នៅក្នុងកិច្ចសម្ភាសន៍ជាមួយសារព័ត៌មាន RAI sports ខ្សែការពាររូបនេះ បាននិយាយដូច្នេះ៖«វាគឺជាគ្រាប់បាល់ប្រវត្តិសាស្រ្តសម្រាប់អ៊ីតាលី វាបានក្លាយជាការពិតទាំងអស់នេះ គឺដោយសារគ្រូបង្វឹកនឹងកីឡាករទាំងមូល។ អ៊ីតាលីពេលនេះគឺខុសគ្នាពីពេលមុនខ្លាំងណាស់ ពួកយើងមានទំនុកចិត្ត ភាពច្បាស់លាស់ និងសាមគ្គី នេះជានិមិត្តរូបដែលនាំយើងឲ្យក្លាយជាវិរៈបុរសក្នុងពេលនេះ។ វាពិតជាអារម្មណ៍មួយប្លែកដោយមនុស្សប្រមាណ ៦៥០០០នាក់បានចាកចេញមុនពានរង្វាន់ត្រូវប្រគល់មកកាន់យើងដោយការគោរព ពេលនេះ ពានមួយនេះគឺនៅទីក្រុងរ៉ូម ខណៈពួកគេ(អ្នកគាំទ្រអង់គ្លេស)គិតថាវានឹងស្ថិតនៅទីក្រុមឡុងដ៍ ប៉ុន្តែអ៊ីតាលីបានផ្តល់មេរៀនមួយទៅកាន់ពួកគេ។»

 

ក្រុមរហ្សសនាមអាហ្សារូរី បានបង្ហាញទំនក់ចិត្តក្នុងការលេងបាល់វគ្គផ្តាច់ព្រ័ត្រទល់ក្រុមតោកំណាច ដោយតាមរកគ្រាប់បាល់ស្មើ១-១ និងយកឈ្នះនៅវគ្គបាល់កាត់សេចក្តី ១១ម៉ែត្រ ដោយលទ្ធផល ៣-២។ កីឡាករអង់គ្លេស៣រូប ដូចជា Marcus Rashford ,Jadon Sancho ព្រមទាំង Bukayo Saka ស៊ុតបាល់ពិន័យ១១ម៉ែត្រមិនចូល ៣ដងជាប់គ្នា បានធ្វើឲ្យពានរង្វាន់ជើងឯក Euro 2020 ធ្លាក់ទៅលើដៃអ៊ីតាលី៕