កាលពីថ្ងៃទី៧​​​ ខែកក្កដា កូរ៉េខាងត្បូងរាយការណ៍ករណីឆ្លងថ្មីចំនួន១,២៧៥ករណី ហើយនៅថ្ងៃ​ទី៨ ខែកក្កដា ករណីឆ្លងថ្មីមាន១,៣១៦នាក់។ អាជ្ញាធរក៏ព្រមានថា ករណីឆ្លងប្រចាំថ្ងៃនឹងហក់ឡើងក្នុងកម្រិតខ្ពស់នៅពេលខាងមុខទៀត។

 

ដើម្បីទប់ស្កាត់ករណីឆ្លង រដ្ឋាភិបាលកូរ៉េខាងត្បូង សម្រេចដំឡើងកម្រិតសុវត្ថិភាពនៅទីក្រុងសេអ៊ូល និងតំបន់ជុំវិញដល់កម្រិតទីបួន ដែលជាកម្រិតខ្ពស់បំផុត។ ក្រោមវិធានការរឹតត្បិតដែលអនុវត្តនៅថ្ងៃទី១២ ខែកក្កដាទៅ ប្រជាជនត្រូវមិនអាចចេញពីផ្ទះតាមដែលអាចធ្វើទៅបាន។ សាលារៀន នឹងត្រូវបិទ ចំណែកឯការជួបជុំនៅទីសាធារណៈចាប់ពីម៉ោង៦ល្ងាច ត្រូវបានអនុញ្ញាតសម្រាប់មនុស្សចំនួនពីរ នាក់តែប៉ុណ្ណោះ។ 

 

រីឯការប្រមូលផ្តុំគ្នា និងការប្រារព្ធកម្មវិធីផ្សេងៗ នឹងត្រូវបានហាមឃាត់។ ក្លិបរាត្រី និងរង្គសាល ត្រូវបិទខណៈ​ភោជនីយដ្ឋាន និងហាងកាហ្វេត្រូវបានអនុញ្ញាតឱ្យមានភ្ញៀវចូលអង្គុយតែមានចំនួនកំណត់ ហើយត្រូវវេចខ្ចប់ចាប់ពីម៉ោង១០យប់។ នេះបើតាមការផ្សាយរបស់ទីភ្នាក់ងារព័ត៌មាន Yonhap ។

 

នាយករដ្ឋមន្រ្តីកូរ៉េខាងត្បូង លោក Kim Boo-kyum និយាយក្នុងកិច្ចប្រជុំរដ្ឋាភិបាលថា ករណី ឆ្លងជំងឺកូវីដ-១៩ នៅទីក្រុងសេអ៊ូលតែឯងមានរហូតដល់៥០០ករណីបីថ្ងៃជាប់ៗគ្នា។ អ្នកផ្ទុកជំងឺកូវីដ-១៩ បួននាក់ក្នុងចំណោមប្រាំនាក់ គឺមកពីទីក្រុងសេអ៊ូល និងតំបន់សំខាន់ៗដែលនៅជុំវិញ។

 

ទាក់ទងនឹងការដាក់វិធានការដ៏តឹងរ៉ឹងខាងលើនេះ  លោក Kim ក៏បានណែនាំឱ្យ សាធារណជនជៀសវាងការជួបជុំគ្នាដោយឯកជនណាមួយចាប់ពីថ្ងៃទី៩​ខែកក្កដានេះទៅតែម្ដង ទោះបីជា វិធានការនេះនឹងដាក់ចេញនៅថ្ងៃទី១២ ខែកក្កដាក៏ដោយ។ ជាមួយគ្នានេះ រដ្ឋាភិបាលកូរ៉េខាងត្បូង ក៏នឹងផ្អាកផែនការអនុញ្ញាតឱ្យប្រជាជនដែលបានចាក់វ៉ាក់សាំងយ៉ាងហោចណាស់មួយដូស មិនចាំបាច់ពាក់ម៉ាស និងអាចជួបជុំគ្នាខាងក្រៅបានទៀតផង។

 

បច្ចុប្បន្ន កូរ៉េខាងត្បូងមានករណីឆ្លងសរុបមានចំនួន១៦ម៉ឺនករណី និងអ្នកស្លាប់មានចំនួន ២ពាន់នាក់។ ប្រជាជនដែលបានចាក់វ៉ាក់សាំងរួចរាល់មានចំនួន១០ភាគរយនៃប្រជាជនសរុប ៥២លាននាក់។ ប្រមាណ៣០ភាគរយនៃមនុស្សចាស់អាយុ៦០ឆ្នាំឡើងទៅ បានទទួលការចាក់វ៉ាក់សាំងយ៉ាងហោចណាស់មួយដូស៕