លោក Herbert Hainer ប្រធានក្លិប Bayern Munich បានប្រកាសលើវេបសាយក្លិបថា «ថ្ងៃនេះជាថ្ងៃដ៏ក្រៀមក្រំមួយសម្រាប់ក្លិប និងអ្នកគាំទ្រទាំងអស់ ក្រោយការបាត់បង់លោក Muller ដែលជាវីរបុរសខ្លួន»។
 

លោក Muller បានធ្លាក់ខ្លួនឈឺធ្ងន់ធ្ងរ នៅឆ្នាំ ២០១៥ ក្រោយលោកត្រូវគ្រូពេទ្យធ្វើរោគវិនិច្ឆ័យថា មានជំងឺ Alzheimer។ ៦ឆ្នាំក្រោយមក លោកស្លាប់ដោយសារជំងឺនេះតែម្តង។
 

លោក Muller ដែលគេចាត់ទុកថា ជាខ្សែប្រយុទ្ធឆ្នើមម្នាក់ក្នុងប្រវត្តិសាស្ត្របាល់ទាត់ បង្ហាញទេពកោសល្យដ៏អស្ចារ្យដោយរកបាន ៦៨គ្រាប់ ក្នុងការបង្ហាញខ្លួន៦២លើកឱ្យអាល្លឺម៉ង់ (អាល្លឺម៉ង់ខាងលិច) រួមទាំងគ្រាប់បាល់ឈ្នះនៅវគ្គផ្តាច់ព្រ័ត្រ World Cup ឆ្នាំ ១៩៧៤ ទល់នឹងហូឡង់ផងដែរ។
 

សម្រាប់ក្រុម Bayern Munich វិញ Muller រកបាន៥៤៧គ្រាប់ ក្នុងការប្រកួត៥៩៤លើក ក្នុងរយៈពេល១៥ឆ្នាំ និងជាប់ជាអ្នករកគ្រាប់បាល់ស៊ុតបញ្ចូលទីច្រើនជាងគេរហូតដល់៧ដងនៅ Bundesliga ទៀតផង។ 
 

ម្ចាស់ពាន Ballon d'Or ឆ្នាំ១៩៧០រូបនេះ បានជួយអាល្លឺម៉ង់ឈ្នះ World Cup នៅឆ្នាំជាមួយគ្នានោះ និងក៏ជាម្ចាស់ស្បែកជើងមាសប្រចាំព្រឹត្តិការណ៍ពិលោកនេះផងដែរ ដោយរកបាន១០គ្រាប់។
 

លោក Muller ធ្លាប់ប្រកបអាជីពជាកីឡាករបាល់ទាត់ឱ្យក្លិប៣រូបមាន 1861 Nördlingen ពីឆ្នាំ ១៩៦៣-៦៤ Bayern Munich ពីឆ្នាំ១៩៦៤-៧៩ និងចុងក្រោយក្រុមនៅលីគអាមេរិក Fort Lauderdale Strikers ពី១៩៧៩ដល់ ១៩៨១៕