អន្តរជាតិ
នយោបាយអន្តរជាតិ
រដ្ឋមន្ត្រីទទួលបន្ទុកគ្រប់គ្រងគ្រោះអាសន្នរុស្ស៊ី ស្លាប់ ក្រោយលោតទៅជួយអ្នកថតរូបម្នាក់
× លោក Yevgeny Zinichev រដ្ឋមន្ត្រីទទួលបន្ទុកគ្រប់គ្រងស្ថានការណ៍គ្រោះអាសន្នរុស្ស៊ី បានទទួលមរណភាព បន្ទាប់ពីលោកបានលោតទៅជួយសង្គ្រោះជីវិតអ្នកថតម្នាក់ ដែលបានដួល នាអំឡុងពេលហ្វឹកហាត់សង្គ្រោះបន្ទាន់ នៅតំបន់ Arctic ក្រុង Norilsk។
«រដ្ឋមន្ត្រីក្រសួងគ្រប់គ្រងស្ថានការណ៍គ្រោះអាសន្ន
លោក Yevgeny Zinichev បានទទួលមរណភាពដ៏រន្ធត់ ក្រោយព្យាយាមសង្គ្រោះជិវិតមនុស្សម្នាក់ នាអំឡុងពេលនៃពិធីហ្វឹកហាត់នៅ Artic»។ នេះជាការអះអាងនៅក្នុងសេចក្តីថ្លែងការណ៍ផ្ទាល់របស់ក្រសួង ដែលត្រូវបានដកស្រង់ដោយ AFP។
និពន្ធនាយិកាសារព័ត៌មាន RT លោកស្រី Margarita Simonyan បានបញ្ជាក់ថា រដ្ឋមន្ត្រីវ័យ៥៥ឆ្នាំរូបនេះ បានព្យាយាមលោតទៅជួយអ្នកថតរូបម្នាក់ ដែលបានធ្លាក់ពីលើច្រាំងថ្មចោតមួយ។
«អំពីលោក Zinichev, គាត់ និងអ្នកថតរូបបានឈរក្បែរគ្នានៅលើចំណោតថ្មមួយ។ អ្នកថតរូបបានរអិល និងធ្លាក់ចុះ...មុនពេលដែលអ្នកដទៃមិនបានចាប់ភ្លឹកនូវអ្វីដែលបានកើតឡើង លោក Zinichev បានលោតទៅជួយ ក្រោយពេលដែលអ្នកថតរូបនេះ បានធ្លាក់ និងបោកទៅនឹងផ្ទាំងថ្ម»។
យោងតាម AFP មិនមានរបាយការណ៍បញ្ជាក់ពីពេលវេលាស្លាប់ពិតប្រាកដនោះឡើយ។ លោកប្រធានាធិបតី Vladimir Putin ត្រូវជូនដំណឹងផងដែរពីករណីមរណភាពនេះ។
លោក Zinichev គឺជាអតីតសមាជិកម្នាក់នៃភ្នាក់ងារសន្តិសុខ KGB របស់សហភាពសូវៀត បន្ទាប់មកលោកទទួលខុសត្រូវលើការងារសន្តិសុខលោក ពូទីន ចន្លោះពីឆ្នាំ២០០៦ ដល់ឆ្នាំ២០១៥។ ចាប់តាំងពីខែឧសភា ឆ្នាំ២០១៨ លោកត្រូវបានតែងតាំងជារដ្ឋមន្ត្រីទទួលបន្ទុកគ្រប់គ្រងស្ថានការណ៍គ្រោះអាសន្ន និងជាសមាជិកក្រុមប្រឹក្សាសន្តិសុខរុស្ស៊ីផងដែរ៕
© រក្សាសិទ្ធិដោយ thmeythmey.com