ជាតិ
ទូកលើគោក៖ អ្នកនេសាទមួយគ្រួសារ យកទូកធ្វើផ្ទះរស់នៅលើគោក តាមដីសាធារណៈ ផ្ទះ-ទូក របស់ ប៊ូត ប៊ុនឡំ និងគុយ កូឡាប នៅលើចិញ្ចើមផ្លូវសាធារណៈ។ រូបភាព៖ ឈុត ឈាណា
× ប៊ូត ប៊ុនឡំ និង គុយ កូឡាប ព្រមទាំងកូនស្រីពីរ ប្រុសម្នាក់ រស់នៅក្នុងទូក តែមិននៅលើទឹកទេ។ ពួកគេបានច្នៃទូករបស់ពួកគេធ្វើជាផ្ទះ ហើយចតនៅលើដីសាធារណៈក្បែរផ្លូវ ជាប់វត្តកំពង់ឃ្លាំង ឃុំកំពង់ឃ្លាំង ស្រុកសូត្រនិគម ខេត្តសៀមរាប។ ទូកនេះ គឺជាចំណងដៃអាពាហ៍ពិពាហ៍ ពីឪពុកម្តារបស់យកូឡាប កាលពីជាង ១០ឆ្នាំមុន សម្រាប់ពួកគេប្រកបរបរនេសាទត្រីចិញ្ចឹមជីវិត។ ប៉ុន្តែ រយៈពេល៤-៥ឆ្នាំចុងក្រោយនេះ កម្រិតកម្ពស់ទឹកបឹងទន្លេសាបមានការប្រែប្រួល បានធ្វើឱ្យផលនេសាទធ្លាក់ចុះយ៉ាងខ្លាំងស្ទើរតែ ៧០ភាគរយ។
ប៊ូត ប៊ុនឡំ និងគុយ កូឡាប ព្រមទាំងកូនទាំងបីនៅក្នុងទូកលើគោក។ រូបភាព៖ ឈុត ឈាណា
ទូក ត្រូវការជួសជុលជាចាំបាច់។ ចំណូលបានមកពីការនេសាទ មិនគ្រប់នឹងការចំណាយលើការចេញទៅនេសាទត្រី។ ប្តីប្រពន្ធមួយគូនេះ ក៏បានសម្រេចចិត្តឈប់ចេញទៅនេសាទត្រីដោយខ្លួនឯង។ ប៊ូត ប៊ុនឡំ និយាយថា៖ «ខ្ញុំចេញទៅនេសាទដែរ ប៉ុន្តែពុំបានត្រី។ ខាតប្រាក់លើថ្លៃប្រេងឥន្ធនៈរហូត។ ខ្ញុំក៏សម្រេចចិត្តឈប់ចេញទៅនេសាទដោយខ្លួនឯង ហើយស៊ីឈ្នូលនេសាទត្រីឱ្យគេជំនួសវិញ។ ខ្ញុំគ្មានដីកម្មសិទ្ធិសម្រាប់សង់ផ្ទះឡើយ។ ទឹកជំនន់រដូវវស្សាចូលមកដល់ ខ្ញុំអូសទូក-ផ្ទះ ទៅរកទីទួលសុវត្ថិភាពស្នាក់នៅបណ្តោះអាសន្ន។ ពេលទឹកស្រក ខ្ញុំអូសទូក-ផ្ទះមកចតក្បែរវត្ត លើដីចំណីផ្លូវសាធារណៈវិញ ដូចឃើញក្នុងរូបភាពនេះស្រាប់»។
ប៊ូត ប៊ុនឡំ និងគុយ កូឡាប ព្រមទាំងកូនទាំងបីនៅខាងក្រៅទូក។ រូបភាព៖ ឈុត ឈាណា
បឹងទន្លេសាប គឺជាបឹងដ៏ល្បីដែលសម្បូរទៅដោយជីវៈចម្រុះ។ ទោះយ៉ាងណា បច្ចុប្បន្ននេះ បឹងទន្លេសាប ហាក់សម្បូរដោយអ្នកនេសាទ តែខ្សត់ត្រីទៅវិញ។ ស្ថានភាពបែបនេះ បានធ្វើឱ្យអ្នកនេសាទជាច្រើនគ្រួសារ បោះបង់របរតកូនតចៅនេះចោល ទៅប្រកបរបរចិញ្ចឹមជីវិតផ្សេងវិញ។ គ្រួសារខ្លះ បានសម្រេចចិត្តធ្វើចំណាកស្រុក ទៅរកការងារតាមទីប្រជុំជននានា ខណៈគ្រួសារខ្លះ ដែលរកឃើញវិធីសាស្រ្តថ្មី ក៏នៅបន្តរបរនេសាទត្រីតទៅទៀត ដូចគ្រួសារ ប៊ូនឡំ ជាដើម។ ឯគ្រួសារខ្លះ ទៅបានកាប់រានព្រៃលិចទឹកជុំវិញបឹង ដើម្បីដាំដំណាំផ្សេងៗ ដែលជាកត្តាគំរាមកំហែងយ៉ាងខ្លាំងបន្ថែមទៀត ដល់ធនធានជលផលក្នុងបឹង។
គម្រោងអច្ឆរិយភាពនៃទន្លេមេគង្គ សូមអំពាវនាវដល់ប្រជានេសាទ ដែលរស់នៅក្បែរព្រៃលិចទឹកជុំវិញបឹងទន្លេសាប សូមមេត្តាកុំកាប់រានព្រៃលិចទឹកដ៏មានសារៈសំខាន់នេះ។ សូមចូលរួមថែរក្សាការពារបឹងទន្លេសាប កុំឱ្យទៅក្លាយទៅជាបឹងសម្បូរដោយអ្នកនេសាទតែខ្សត់ត្រី នាថ្ងៃអនាគត៕
© រក្សាសិទ្ធិដោយ thmeythmey.com