ជារដ្ឋមន្រ្តីការពារជាតិក្នុងរដ្ឋបាលប្រធានាធិបតី ចច ដាប់ប៊លយូ ប៊ូស លោក ដូណាល់ រ៉ាំស្វែល ជាមន្រ្តីដែលត្រូវបានស្គាល់ថាជាមនុស្សរឹងរូស មានទំនុកចិត្តខ្លាំងជ្រុល និងដឹងកំហុសតែមិនទទួលកំហុស។ លោក រ៉ាំស្វែល និងអនុប្រធានាធិបតី ឌីក ឆេនី សម័យនោះ ជាឥស្សរជនពីរនាក់ដែលដឹកមុខសង្រ្គាមប្រឆាំងភេរវកម្មរបស់រដ្ឋបាលលោក ប៊ូស និងការកើតឡើងគុកហ្កាន់តាណាម៉ូដ៏អសោចផងដែរ។

 

បើតាមទីភ្នាក់ងារព័ត៌មាន AFP គ្រួសារលោក រ៉ាំស្វែល បញ្ជាក់ថា លោកស្លាប់ក្នុងផ្ទះក្នុងទីក្រុង Taos នៃរដ្ឋ New Mexico ។ លោក ប៊ូស បានផ្ញើសាររំលែកទុក្ខអតីតមន្ត្រីថ្នាក់ក្រោមរបស់លោក ដោយចាត់ទុកលោក រ៉ាំស្វែល ជាមន្រ្តីសាធារណៈដ៏ពិសេស និងបុរសដ៏ល្អម្នាក់។

 

«លោកជាអ្នកបម្រើដ៏ស្មោះត្រង់របស់កងទ័ព ហើយអាមេរិកមានសុវត្ថិភាពជាងមុន និងល្អប្រសើរជាងមុនដោយសារការបំពេញការងាររបស់លោក។» អតីតប្រធានាធិបតីអាមេរិកនិយាយរំឭកគុណសម្បត្តិលោក រ៉ាំស្វែល បែបនេះ តែមិនបាននិយាយដល់ការឈ្លានពានអ៊ីរ៉ាក់ឡើយ។

 

បន្ទាប់ពីការឈ្លានពានអាហ្វហ្កានីស្ថាន លោក រ៉ាំស្វែល ក៏ចាប់ផ្ដើមដាក់គោលដៅលើលោក សាដាម ហ៊ូសេន មេដឹកនាំអ៊ីរ៉ាក់ ដែលលោកអះអាងថា មានអាវុធប្រល័យលោក និងអាចពាក់ព័ន្ធក្រុមភេរវកម្មផង។ ទីបំផុតទៅ អាមេរិកក៏មិនរកឃើញអាវុធប្រល័យលោកដែលអាមេរិកយកជាព័ស្តុតាងដើម្បីឈ្លានពានអ៊ីរ៉ាក់៕