ក្នុងរបាយការណ៍ថ្ងៃទី៣១ ខែសីហា WHO ប្រកាសថា វីរុសបំប្លែងខ្លួនថ្មី «Mu» ឬតាមបែបវិទ្យាសាស្ត្រ B.1.621 ត្រូវបានដាក់បញ្ចូលក្នុងចំណោមក្រុមវីរុសដែលត្រូវចាប់អារម្មណ៍ (Virus of Interest) ។ WHO បញ្ជាក់ពីហានិភ័យនៃវីរុសប្រភេទថ្មីនេះថា អាចផ្លាស់ប្តូរហ្សែនរបស់ខ្លួនដែលធុននឹងវ៉ាក់សាំង និងគេចចេញពីប្រព័ន្ធភាពស៊ាំរបស់មនុស្សទៀតផង។ 

ទន្ទឹមនេះ  WHO ក៏បានសង្កត់ធ្ងន់ថា ត្រូវមានការសិក្សាបន្ថែមទៀតដើម្បីស្វែង យល់ឱ្យកាន់តែច្បាស់ពីសមត្ថភាព និងការវិវត្តន៍របស់វីរុសនេះ។
 

បច្ចុប្បន្ន WHO បានកំណត់អត្តសញ្ញាណវីរុសកូវីដ-១៩ បំប្លែងខ្លួនដែលគួរឱ្យបារម្ភចំនួន៤ រួមមានអាល់ហ្វា, បែតា, ហ្កាមា, និងដែលតា។ អាល់ហ្វាមានវត្តមាននៅក្នុងប្រទេសចំនួន១៩៣ និងដែលតាមានវត្តមាននៅក្នុងប្រទេសចំនួន ១៧០ ។ ចំណែកវីរុសកូវីដ-១៩បំប្លែងខ្លួនចំនួន៥ ប្រភេទផ្សេងទៀតរួមទាំង «Mu» ផង កំពុងត្រូវបានត្រួតពិនិត្យបន្ថែម។

វីរុសកូវីដ-១៩បំប្លែងខ្លួន «Mu» នេះ ត្រូវបានគេរកឃើញនៅប្រទេសផ្សេងទៀតក្រៅពីកូឡុំប៊ីនៅ បណ្តាប្រទេសអាមេរិកខាងត្បូង និងអឺរ៉ុបជាដើម។
 

គួរបញ្ជក់ថា ពិភពលោកកំពុងមានការព្រួយបារម្ភយ៉ាងខ្លាំងចំពោះការលេចឡើងនៃវីរុស បំប្លែងខ្លួនថ្មី ខណៈអត្រាឆ្លងនៃវីរុសបំប្លែងខ្លួនដែលតាបានកើនឡើងជាថ្មីម្តងទៀត។ វីរុស ដែលតាងាយចម្លងទៅកាន់ក្រុមមនុស្សណាដែលមិនបានទាន់ចាក់វ៉ាក់សាំង និងស្ថិតក្នុងតំបន់ ណាដែលវិធានការរឹតត្បិតត្រូវបានបន្ធូរបន្ថយ៕