COVID-19
ជាតិ
គម្លាតចាក់វ៉ាក់សាំង Sinovac និងSinopharm ដូសទី១ និងទី២ ត្រូវដូរពី១៤ថ្ងៃ ទៅ២១ថ្ងៃ
× គម្លាតនៃការចាក់វ៉ាក់សាំង ប្រភេទស៊ីណូវ៉ាក់(Sinovac) និងស៊ីណូហ្វាម(Sinopharm)រវាងដូសទី១ និងទី២ ត្រូវដូរពី១៤ថ្ងៃ ទៅ២១ថ្ងៃវិញ។ នេះបើយោងតាមលិខិតជូនដំណឹងរបស់គណៈកម្មការចំពោះកិច្ចចាក់វ៉ាក់សាំងកូវីដ-១៩ ចុះថ្ងៃទី១៣កក្កដានេះ។
គណៈកម្មការចំពោះកិច្ចចាក់វ៉ាក់សាំងកូវីដ-១៩ មិនបានពន្យល់ពីមូលហេតុនៃការបន្ថែមគម្លាតមួយសប្តាហ៍បន្ថែមនេះទេ ប៉ុន្តែការដូរគម្លាតចាក់វ៉ាក់សាំងនៃម្ជុលទី១ និងទី២នេះ ធ្វើឡើងបន្ទាប់ មានចំណារយល់ព្រមពីសម្តេច ហ៊ុន សែន នាយរដ្ឋមន្ត្រីកម្ពុជា លើរបាយការណ៍របស់គណៈកម្មការប្រចាំការ នៃគណៈកម្មការប្រយុទ្ធប្រឆាំងជំងឺកូវីដ-១៩
គួរកត់សម្គាល់ថា គម្លាតនៃការចាក់វ៉ាក់សាំងរវាងដូសទី១ និងដូសទី២ របស់វ៉ាក់សាំង ស៊ីណូវ៉ាក់ និងស៊ីណូហ្វាម គឺមានរយៈពេល១៤ថ្ងៃ ឬ២សប្តាហ៍ប៉ុណ្ណោះ។
គិតមកទល់ពេលនេះ មានពលរដ្ឋជាង៥លាននាក់ហើយបានចាក់វ៉ាក់សាំងកូវីដ-១៩ ឬស្មើនឹងជាង៥០ភាគរយនៃផែនការចាក់លើពលរដ្ឋ១០លាននាក់។ ភាគច្រើននៃវ៉ាក់សាំងដែលបានចាក់ជូនពលរដ្ឋនោះ ជាប្រភេទស៊ីណូហ្វាម និងស៊ីណូវ៉ាក់ ខណៈវ៉ាក់សាំងប្រភេទ Covishield របស់ក្រុមហ៊ុន Astra Zeneca មានតែជាង៣០ម៉ឺនដូសប៉ុណ្ណោះ ឬស្មើនឹងពលរដ្ឋដែលមានវ័យចាប់ពី៦០ឆ្នាំឡើងទៅ តែជាង ១៥ម៉ឺននាក់ប៉ុណ្ណោះ៕
© រក្សាសិទ្ធិដោយ thmeythmey.com