ពាក្យចរចាមអារ៉ាមជាច្រើនបានកើតឡើងចំពោះ Cristiano Ronaldo ដែលត្រូវបានសារព័ត៏មាន រាយការណ៍ថា ម្ចាស់ពាន Ballon d’Or ៥លើករូបនេះ ទំនងអាចនឹងវិលត្រលប់មកកាន់ទឹកដី Santiago Bernabeu វិញ ក្រោយរូបគេចប់កិច្ចសន្យាជាមួយក្លិប Juventus នាឆ្នាំក្រោយ។ ក្នុងពាក្យចរចាមអារ៉ាមទាំងនោះ ក៏ត្រូវបានរាយការណ៍ដែរថាក្លិប Paris Saint Germain និង Manchester City ក៏បានបង្ហាញចំណាប់អារម្មណ៍ចង់បានរូបគេនាឆ្នាំក្រោយផងដែរ។ មិនចាំយូរខ្សែប្រយុទ្ធវ័យ ៣៦ឆ្នាំក៏បានចេញមកប្រតិកម្មភ្លាមនៅលើបណ្តាញសង្គម Instagram ដែរថារូបគេពិតជាទ្រាំនៅស្ងៀមមិនបានសោះ ដោយសារពាក្យពេចន៍ទាំងនោះ ព្រោះវាជាការមិនគោរពដល់រូបគេផងដែរ។
 

Ronaldo បានសរសេរនៅលើបណ្តាញ Instagram ជុំវិញរឿងអនាគតបន្តទៀតរបស់រូបគេថា៖«គ្រប់គ្នាបានដឹងច្បាស់ពីរូបខ្ញុំថាជាមនុស្សម្នាក់ ដែលតែងតែផ្តោតអារម្មណ៍លើការងាររបស់ខ្ញុំ ខ្ញុំមិនសូវនិយាយច្រើនជាងការបញ្ចេញសកម្មភាពនោះទេ ការផ្តោតអារម្មណ៍លើការងារគឺសឹងតែពេញក្នុងមួយអាជីពដែលខ្ញុំបានចូលលេងបាល់យូរណាស់មកហើយ។ ទោះជាយ៉ាងណាក៏ដោយខ្ញុំបានឃើញការសរសេរជាច្រើនក្នុងពេលថ្មីៗនេះ ខ្ញុំក៏ត្រូវតែចេញមកបកស្រាយនិងកំណត់គោលជំហររបស់ខ្ញុំផងដែរ»។ 

 

 

Ronaldo ក៏បន្ថែមទៀតថារូបគេមិនអាចទ្រាំនៅបន្តនៅស្ងៀមស្ងាត់ទៀតនោះទេដោយថាមិនអាចបណ្តោយឲ្យមនុស្សគ្រប់គ្នាយកឈ្មោះគេមកលេងសើចបាននោះទេ។ «វាប្រៀបដូចជាការមិនគោរពដល់រូបខ្ញុំទាល់តែសោះ សម្រាប់ខ្ញុំជាបុរសម្នាក់ក៏ជាកីឡាករម្នាក់ វាតូចតាចណាស់ដែលថាអនាគតរបស់ខ្ញុំត្រូវគ្របដណ្តប់ដោយប្រព័ន្ធផ្សពផ្សាយ ដូចមិនគោរពដល់ក្លឹបទាំងអស់ ដែលពាក់ព័ន្ធនឹងពាក្យចរចាមអារ៉ាមទាំងនេះ ក៏ដូចជាកីឡាកររបស់ក្លិបទាំងនោះដូចរូបខ្ញុំដែរ»។ នេះបើតាមខ្សែប្រយុទ្ធវ័យ៣៦ឆ្នាំ ដែលបានឆ្លើយតបពាក្យចរចាមអារ៉ាមថា រឿងរ៉ាវនៅក្លិប Real Madrid  បានកត់ត្រាទុករួចរាល់ហើយ វាប្រៀបបានទៅនឹងសារៈមន្ទីរមួយ នឹងជាអតីតក្លិបដ៏ល្អសម្រាប់រូបគេ។ 
 

ដោយឡែកអតីតគ្រូបង្វឹករបស់ Ronaldo គឺលោក Carlos Ancelotti ក៏បានជួយការពារ Ronaldo ដែរថា លោកបានគោរពស្រលាញ់ចំពោះកីឡាករខ្សែប្រយុទ្ធឆ្នើមសញ្ជាតិព័រទុយហ្គាល់រូបនេះ ហើយផ្តល់ការគោរពរៀងរហូត ។ លោក Ancelotti ក៏បានបញ្ចាក់ទៀតថា លោកត្រូវការផ្តោតអារម្មណ៍លើការដឹកនាំក្រុមបន្តទៅមុខតែប៉ុណ្ណោះ។