លោក Edouard Mathieu ប្រធានវេបសាយ ourworldindata បានបង្ហោះលើបណ្តាញសង្គមធ្វីតធឺ អំពីប្រទេសនិងដែនដីចំនួន១០ ដែលមានភាគរយនៃជនជនច្រើនជាងគេលើពិភពលោក បានចាក់វ៉ាក់សាំងបង្ការជំងឺកូវីដ-១៩ ក្នុងអំឡុងសប្តាហ៍មុន។ ប្រទេសនិងដែនដីទាំង១០នោះ រួមមាន កម្ពុជា១០,៣ភាគរយ, គុយបា១០ភាគរយ, ម៉ាឡេស៊ី១០ភាគរយ, ប៉ាណាម៉ា៩,៦ភាគរយ, អេក្វាទ័រ៨,៣ភាគរយ, សិង្ហបុរី៨ភាគរយ, ចិន៧,៩ភាគរយ, ស្រីលង្កា៧,៨ភាគរយ, អារ៉ាប៊ីសាអូឌីត៧,៦ភាគរយ, ហុងកុង៦,២ភាគរយ។ 

 

គិតមកដល់ថ្ងៃទី១១ ខែសីហា ឆ្នាំ២០២១ ក្នុងចំណោមប្រជាជនជិត៨ពាន់លាននាក់លើពិភពលោក មានប្រជាជនជាង៣០ភាគរយហើយ ដែលបានចាក់វ៉ាក់សាំងបង្ការជំងឺកូវីដ-១៩ សម្រាប់ដូសទី១ និងជាង១៥ភាគរយ បានចាក់រួចរាល់ (ទាំង២ដូស)។ នេះបើតាមតួលេខលើវេបសាយ ourworldindata ដដែល។

 

ដោយឡែកនៅកម្ពុជា គិតត្រឹមថ្ងៃទី១០ ខែសីហា ឆ្នាំ២០២១ ប្រជាជនជាង៨លាននាក់ហើយ ឬស្មើជាង៨០ភាគរយ ដែលបានចាក់វ៉ាក់សាំងបង្ការជំងឺកូវីដ-១៩ ក្នុងចំណោមប្រជាជន១០លាននាក់។ ប្រជាជន១០លាននាក់នេះ គឺគិតចាប់ពីអាយុ១៨ឆ្នាំឡើងទៅ ដែលរដ្ឋាភិបាល កំណត់គោលដៅថា ចាក់វ៉ាក់សាំងបង្ការជំងឺកូវីដ-១៩ឲ្យបានគ្រប់គ្នា។ 

 

កាលពីថ្ងៃទី១ ខែសីហា ឆ្នាំ២០២១ រដ្ឋាភិបាលកម្ពុជា បានចាប់ផ្តើមចាក់វ៉ាក់សាំងបង្ការជំងឺកូវីដ-១៩ ឲ្យកុមារ និងមនុស្សវ័យជំទង់អាយុចាប់១២ឆ្នាំដល់១៧ឆ្នាំបន្ថែមទៀត ដែលមានចំនួនប្រមាណ២លាននាន់។ រយៈពេល១០ថ្ងៃ ដោយគិតមកដល់ថ្ងៃទី១០ ខែសីហា ឆ្នាំ២០២១  កុមារ និងមនុស្សវ័យជំទង់ប្រមាណ៣៥ម៉ឺននាក់ ឬស្មើនឹង១៨ភាគរយហើយ ដែលបានចាក់វ៉ាក់សាំងបង្ការជំងឺកូវីដ-១៩៕