ទីក្រុងហូជីមិញ ជាចំណុចកណ្ដាលនៃរលកឆ្លងជំងឺកូវីដ-១៩ នៅវៀតណាម។ រដ្ឋាភិបាលវៀតណាម បានចាត់វិធានការតឹងរ៉ឹងដើម្បីទប់ស្កាត់ករណីឆ្លងដែលប៉ះពាល់ខ្លាំងដល់សកម្មភាពាណិជកម្ម និងឧស្សាហកម្មនៅតំបន់ភាគខាងត្បូងប្រទេស។ ខណៈស្ថានការណ៍ហាក់ធូរស្រាលបន្តិច អាជ្ញាធរទីក្រុង ចាប់ផ្ដើមបន្ធូរវិធានការរឹតត្បិតដើម្បីស្តារសេដ្ឋកិច្ច និងជំរុញកំណើនសេដ្ឋកិច្ចឡើងវិញក្រោយធ្លាក់ចុះយ៉ាងគំហុក។
 

រាល់ចំណុតត្រួតពិនិត្យទាំងអស់នឹងត្រូវដកចេញហើយមិនមានការហាមឃាត់ធ្វើដំណើរបន្ទាប់ពីថ្ងៃនេះ។ លោក​ Le Hoa Binh អនុប្រធានគណៈកម្មធិការប្រជាជនក្រុង បានបញ្ជាក់បែបនេះទៅកាន់សន្និសីទសារព័ត៌មាន​ មុនបន្ថែមថា​៖« យើងកំពុងបើកដំណើរការជាបណ្តើរៗហើយ ប៉ុន្តែសូមគិតពីសុវត្តិភាពប្រជាជនជាមុនសិន។»

លោក​ Binh បញ្ជាក់ថា ចាប់ពីថ្ងៃទី១ ខែតុលា សួនឧស្សាហកម្មក្នុងក្រុងហូជីមិញ ​គម្រោងសាងសង់នានា ផ្សារទំនើប ហាងកាត់សក់ កន្លែងបដិសណ្ឋារកិច្ច និងភោជនីយដ្ឋានសម្រាប់ទទួលការវិចខ្ចប់នឹងបើកដំណើរការឡើងវិញ។
 

គិតត្រឹមថ្ងៃទី៣០ ខែកញ្ញា វៀតណាមបានកត់ត្រាករណីឆ្លងសរុបចំនួន​៧៧៩,៣៩៨នាក់ ​និងស្លាប់១៩,០៩៨នាក់។ ឯអត្រាប្រជាជនបានទទួលវ៉ាក់សាំងបង្ការជំងឺកូវីដ-១៩ ទូទាំងប្រទេសមានចំនួន ៣៣,០១ភាគរយ ដោយអ្នកទទួលវ៉ាក់សាំងបានពេញលេញមានចំនួនត្រឹម៩,២៦ភាគរយ​ប៉ុណ្ណោះ៕​