ក្រុមអ្នកជំនាញអន្តររដ្ឋាភិបាលស្តីពីបម្រែបម្រួលអាកាសធាតុ (IPCC) ដែលជាស្ថាប័នវិទ្យាសាស្ត្រអាកាសធាតុរបស់អង្គការសហប្រជាជាតិ បានចេញរបាយការណ៍ស្តីពីអាកាសធាតុសម្រាប់ឆ្នាំ២០២១ ថា ដើម្បីឱ្យការបំភាយឧស្ម័នផ្ទះកញ្ចក់ត្រូវបានកាត់បន្ថយ វាគួរតែមានការផ្លាស់ប្តូរមួយចំនួនក្នុងវិស័យពាក់ព័ន្ធនឹងការបំភាយឧស្ម័នដូចជា វិស័យអគ្គិសនី ការសាងសង់ និងវិស័យគមនាគមន៍។ 

 

ការបំភាយឧស្ម័នផ្ទះកញ្ចក់ទៅក្នុងបរិយាកាសអាចកាត់បន្ថយបាន តាមរយៈសកម្មភាពមួយចំនួនដូចជា ការហាមឃាត់ឧស្សាហកម្មឥន្ទនៈផូស៊ីល, ការប្រើប្រាស់ថាមពលកកើតឡើងវិញជំនួសការប្រើប្រាស់ចំហេះធ្យូងថ្ម, រួមទាំងការកាត់បន្ថយមធ្យោបាយធ្វើដំណើរប្រើសាំងដោយប្តូរទៅប្រើយានយន្តអគ្គិសនី ឬក៏ជំនួសដោយការជិះកង់ និងដើរជាដើម។ នេះបើតាមការចុះផ្សាយលើសារព័ត៌មាន The Conversation។

 

វិធីសាស្ត្រទាំងអស់នេះ គឺជាអ្វីដែលអាចធ្វើទៅបាន ដើម្បីចូលរួមកាត់បន្ថយការបំភាយឧស្ម័នផ្ទះកញ្ចក់ទៅក្នុងបរិយាកាស។ ផ្ទុយទៅវិញ វាមានឧបសគ្គសំខាន់ជាមូលដ្ឋាននៃនយោបាយដែលរំខានដំណើរការកាត់បន្ថយការបំភាយឧស្ម័នផ្ទះកញ្ចក់ មិនឱ្យសម្រេចបាន។

 

ជាក់ស្តែង ក្រុមហ៊ុនផលិតថាមពលដើរដោយឥន្ធនៈផូស៊ីល បានព្យាយាមទប់ស្កាត់គ្រប់សកម្មភាពដែលគំរាមកំហែងដល់ប្រាក់ចំណូលនៃអាជីវកម្មរបស់ក្រុមហ៊ុន។ ពួកគេ បានព្យាយាមបញ្ចុះបញ្ចូលរដ្ឋាភិបាលឱ្យបន្ធូរបន្ថយច្បាប់ ដោយប្រាក់ទំនុកបម្រុងរបស់ក្រុមហ៊ុន ចំពោះរដ្ឋាភិបាល។ សូម្បីតែនៅក្នុងប្រទេស ដែលមានគោលនយោបាយអាកាសធាតុតឹងរ៉ឹងក៏ដោយ ក៏រងឥទ្ធិពលឧស្សាហកម្មប្រេងឥន្ធនៈផូស៊ីលដែរ។ វានៅតែកើនឡើងជាលំដាប់ដូចជា អង់គ្លេស ដែលបន្តគាំទ្រប្រេង និងឧស្ម័ននៅសមុទ្រខាងជើង។

 

មួយវិញទៀត វិសមភាពសកលក្នុងការបញ្ចេញឧស្ម័នផ្ទះកញ្ចក់ទៅក្នុងបរិយាកាសនៅតែជាបញ្ហាសំខាន់ដែលត្រូវដោះស្រាយផងដែរ។ បើទោះបីជា ប្រទេសតូចៗមួយចំនួនបានសម្រេចអព្យាក្រឹតកាបូនរួចទៅហើយក្តី ភពផែនដីនៅតែកើនឡើងកម្តៅព្រោះតែប្រទេសឧស្សាហកម្មធំៗបានបំភាយឧស្ម័នយ៉ាងច្រើនលើសលប់ទៅក្នុងបរិយាកាស។ 

 

គួរបញ្ជាក់ថា អ្វីដែលជាឧបសគ្គចម្បងនៃការកាត់បន្ថយការបំភាយឧស្ម័នផ្ទះកញ្ចក់ទៅក្នុងបរិយាកាសនាពេលបច្ចុប្បន្ន គឺជំងឺកូវីដ-១៩ ដែលបានបង្អាក់សកម្មភាព ព្រមទាំងពន្យារពេលប្រកាសគោលនយោបាយថ្មីស្តីពីបញ្ហាអាកាសធាតុជាសកល ដោយបែរទៅផ្តោតការយកចិត្តទុកដាក់លើការស្តារសេដ្ឋកិច្ចជាតិជាមុនសិន៕