ជាតិ
សង្គមជាតិ
សេដ្ឋកិច្ច
អាមេរិកផ្តល់ថវិកា៤លានដុល្លារឲ្យកម្ពុជា សម្រាប់ប្រយុទ្ធប្រឆាំងកូវីដ-១៩
× ភ្នំពេញ៖ថវិកា៤លានដុល្លារដែលអាមេរិកនឹងផ្តល់ឲ្យកម្ពុជា សម្រាប់ប្រយុទ្ធប្រឆំាងជំងឺកូវីដ-១៩ គឺតាមរយៈទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ(USAID)។ នេះបើតាមសេចក្តីប្រកាសព័ត៌មានរបស់ស្ថានទូតអាមេរិកប្រចាំកម្ពុជា។
ជំនួយថវិកានេះ សម្រាប់កម្ពុជាគ្រប់គ្រងស្ថានការណ៍ ជាពិសេសបង្កើនការចាក់វ៉ាក់សាំង និងបង្កើនសមត្ថភាពធ្វើតេស្តរកជំងឺកូវីដ-១៩។ គិតមកដល់ពេលនេះ អាមេរិកបានផ្តល់ថវិកាចំនួន១១លានដុល្លារដល់កម្ពុជា សម្រាប់ប្រយុទ្ធនឹងជំងឺកូវីដ-១៩។
ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា លោក W. Patrick Murphy បានថ្លែងថា ថវិកានេះ ក៏ជាចំណែកមួយសម្រាប់លើកកម្ពស់សមត្ថភាពផ្នែកមន្ទីរពិសោធ ពង្រឹងជំនាញរបស់គ្រូពេទ្យ ក្នុងការមើលថែអ្នកជំងឺ និងរួមចំណែកស្តារសេដ្ឋកិច្ចឲ្យមានភាពល្អប្រសើរឡើង។
ឯកអគ្គរាជទូតអាមេរិកប្រចាំកម្ពុជាបានរៀបរាប់ដូច្នេះថា៖«ការលើកកម្ពស់សន្តិសុខផ្នែកសុខភាពសាកល និងការត្រៀមទប់ទល់នឹងការផ្ទុះឡើងនៃជំងឺ មានសារសំខាន់ណាស់ មិនត្រឹមតែដើម្បីការពារសុខភាព និងសុវត្ថិភាពតែប៉ុណ្ណោះទេ តែថែមទាំងដើម្បីធានាវិបុលភាពនៃសេដ្ឋកិច្ច និងការពារសន្តិសុខរបស់ប្រទេសយើងផងដែរ។ យើងមានមោទកភាពក្នុងការផ្តល់ការគាំទ្រនេះ ដែលនឹងជួយប្រជាជនកម្ពុជា ក្នុងការការពារខ្លួនគេ អ្នកជិតខាង និងអនាគតនៃសេដ្ឋកិច្ចរបស់គេ»។
សូមបញ្ជាក់ថា ចាប់ពីឆ្នាំ១៩៩២មក រដ្ឋាភិបាលអាមេរិកបានផ្តល់ថវិកាជាង១,៥៤ពាន់លានដុល្លារដល់កម្ពុជាសម្រាប់អភិវឌ្ឍលើផ្នែកសុខាភិបាល,បរិស្ថាន,កសិកម្ម,វិស័យអភិបាលកិច្ច, ការអភិវឌ្ឍតាមបែបប្រជាធិបតេយ្យ និងកម្មវិធីដោះគ្រាប់មីន និងយុទ្ធភ័ណ្ឌមិនទាន់ផ្ទះផងដែរ៕
© រក្សាសិទ្ធិដោយ thmeythmey.com