្រើប្រាស់បច្ចេកវិទ្យានាំសារ mRNA ដើម្បីដាស់ប្រព័ន្ធភាពស៊ាំប្រឆាំងនឹងជំងឺកូវីដ-១៩ នេះ ត្រូវបានប្រើប្រាស់នៅក្នុងប្រទេស និងដែនដីចំនួន ៥៣ ក្នុងនោះមានដូចជា អាមេរិក កាណាដា សហភាពអឺរ៉ុប អង់គ្លេស និងអ៊ីស្រាអែលជាដើម។ 

 

ចាប់តាំងពីខែមីនាមក វៀតណាម បានចាក់វ៉ាក់សាំងប្រឆាំងជំងឺកូវីដ-១៩ របស់ក្រុមហ៊ុន AstraZeneca ឱ្យប្រជាជនខ្លួនបានចំនួន ៣,៥លាននាក់ហើយ ដោយប្រជាជនចំនួនជាង ១៧ម៉ឺននាក់ បានទទួលវ៉ាក់សាំងពេញលេញ៕