អន្តរជាតិ
តំណាងមីយ៉ាន់ម៉ានៅ UN ថា សុវត្ថិភាពរបស់លោករងការគំរាម លោក Kyaw Moe Tun តំណាងមីយ៉ាន់ម៉ានៅអង្គការសហប្រជាជាតិ។
× តំណាងមីយ៉ាន់ម៉ាប្រចាំនៅអង្គការសហប្រជាជាតិ (UN) លោក Kyaw Moe Tun នៅថ្ងៃទី៤ ខែ សីហា បានប្រកាសថា សុវត្ថិភាពរបស់លោករងការគំរាម តែអាជ្ញាធរអាមេរិកបានបង្កើនការការពារ សន្តិសុខឱ្យរូបលោកហើយ។ ប្រេសិតរូបនេះ ត្រូវបានរបបយោធាមីយ៉ាន់ម៉ាបណ្ដេញពីតំណែងតាំងពី ចុងខែកុម្ភៈមក។
លោក Kyaw Moe Tun ធ្លាប់បានរិះគន់ជាសាធារណលើរដ្ឋប្រហារទម្លាក់រដ្ឋាភិបាលស៊ីវិល និងស្នើឱ្យអន្តរជាតិចាត់វិធានការរបបសឹក។ ជាការឆ្លើយតប មេដឹកនាំយោធាមីយ៉ាន់ម៉ាបានចោទ ប្រកាន់លោកពីបទក្បត់ប្រទេស និងសម្រេចដកតំណែងរបស់លោកជាអគ្គរដ្ឋទូតប្រចាំ UN ។ យ៉ាងណាមិញ បច្ចុប្បន្ន លោកនៅតែធ្វើការក្នុងតំណែងនេះពីព្រោះ UN មិនទាន់ទទួលស្គាល់រដ្ឋាភិបាលនោះទេ។
«ដូចដែលធ្លាប់បានរាយការណ៍ពីមុនមក សុវត្ថិភាពរបស់ខ្ញុំមានការគំរាម។ ប៉ូលិស កំពុងតែធ្វើការលើ រឿងនេះ ហើយប៉ូលិសបានផ្ដល់ការការពារសន្តិសុខដែលចាំបាច់»។ លោក Kyaw Moe Tun ប្រាប់ទីភ្នាក់ងារព័ត៌មាន Reuters បែបនេះ។
ព័ត៌មានលម្អិតជុំវិញការការពារសន្តិសុខសុវត្ថិភាពលោក Kyaw Moe Tun មិនទាន់មានឡើយ។ ការិយាល័យសហព័ន្ធស៊ើបអង្កេត (FBI) បដិសេធនិយាយរឿងនេះ ខណៈអ្នកនាំពាក្យក្រសួង ការបរទេសអាមេរិក និយាយថា ព័ត៌មានលម្អិតអំពីប្រតិបត្តិការការពារអ្នកការទូតបរទេស មិនត្រូវបានអនុញ្ញាតឱ្យមានការពិភាក្សាអ្វីឡើយ។
ទាក់ទងតំណែងអគ្គរដ្ឋទូតមីយ៉ាន់ម៉ានេះ បញ្ហានឹងផ្ទុះជាថ្មីនៅខែកញ្ញា ពេលដែល UN ត្រូវសម្រេចថា បន្តទទួលស្គាល់លោក Kyaw Moe Tun ឬត្រូវធ្វើការជាមួយតំណាងដែលតែងតាំងដោយរដ្ឋាភិបាលយោធា។ មហាសន្និបាតអង្គការសហប្រជាជាតិ មានតួនាទីជាអ្នកសម្រេចលើបញ្ហាដោយ បន្ទាប់ពីទទួលអនុសាសន៍ពីគណៈកម្មាធិការលិខិតសារតាំង។ គណៈកម្មាធិការនេះ នឹងជួបប្រជុំនៅខែកញ្ញា មុនសម័យប្រជុំលើកទី៧៦នៃមហាសន្និបាត។
គួររំលឹកថា កាលពីខែឧសភា នៅក្នុងលិខិតមួយផ្ញើជូនអគ្គលេខាធិការអង្គការសហប្រជាជាតិ រដ្ឋមន្ត្រីការបរទេសរបបយោធាមីយ៉ាន់ម៉ាលោក Wunna Maung Lwin បាននិយាយថា លោកបានតែងតាំងលោក Aung Thurein ជាអគ្គរដ្ឋទូតថ្មីមីយ៉ាន់ម៉ាប្រចាំនៅ UN ។ លោក Aung Thurein ជាសមាជិកយោធាមីយ៉ាន់ម៉ាចាប់តាំងពីឆ្នាំ១៩៩៥ ដល់ឆ្នាំ២០២១៕
© រក្សាសិទ្ធិដោយ thmeythmey.com