«ខ្ញុំចូលចិត្តបំផុត គឺនយោបាយឈ្នះៗ តែពុំមែនសំដៅលើឈ្នះលើប្រជានជន កៀបសង្កត់ប្រជាជន និងបំបិទសិទ្ធិបញ្ចេញមតិអ្វីនោះទេ។ ឈ្នះៗត្រង់ថា គេធ្វើឱ្យប្រជាជនរស់នៅដោយចុះសម្រុងនឹងគ្នា សេដ្ឋកិច្ចជាតិរីកចម្រើន ប្រព័ន្ធច្បាប់ដំណើរការល្អ មានយុត្តិធម៌ និងបង្កើតបាននូវប្រព័ន្ធអប់រំស្មើភាព (អ្នកក្រ អ្នកមាន មានសិទ្ធិទទួលបានការអប់រំល្អដូចគ្នា)»។ នេះបើតាមយុវជន ពូលី ដោយពន្យល់ថា ខ្លួនមិនសូវខ្វល់ពីនយោបាយសេរី ឬកុម្មុយនិស្តទេ។ ប៉ុន្តែលោកចង់ឃើញ អ្នកនយោបាយ យល់ពីចរន្តសកល ដែលអាចលើកកម្ពស់សេដ្ឋកិច្ច និងការអភិវឌ្ឍជាតិដ៏ត្រឹមត្រូវ ហើយមិនធ្វើឲ្យពលរដ្ឋ និងជាតិរងគ្រោះ។ 
 

តែយ៉ាងណាក៏ដោយ គេមិនអាចសន្និដ្ឋានបានទាំងស្រុងថា នយោបាយបែបប្រមាថ និងចោទប្រកាន់គ្នា មិនអាចទាញសំឡេងអ្នកគាំទ្រឡើយ។ នេះបើតាមលោក មាស នី ដែលបានបន្ថែមថា ការជឿ ឬមិនជឿលើអ្នកនយោបាយ លុះត្រាតែពលរដ្ឋ មានការយល់ដឹងច្រើន ទើបគេចផុតពីនយោបាយប្រជាភិថុត។ ប៉ុន្តែបើពលរដ្ឋ នៅតែឱ្យតម្លៃលើអ្នកនយោបាយ ដែលហ៊ាននិយាយរិះគន់ និងប្រើសម្តីវាយប្រហារគ្នាខ្លាំងៗ នោះស្ថានភាពនយោបាយកម្ពុជា ក៏នៅតែអាក្រក់ដែរ។
 

«កាលណាអ្នកនយោបាយ នៅតែបន្តចោទប្រកាន់ ជេរប្រមាថគ្នា នឹងធ្វើឲ្យតម្លៃខ្លួន កាន់តែទាបៗទៅ។ ហើយជាទម្លាប់អាក្រក់មួយទៀត របស់អ្នកនយោបាយខ្មែរ ពេលមានទំនាស់គ្នាមិនចំណាយពេលដោះស្រាយទេ បែរទៅឲ្យបរទេសជួយ ហើយវាបង្ហាញថា ខ្មែរនឹងខ្មែរ មិនអាចដោះស្រាយគ្នាបាន»។ នេះបើតាមលោក មាស នី អ្នកតាមដានបញ្ហាសង្គម ដែលបានបន្ថែមថា នយោបាយឈប់ប្រើយុទ្ធសាស្របែបចាស់គំរិលទៀត ដែលអាចនាំកម្ពុជា ធ្លាក់ចូលក្នុងភូមិសាស្រ្តនយោបាយ។