អតីតប្រធានាធិបតីបារាំង ត្រូវតុលាការកាត់ទោសឱ្យជាប់ពន្ធនាគារ ១ឆ្នាំ

អន្តរជាតិ

នយោបាយអន្តរជាតិ

អតីតប្រធានាធិបតីបារាំង ត្រូវតុលាការកាត់ទោសឱ្យជាប់ពន្ធនាគារ ១ឆ្នាំ

30, Sep 2021 , 9:12 pm

រូបភាព

អតីតប្រធានាធិបតីបារាំងលោក Nicolas Sarkozy។ រូបភាព៖ AP

ដោយ: ធៀន ភារិន្ទ

អតីតប្រធានាធិបតីបារាំង លោក Nicolas Sarkozy ត្រូវបានតុលាការបារាំង នៅថ្ងៃទី៣០ ខែកញ្ញា កាត់ទោសឱ្យជាប់ពន្ធនាគារ ១ឆ្នាំ ដោយសារមូលនិធិមិនស្របច្បាប់ពាក់ព័ន្ធនឹងយុទ្ធនាការបោះឆ្នោតកាល២០១២។

លោក Nicolas Sarkozy អតីតប្រធានាធិបតីបារាំង ត្រូវបានតុលាការក្រុងប៉ារីសរកឃើញថា បានចំណាយថវិកាច្រើនជាង ១០លានយូរ៉ូ លើយុទ្ធនាការឃោសនាបោះឆ្នោតក្នុងឆ្នាំ២០១២ ។ ការចំណាយនេះ គឺលើសពីចំនួនថវិកាដែលមានចែងនៅក្នុងច្បាប់។ តាមរយៈការរកឃើញកំហុសនោះ តុលាការ បានកាត់ទោសឱ្យលោក Sarkozy ជាប់ពន្ធនាគារ ១ឆ្នាំ ប៉ុន្តែតុលាការ អនុញ្ញាតឱ្យលោកអនុវត្តទោសនៅផ្ទះ ដោយមានពាក់កងដៃអេឡិចត្រូនិច ដើម្បីតាមដាន។

យ៉ាងណាមិញ អតីតប្រធានាធិបតីបារាំង បដិសេធកំហុសទាំងនោះ ហើយនឹងប្តឹងជំទាស់នឹងសេចក្តីសម្រេចនោះ។

នេះជាសេចក្ដីសម្រេចលើកទីពីរហើយ ដែលតុលាការកាត់ទោសឱ្យលោក Sarkozy ជាប់ពន្ធនាគារមួយឆ្នាំ។ ប៉ុន្តែសេចក្តីសម្រេចលើកទីមួយនោះ មិនទាន់អនុវត្តឡើយ ដោយរង់ចាំការប្តឹងជំទាស់។ តាមរដ្ឋអាជ្ញា លោក Sarkozy បានចំណាយលុយរហូតដល់ទៅ ២២,៥ លានយូរ៉ូ លើយុទ្ធការក្នុងការជួបជុំ និងពិធីផ្សេងៗ កាលពីឆ្នាំ២០១២។ ប៉ុន្តែលោកបានជួលក្រុមហ៊ុន Bygmalion ដើម្បីឱ្យចេញថ្លៃចំណាយលើពិធីទាំងនោះជំនួស។

គួររំលឹកថា នៅក្នុងការបោះឆ្នោតឆ្នាំ ២០១២ លោក Sarkozy បានចាញ់ការបោះឆ្នោត លោក François Hollande។ ចាប់តាំងពីពេលនោះមក អតីតប្រធានាធិបតីរូបនេះ បានក្លាយជាមុខសញ្ញានៃការស៊ើបអង្កេតជាច្រើន៕