ជាតិ
ពីនេះ ពីនោះ
«តំណាល»មានន័យខុសពី«ដំណាល»ដូចម្តេច?
× «តំណាល» និង«ដំណាល»គឺជាពាក្យដែលមានសូរសៀងស្រដៀងគ្នា។ ប៉ុន្តែពាក្យទាំងពីរនេះមានន័យខុសគ្នា។ នេះបើតាមវចនានុក្រមខ្មែរសម្តេចព្រះសង្ឃរាជ ជួន ណាត។
«តំណាល» មានថ្នាក់ពាក្យជាកិរិយាសព្ទផង និងនាមសព្ទផង។ ជាកិរិយាសព្ទ«តំណាល» មានន័យថា និយាយបូរបាច់, ប្រាប់, ថ្លែង, ពោល ពណ៌នា នូវរឿង, ហេតុ, ដំណើរ អ្វីមួយ ដែលកន្លងហួសទៅ យូរហើយ ឲ្យគេស្ដាប់។ ជីតាខ្ញុំបានតំណាលថា កាលជំនាន់គាត់ពីក្មេង ក្នុងប្រទេសខ្មែរយើង ស្រូវ ៨០ ថាំងរាយថ្លៃមួយណែន (១៦ រៀល), ប៉ុន្តែកាលក្នុងជំនាន់នោះក្រប្រាក់ណាស់, ខ្ញុំចេះរឿងនេះដោយសារចាស់ៗតំណាលប្រាប់។
«តំណាល» មានថ្នាក់ពាក្យជានាមសព្ទ មានន័យថា រឿងក្នុងសម័យបុរាណព្រេងនាយ, រឿងដែលគេបានដឹងដោយសារចាស់ទុំនិយាយប្រាប់តៗគ្នាមក, ច្រើនប្រើផ្សំជាមួយនឹងពាក្យ រឿង មានទំនងស្ទើរជា គុ. : រឿងតំណាល រឿងបរម្បរា។
ចំណែក«ដំណាល» មានថ្នាក់ពាក្យជាគុណសព្ទ មានន័យថា ដែលស្មើអាយុគ្នា, ស្មើឆ្នាំគ្នា, ស្មើកាលគ្នា។ អ្នកនឹងខ្ញុំកើតឆ្នាំដំណាលគ្នា; ចេញទៅក្នុងពេលដំណាលគ្នា ។ «ដំណាល»មានថ្នាក់ពាក្យជាកិរិយាសព្ទវិសេសន៍ មានន័យថា ព្រមគ្នា, ជាមួយគ្នា។ ទៅដំណាលគ្នា, មកដល់ដំណាលគ្នា៕
© រក្សាសិទ្ធិដោយ thmeythmey.com