បើតាមរបាយការណ៍របស់ក្រសួងសុខាភិបាល ក្នុងចំណោមរាជធានីខេត្តទាំង២៣ ដែលតេស្តឃើញជំងឺកូវីដ-១៩បំប្លែងថ្មី«Delta»ច្រើនជាងគេ គឺខេត្តរាជធានីភ្នំពេញមាន១៦៨ករណី ខេត្តឧត្តរមានជ័យ១៦៥ករណី សៀមរាប១៣០ករណី និងបន្ទាយមានជ័យ១១៦។ 

 

ចំពោះខេត្តព្រះវិហារមាន៤២ករណី,ខេត្តស្វាយរៀង៣០ករណី,​ខេត្តកំពង់ធំ៣៤ករណី ខេត្តបាត់ដំបង២២ករណី, ប៉ៃលិន២៧ករណី,ត្បូងឃ្មុំ១២ករណី,កំពង់ចាម១៨ករណី និងកណ្តាល២៣ករណី។​

 

សម្រាប់ខេត្តរតនៈគិរី កំពង់ស្ពឺ,ព្រៃវែង,កំពត,​ស្ទឹងត្រែង,​កំពង់ឆ្នាំង,ពោធិ៍សាត់,​កោះកុង,មណ្ឌលគិរី,ព្រះសីហនុ និងតាកែវ គឺសុទ្ធតែមានត្រឹម១០ករណីចុះក្រោម។ ចំណែកខេត្តកែប និងខេត្តក្រចេះ​ គឺមិនទាន់មានករណីវិជ្ជមានកូវីដ-១៩បំប្លែងថ្មី«ដែលតា»នៅឡើយទេ។ នេះបើតាមរបាយការណ៍របស់ក្រសួងសុខាភិបាល។ 

 

លោក ម៉ម ប៊ុនហេង រដ្ឋមន្ត្រីក្រសួងសុខាភិបាល សង្កេតឃើញថា ការចម្លងជំងឺកូវីដ-១៩ក្នុងសហគមន៍មានសន្ទុះកើនឡើង គឺដោយសារតែមានក្រុមយុវជនមួយចំនួន បានដើរចេញក្រៅផ្ទះ ឬជួបជុំមិត្តភក្តិ ដោយមិនអនុវត្តតាមវិធានការសុខាភិបាលឲ្យបានត្រឹមត្រូវ។ 

 

រដ្ឋមន្ត្រីក្រសួងសុខាភិបាល បានណែនំាដល់ពលរដ្ឋត្រូវប្រុងប្រយ័ត្ន ចេះការពារខ្លួន និងអនុវត្តតាមវិធានការសុខាភិបាលឲ្យបានខ្ជាប់ខ្ជួន ទើបជៀសផុតពីជំងឺកូវីដ-១៩។

 លោករដ្ឋមន្ត្រីក្រសួងសុខាភិបាលបានក្រើនរំលឹកដល់ពលរដ្ឋដូច្នេះថា៖«សូមអំពាវនាវដល់យុវវ័យគ្រប់រូប សូមចូលរួមអនុវត្តនូវគោលការណ៍ណែនាំរបស់ក្រសួងសុខាភិបាល ដើម្បីការពារខ្លួនឯង កុំនាំវីរុសកូវីដ-១៩​មកចូលផ្ទះ និងដើម្បីការពារសមាជិកគ្រួសាររបស់ខ្លួន ជាពិសេសឪពុកម្តាយ ជីដូន ជីតា ឬអ្នកមានជំងឺប្រចាំកាយក្នុងគ្រួសារ»។​

 

មកទល់ពេលនេះ កម្ពុ​ជាមាន​អ្នក​ឆ្លង​កូ​វីដ​-១៩ សរុប ៨៨.២៤២​នាក់ ក្នុងនោះ១៣.៨០៤ ជា​ករណី​នាំចូល​។ អ្នកជា​សះស្បើយ​មាន​៨៣.៨៥១​នាក់  និង​ស្លាប់​សរុប ១.៧៦២​នាក់​៕