អន្តរជាតិ
អគ្គរដ្ឋទូតចិនរំឭកឥណ្ឌា៖ ឥណ្ឌា គួររក្សាជំហរកណ្ដាល កុំចូលសម្ព័ន្ធភាពណាមួយដើម្បីប្រឆាំងចិន អគ្គរដ្ឋទូតចិនប្រចាំឥណ្ឌា Sun Weidong ។ រូបថត Xinhua
× អគ្គរដ្ឋទូតចិនប្រចាំរដ្ឋធានីញូវដែលី លោក Sun Weidong នៅថ្ងៃទី២៩ ខែកញ្ញា បានស្នើឱ្យ ភាគីឥណ្ឌារក្សាជំហរយុទ្ធសាស្ត្រស្វ័យភាពជាជាងចូលរួមជាមួយសម្ព័ន្ធភាពណាមួយប្រឆាំងនឹងប្រទេសជិតខាងរបស់ខ្លួន ព្រោះមិនអាចជោគជ័យឡើយ។ លោក Sun បានអំពាវនាវឱ្យឥណ្ឌាសហការជាមួយ ចិនឱ្យបានច្រើនជាងមុនលើបញ្ហាផ្សេងៗ និងជំរុញទំនាក់ទំនងពាណិជ្ជកម្មទ្វេភាគី។
ក្នុងកិច្ចប្រជុំអនឡាញថ្ងៃទី២៩ ខែកញ្ញា ជាមួយតំណាងជាង១០០នាក់នៃសហគមន៍អាជីវកម្ម វប្បធម៌ និងអប់រំនៅឥណ្ឌា អគ្គរដ្ឋទូតចិនប្រចាំឥណ្ឌា Sun Weidong សង្កត់ធ្ងន់ថា ការប៉ុនប៉ងណាមួយដើម្បីប្រមូលផ្តុំកម្លាំងក្នុងការទប់ស្កាត់ និងបង្ក្រាបចិន នឹងបរាជ័យជាក់ជាមិនខាន។ ទោះមិននិយាយចំឈ្មោះ លោក Sun ទំនងសំដៅលើការចូលរួមរបស់ឥណ្ឌាក្នុងជំនួបក្រុមដៃគូសន្ទនាសន្តិសុខចតុភាគី (Quad) ដែលបានធ្វើឡើងនៅថ្ងៃទី២៤ ខែកញ្ញាកន្លងទៅ។
លោក Sun លើកឡើងថា ដោយសារភាពអាត្មានិយម ពួកគេប្រកាន់ខ្ជាប់គោលគំនិតសង្គ្រាមត្រជាក់ដែលគិតតែពីប្រយោជន៍ខ្លួន ព្យាយាមបង្កើតក្រុមដោយមិនបញ្ចូលភាគីផ្សេង និងបង្កើតសម្ព័ន្ធយោធាដើម្បីគាបសង្កត់ប្រទេសដទៃ។ ក្នុងសេចក្ដីប្រកាសរបស់ស្ថានទូតចិន អ្នកការទូតរូបនេះ ក៏រិះគន់ទៀតថា ប្រទេសទាំងនោះក៏បង្កើនភាពតានតឹង បង្កឱ្យមានការរត់ប្រណាំងសព្វាវុធ ការបែងចែកបក្សពួក ហើយធ្វើឱ្យតំបន់ឥណ្ឌូ-ប៉ាស៊ីហ្វិកក្លាយជាសង្វៀនរបស់មហាអំណាច និងបង្កអស្ថិរភាពពិភពលោក។
អគ្គរដ្ឋទូតចិនរូបនេះ ក៏ស្នើឱ្យឥណ្ឌារក្សាជំហរយុទ្ធសាស្ត្រស្វ័យភាព ឬឯករាជ្យ ហើយចៀសពីការចូលរួមជាមួយសម្ព័ន្ធភាពផ្សេងៗប្រឆាំងនឹងគ្នាទៅវិញទៅមក ។ លោក Sun អះអាងថា ទោះបីជាទំនាក់ទំនងឥណ្ឌា-ចិនមានបញ្ហាល្អក់កករមួយចំនួនដូចជាជម្លោះព្រំដែនក៏ដោយ ក៏ភាគីទាំងពីរគួរតែដោះស្រាយជម្លោះទាំងនោះដោយយុត្តិធម៌ សមហេតុផល និងស្មើភាពដើម្បីស្ដារទំនាក់ទំនង និងឆ្ពោះទៅរកស្ថិរភាពជាមួយគ្នា។
ទន្ទឹមនេះលោក Sun ក៏បានស្នើទៅកាន់ភាគីឥណ្ឌាឱ្យផ្ដល់ភាពស្មើភាពគ្នានៃការវិនិយោគ របស់ក្រុមហ៊ុនប្រទេសទាំងពីរជាជាងការរឹតត្បិតការរកស៊ីរបស់ក្រុមហ៊ុនទាំងនោះ។ កន្លងមក ឥណ្ឌាបានហាមឃាត់កម្មវិធីទូរស័ព្ទចិនជាង២០០ ដោយសារមូលហេតុសន្តិសុខ ហើយក៏បាន ដាក់កំហិតការវិនិយោគរបស់ចិនក្នុងក្រុមហ៊ុននិងវិស័យដែលរសើបផងដែរ៕
© រក្សាសិទ្ធិដោយ thmeythmey.com